Minski rajon «Ržaviec» addali dvojčy. I Baturynaj, i kitajcam

Varyjant zabudovy, prapanavany kitajskaj kampanijaj

Prajekt, zrobleny maskvičami

«Kitajskija inviestary pabudujuć u Minsku haściničny kompleks «Piekin», rajony «Čajna-taŭn» i «Lebiadziny», — zajaviŭ načalnik upraŭleńnia inviestycyj kamiteta ekanomiki Minharvykankama Mikałaj Achromienka. Choć haradski čynoŭnik i ŭžyŭ nazvu «Lebiadziny», nasamreč mikrarajon kala «Minsk-Areny», rynku «Ždanovičy» i Pijanierskim pasiołkam nazyvajecca «Ržaviec». Adpaviednaje rašeńnie było pryniata minskim savietam depatutaŭ niekalki hadoŭ tamu.

Asablivuju cikavaść vyklikaje situacyja mienavita ź im. Choć inviestycyjnaja damova nakont «Ržaŭca» jašče nie padpisanaja, a značycca, nieviadomy i abjom finansavańnia, Mikałaj Achromienka ahučyŭ kankretnyja ŭmovy biełaruska-kitajskaha supracoŭnictva. Prajekt realizujecca sumiesna ź piekinskaj kampanijaj «Chua-O». Jaje intaresy ŭ Biełarusi pradstaŭlaje pradpryjemstva «Čžun-Ciń Abjadnańnie», jakoje i budzie ažyćciaŭlać budaŭnictva.

Architekturnaje abličča zbudavańniaŭ, elemienty łandšaftnaha dyzajnu, što ŭvachodziać u skład budučaha žyłoha kompleksu, «buduć adlustroŭvać nacyjanalnyja i histaryčnyja asablivaści kitajskaj architektury».

Usio b ničoha, kali b hety mikrarajon u svoj čas nie byŭ paabiacany žoncy byłoha mera Maskvy Juryja Łužkova Alenie Baturynaj i jaje kampanii «Inteka». Jašče ŭ 2006 hodzie maskvičy adchapili «hurtam» niekalki prestyžnych terytoryj u Minsku — «Minsk-sici», chmaračosy kala stancyi mietro «Frunzienskaja», zabudova na praśpiekcie Dziaržynskaha, mikrarajon «Ržaviec».

Byŭ zaćvierdžany prajekt zabudovy «Ržaŭca», vyznačany inviestar — «Bank Maskvy». Rajon raspracoŭvaŭsia całkam pa maskoŭskich normach, a kiraŭnikom prajektu źjaŭlaŭsia pieršy namieśnik hałoŭnaha architektara Maskvy Juryj Hryhorjeŭ. Prapanovy abodvuch bakoŭ možna paraŭnać na renderach. Cikava, što rasijanam paabiacali płošču 35,72 ha, a voś kitajcam trochi bolšuju — 36,2 ha.

Pry tym, što kantrakt z kitajcami voś-voś budzie padpisany, ad supracoŭnictva z rasijanami taksama nichto nie admaŭlajecca! Usio toj ža Mikałaj Achromienka paćvierdziŭ, što «prajektam Aleny Baturynaj u Miensku ničoha nie pahražaje».

0

0

0

0

0

0

Jaŭhien Vasilkoŭ

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH