Aramnaŭ: Pju ja tolki piva. Butelečku ranicaj, u abied, paźniej jašče adnu

Andrej Aramnaŭ, fota Julii Daraškievič.

Ci praŭda, što Andreja Aramnava ŭ treci raz zatrymali niećviarozym za rulom? Niaŭžo lepšy štanhist śvietu ŭžyvaje marychuanu i z-za hetaha nie pajedzie na Alimpijadu ŭ Łondan? Takimi zahałoŭkami ŭ vieraśni strelili pieršyja pałosy haziet i papularnyja internet-sajty.

Sam Andrej pakryŭdziŭsia na haziety i ab"iaviŭ bajkot. Ale dniami ŭsio ž pahadziŭsia raspavieści svaju praŭdu žurnalistu «Źviazdy».

Daŭno cikaŭlusia losam Andreja Aramnava i rabiŭ ź im nie adno intervju. Tamu kali internet vybuchnuŭ siensacyjaj «Aramnaŭ palić marychuanu», paprostu nie moh u heta pavieryć…

I voś narešcie sustrakajemsia z atletam u alimpijskim kompleksie «Stajki» (siudy jaho na mašynie pryvioz barysaŭski siabar Saša).

— Pryčoska — usio, što ad mianie zastałosia biez štanhi, — ci to žartuje, ci to prosta kaža Andrej, pakul my padymajemsia ŭ trenažornuju zału ciažkaatletyčnaha korpusa. Zaŭvažaju, što štanhist i sapraŭdy straciŭ vahu. Uklučaju dyktafon i papiaredžvaju Andreja Aramnava, što razmova budzie žorstkaj.

«Prezident mižnarodnaj fiederacyi skazaŭ, što ja vystuplu na Alimpijadzie»

— Učora ŭ Barysavie ŭ rodnaj spartškole źniali moj płakat. Pažarnyja śpiecyjalna pryjechali, skazali, što zahadaŭ «horad». Ja pajechaŭ tudy. Čamu tam, nie parazmaŭlaŭšy sa mnoj, pavieryli ŭ hazietnyja plotki? — aburajecca štanhist. — U pryjomnaj mianie spynili… Pryjšli achoŭniki i vyvieli. Ruki im bolš nie padam, tak i napišycie. U hazietach nachłusili, što Aramnaŭ — pjanica. Ź mianie paśmiešyšča zrabili. Vychodžu z domu na treniroŭku — palcam na mianie pakazvajuć, śmiajucca. Na mašynie zzadu napisali: «Niaŭdačnik».

Ź mianie zrabili varjata, ałkaholika.

— Dopinh-proba na čempijanacie Jeŭropy pakazała najaŭnaść u kryvi sintetyčnych kanabinoidaŭ, jakija ŭtrymlivajucca ŭ narkatyčnych mikstach spajs. Jak takoje mahło zdarycca?

— Čamu ŭsie pra heta pišuć, nie viedajučy abstavin? Spačatku nachłusili, što ja kuryŭ marychuanu. Ja što, na narkamana padobny?

Adkul mnie było viedać, što ŭ hetym kalarovym pakieciku — niebiaśpiečnaje rečyva? Na toj momant jano było dazvolena i svabodna pradavałasia.

Na pakieciku što było napisana? Duchmianyja travy. Što heta za bardak, kali takoje biez prablem pradajuć?

(Tut Andrej Aramnaŭ maje racyju. Z-za niakiemlivaści kampietentnych viedamstvaŭ bolšaść narkatyčnych kurylnych mikstaŭ dahetul nie ŭniesienyja ŭ pieralik psichatropnych srodkaŭ — «Źviazda»). Skazali, što ja ŭvohule pieršy spartsmien, jakoha dyskvalifikavali za ŭžyvańnie takoha rečyva. Paśla hetaha mnie pra spajsy ŭvohule dumać strašna. A ź mianie zrabili narkamana. Paśla kožnaha takoha artykuła ŭ mianie strašenny stres.

— Nichto nie viedaje dakładna, ale pišuć, što z-za dyskvalifikacyi tvoj udzieł u łondanskaj Alimpijadzie 2012 hoda pad pytańniem.

— Niadaŭna zbornaja pryjechała z čempijanatu śvietu. Staršynia Mižnarodnaj fiederacyi ciažkaj atletyki Tamaš Ajan skazaŭ, što ja ŭ lubym razie vystuplu na Alimpijadzie ŭ Łondanie. Šostaha śniežnia skončycca maja dyskvalifikacyja. U krasaviku — pieršynstvo Jeŭropy. Pajedu zabirać svoj tytuł. Potym — čempijanat śvietu, dzie ja pavinien zarabić alimpijskuju licenziju.

— Navošta ty ŭžyvaŭ duchmianyja travy? Niachaj sabie jany byli dazvolenyja i svabodna pradavalisia?

— Na čempijanacie Jeŭropy ja vystupaŭ na niervach. Dla taho, kab pakazać vynik, ja pavinien adčuvać uraŭnavažanaść i supakajeńnie. A ja ŭvieś čas dumaŭ pra niejkuju łuchtu. Nie moh zasnuć, nie moh znajści adkazy, ledź nie traŭmavaŭsia.

— U čym była prablema?

— Pierad čempijanatam Jeŭropy ja prasiŭ u ludziej padtrymki. Kab drenna pra mianie nie kazali. Heta samaje važnaje dla mianie. Zdavałasia, što ŭsie prablemy ŭ minułym. Ale za tydzień da startu pryjšli ź ministerstva sportu i skazali, što ja siabie drenna pavodžu, i padtrymka budzie tolki ŭ vypadku pieramohi. Taki psichałahičny cisk mianie ŭzrušyŭ, nie chaciełasia padymać štanhu. Usie pahanyja dumki znoŭ abrynulisia na mianie.

Byŭ mocny stres.

Ja pavinien byŭ niejkim čynam supakoicca pierad startam, voś i paraili kupić hetyja duchmianyja travy…

«Jon tak pakryŭdziŭsia, što pajšoŭ suprać…»

— I sapraŭdy, paśla treciaha zatrymańnia niećviarozym za rulom ludzi dumajuć, što ty rehularna zakładaješ za kaŭnier. Raskažy, jak zdaryłasia, što ty papaŭsia na ałkaholi?

— Mianie spynili, choć praviłaŭ ja nie parušaŭ. Ja narmalna, kulturna ź imi (inśpiektarami DAI) pahavaryŭ. Pasadzili mianie ŭ svaju mašynu. Byŭ pik śpiakoty, kandycyjaniera ŭ ich niama. Paprasiŭ padniacca, druhi daišnik upiorsia puzam i nie puściŭ. Uziali maju mašynu, zavałakli na evakuatar, drotam padrapali bampier. Pavieźli na ekśpiertyzu. Aparat pakazaŭ 0,52 pramile, a potym 0,57 pramile ałkaholu ŭ kryvi (zusim niaznačnaje pieravyšeńnie mahčymaj normy, jakaja składaje 0,44 pramile). I kožny raz u mianie było voś takoje minimalnaje pieravyšeńnie. Sam nie razumieju…

Moža, ja i praŭda niaŭdačnik? Bolš za paŭtara litra piva ja nie vypivaju, a arhanizm usprymaje jaho tak, što aparat pakazvaje pieravyšeńnie normy.

— Navošta kiravać aŭtamabilem paśla taho, jak vypiŭ?

— Ja za treniroŭku mahu padniać tryccać ton.

I kankretna mnie piva dapamahaje adnaŭlacca.

Ja — prafiesijny spartsmien i viedaju ŭsie asablivaści majho arhanizma. P"iu ja tolki piva. Butelečku ranicaj, u abied, paźniej jašče adnu. Nie bolej za paŭtara litra. Hetaha chapała, kab pieravysić normu. Ale heta nie robić ź mianie p"ianicu.

Jak, pa-vašamu, možna pieramahčy na čempijanacie Jeŭropy? P"ianym, ci što? Ja ŭžyvaju tolki piva, da harełki nie dakranajusia.

Zaŭvažu, što ŭ svaim žyćci ja nie mieŭ nivodnaj avaryi. Nikoli takoha nie zdarałasia, što z mašyny vypadaŭ. Uvohule liču siabie aściarožnym i razvažlivym kiroŭcam.

— Andrej, u mianie ŭ hałavie nie ŭkładajecca, čamu ty raz za razam nastupaješ na tyja ž hrabli? Nie kožny ŭmudrycca trojčy papaścisia niećviarozym padčas kiravańnia aŭtamabilem.

— Viedajecie, kali ja papior suprać zakonaŭ i naviazvańniaŭ? Upieršyniu mianie złavili, kali ja paśla Alimpijady atrymlivaŭ kvateru ŭ Minsku. Sami ž častavali šampanskim. Tam prapanavali, a na dvare ŭžo daišniki čakajuć…

Kali b paśla hetaha mianie ščyra vybačyli, padtrymali, ja nikoli b nie pierastupiŭ paroh aŭto niećviarozym. I ciapier ja piva p"iu, a jany mianie dušać! Kaliści ja pajšoŭ suprać usich praviłaŭ. A jak inakš, kali adniali mahčymaść narmalna treniravacca? Ja pratestavaŭ!

Saša, siabar Andreja Aramnava, jaki pryvioz atleta ŭ Stajki, zrabiŭ svaju remarku da słoŭ atleta: «Jon tak pakryŭdziŭsia na tuju pieršuju situacyju, što pajšoŭ suprać… Andrej — jak nieparušnaja ściana. I paŭpłyvać na jaho ŭ hetym pytańni składana. Małady jašče».

«Stolki ludziej zahubili — i ŭsio narmalna. Adzin Aramnaŭ vinavaty»

— Ja ŭvohule mahu admovicca ad užyvańnia piva. Viedajecie, u mianie vializnyja ambicyi. Ja chaču stać najmacniejšym čałaviekam płaniety ŭ historyi. Chaču zafiksavać takija vyniki, jakija jašče nichto nie fiksavaŭ.

Maja mara — pabić rekord Juryja Zachareviča. Heta 210 kh u ryŭku i 250 kh u šturšku

Ale Zacharevič vystupaŭ u katehoryi 110 kh, a ja — u 105 kh. Tolki mahčymaści ździejśnić hety płan pakul niama. U zbornaj niama ŭsich nieabchodnych umoŭ dla trenirovak prafiesijnaha spartsmiena. Amal usie darosłyja chłopcy syšli ci im skazali zaviazać. Chaču iści na suśvietny rekord, a aproč štanhi, narmalnaha abstalavańnia niama. Voś zirnicie na trenažory, imi nichto nie karystajecca — haniaješ pavietra takimi trenažorami dy i ŭsio. Charčavańnie takoje, što ŭ mianie ŭžo nie lezie. Vitaminaŭ naležnych ja nie atrymlivaju. Kali padymaju štanhu, na mianie padaje 200 kh. A masaž narmalny zrabić nie mohuć. Trenirujuć časam bieź viedańnia spravy. Kali b ja dakładna vykonvaŭ płan u zbornaj, to nie pieramoh by na Alimpijadzie ŭ Piekinie. Tamu što płan byŭ zrobleny pad Rybakova, a ja — atlet inšaj katehoryi. I z-za hetaha byli ŭvieś čas kanflikty.

Mnie dla dasiahnieńnia vyniku nieabchodna raźvićcio — fizičnaje, psichałahičnaje, maralnaje. Mnie treba ŭvieś čas znajomicca ź ludźmi, raźvivacca, navučacca. A mianie zapichnuli ŭ hetyja «Stajki», dzie absalutna niama nijakaha raźvićcia. Piać hadoŭ tut siadžu, u hetym lesie.

U numary tolki televizar z tryma kanałami — chaładzilnika navat niama. U vyniku ja rablusia zahružanym. Adzinaja mahčymaść razhruzicca była — vypić piva.

Paśla interv"iu z Andrejem Aramnavym ja źviarnuŭsia da śpiecyjalistaŭ u halinie miedycyny i bijachimii z pytańniem: «Niaŭžo štanhist moža „razhruzicca“ pivam?» Akazałasia, što i sapraŭdy, užyvańnie hetaha napoju ŭ nievialikaj kolkaści moža być dla štanhista karysnym: vitamin V, rost myšcaŭ i hetak dalej…

Uvaha! Peŭnuju karyść moža atrymać tolki prafiesijny atlet, jaki vałodaje samakantrolem i dakładna adčuvaje patreby svajho arhanizma. Dla zvyčajnaha mužčyny ŭžyvańnie piva kolkaściu bolšaj za adzin kuchal — škodnaje.

— Niaŭžo ŭ zbornaj niama trenieraŭ, jakija mahli b taboj zajmacca?

— Moj asabisty trenier, Michaił Saładar, uvieś čas sa mnoj, nie prapuskaje nivodnaha majho padychodu, kantraluje. Da jaho pretenzij niama. Ale jość treniery bolš vysokaha statusu, jakija, tym nie mienš, niedastatkova viedajuć svaju spravu. Zbornaja vystupaje ŭsio horš i horš. U 2004 hodzie ŭ nas piać čałaviek rychtavałasia ŭ katehoryi 85 kh, u katehoryi 94 kh — čatyry čałavieki, i ŭsie byli darosłyja. U katehoryi 105 kh rychtavalisia try čałavieki, u ciažach — dva. Było vielmi šmat talenavitych spartsmienaŭ. Ale kolki chłopcaŭ «pałamałasia» z taho času! Kahości prosta śpisvajuć, u niekatorych rvucca kaleni, myšcy, plečy… I heta — trenierskija pamyłki, papiaredzić traŭmy jany prosta nie mohuć. Ja sam padychodžu da maładych i kažu: tut treba paciarpieć, a tut — prytrymacca. Dyk padychodzić adzin trenier i z naśmieškaj: «Nu što, pakazaŭ majstar-kłas?» Jašče ŭ 2007 hodzie adzin z takich «śpiecyjalistaŭ» mnie skazaŭ:

«Kali ty, ha…iuk, budzieš vypiendryvacca, ja tabie pakažu!» Ale ja stajaŭ na svaim i pieramoh na Alimpijadzie.

— A kaho ź pierśpiektyŭnych atletaŭ, ty ličyš, niespraviadliva śpisali z rachunkaŭ?

— Naprykład, talenavitaha štanhista Mikałaja Patockaha. Jon i ciapier moh by treniravacca. Byŭ čempijonam śvietu siarod junijoraŭ. Vystupajučy ŭ katehoryi 94 kh, rvaŭ až 200 kh, jak ja, ujaŭlajecie? Ale navučyć jaho šturchać ad hrudziej paprostu nie zmahli, nie chapała trenierskaj kvalifikacyi. I ŭ vyniku takoha talenavitaha čałavieka adpravili dadomu. Pierakanany, kali b u jaho ŭkłali dušu, byŭ by zaŭsiody pryzioram top-spabornictvaŭ. Ale siońnia hety čałaviek — zvyčajny rabočy. Takich vypadkaŭ mahu pryvieści šmat. Stolki ludziej zahubili — i ŭsio narmalna, adzin Aramnaŭ va ŭsim vinavaty.

Adnaho našaha kadeta, 16-hadovaha chłopca, złavili na dopinhu. Jak vynik — čatyrochhadovaja dyskvalifikacyja. A heta byli b stabilnyja miedali. Kolki ludziej papalisia na dopinhu! I heta — pamyłki ŭ trenirovačnym pracesie. Kamanda imkliva idzie ŭniz. I pa vynikach, i pa kantynhiencie spartsmienaŭ. Chutka my staniem zbornaj junijoraŭ. A raniej u nas była takaja kamanda, što mahła prynosić bolš miedaloŭ, čym usia lohkaja atletyka — usie 18 vidaŭ.

U hety ž čas sapraŭdy dobryja treniery žyvuć na zdymnych kvaterach. Naprykład, Uładzimir Barzdakoŭ, jaki treniruje mianie, kali ja znachodžusia ŭ Barysavie. A heta jon znajšoŭ mianie i vyvieŭ na mižnarodnuju arenu.

— Błukajuć čutki, što ciabie pieramańvajuć u ZŠA…

— Ja nie chaču ad"iazdžać, chaču žyć tut. Maru ažanicca, dziaciej chaču, nabyć dom.

Ale kali takoje staŭleńnie budzie praciahvacca paśla Łondana, vaźmu dy i sydu sa sportu.

— Chaciełasia b, Andrej, kab tvaje prablemy minuli, kab ty znoŭ byŭ u najlepšaj formie. Ale tvoj uparty charaktar — heta žach!!!

— Chaču, kab da mianie pačali narmalna, pa-čałaviečy, stavicca. I ja tut ža źmianiu svajo mierkavańnie nakont peŭnych rečaŭ. Ja prafiesijny spartsmien, ale moj talent uvohule nie zapatrabavany. Niama nijakaj uvahi. Takoje adčuvańnie, što voś-voś pra ciabie ŭvohule zabuducca.

Žurnalisty ŭzhadvajuć tolki tady, kali zdarajecca niešta drennaje.

Voś u apošni raz mianie dajmała adna karespandentka. Pryjechała, padpilnavała maju maci, jakaja napracavałasia ŭ načnuju źmienu. Da nočy biehała i tresła susiedziaŭ, fatahrafavała mašyny. Pilnavała mianie, razoŭ dvaccać patelefanavała, choć ja skazaŭ, što interv"iu davać nie budu, što sam jašče nie viedaju, jak maje spravy…

Siońnia ludzi vyciahvajuć ź mianie zarad važnych emocyj. Jak u takim stanie vychodzić na pamost? Chaciełasia b, viadoma, kab ludzi zrazumieli, što ja nie taki, jak pra mianie kažuć.

— Ty zhodny, što časam robiš istotnyja pamyłki, što niešta treba mianiać u žyćci?

— Ja heta razumieju.

Chaciełasia b, kab nastupnaje pakaleńnie nie paŭtarała maich pamyłak.

Paviercie, bolš za ŭsio ŭ žyćci mnie b chaciełasia prynieści karyść našaj krainie, našym dzieciam.

Ja pierakanany, što mahu tak treniravać ludziej, što jany buduć padymać štanhu pravilna i nie zastanucca pry hetym invalidami. Buduć pry hetym narmalnymi, razumnymi i hodnymi ludźmi.

* * *

U čym unikalnaść Andreja Aramnava?

Naš štanhist uzrušyŭ uvieś spartovy śviet siensacyjaj na Alimpijadzie 2008 hoda ŭ Piekinie (tady jamu było 20, siońnia — 22). Zafiksavaŭ suśvietny rekord u ryŭku (200 kh) i suśvietny rekord pa sumie ryŭka i šturška (436 kh). Cikava, što sam Aramnaŭ nie vyłučajecca hrenadziorskaj kamplekcyjaj: značna nižejšy za svaich supiernikaŭ (rost kala 174 sm). Pa tak zvanaj tablicy Sinklera (uličvajecca vynik atleta i jaho asabistaja vaha) Aramnava paśla Alimpijady pryznali najlepšym štanhistam śvietu.

Hałoŭnyja spabornictvy čatyrochhodździa prajšli, a imia Andreja Aramnava praciahvała hrymieć. Dvojčy atleta spyniali supracoŭniki DAI ŭ stanie ałkaholnaha ap"ianieńnia. Zabrali pravy, pryciahnuli da kryminalnaj adkaznaści, dali štraf. I voś u pačatku žniŭnia hetaha hoda — čarhovaja bomba, treciaje zatrymańnie niećviarozym padčas kiravańnia aŭto. Na hety raz Aramnavu dali 10,5 miljona rubloŭ štrafu. Kali čytaješ pra heta naviny ŭ internecie, padajecca što Aramnaŭ — samaŭpeŭnieny chulihan, jaki maje zornuju chvarobu.

Raspaviadu vam tolki pra svaje nazirańni. Čałaviek nie łajecca maciukami. U dźviery ŭvachodzić apošnim. U alimpijskim kompleksie «Stajki» vitajecca z usimi ludźmi. Žančyny ŭsie jak adna nazyvajuć Aramnava Andrušam i spyniajucca parazmaŭlać. Ciaham hutarki ja źnianacku zadaŭ atletu pytańnie: «Jakuju knižku ty zaraz čytaješ?» Andrej adkazaŭ: «Dyjanetyku» Rona Chabarta. Kniha pra mietodyku pracy z rozumam»