Inicyjatyŭnaj hrupie pa vyłučeńni kandydatam u prezidenty Biełarusi Uładzimira Niaklajeva moža być vyniesiena papiaredžańnie.
Jak paviedamiŭ sakratar Centralnaj kamisii Mikałaj Łazavik, na pasiadžeńni 14 kastryčnika CVK płanuje razhledzieć pytańnie ab dziejnaści inicyjatyŭnaj hrupy Niaklajeva. «Da nas pastupaje vielmi šmat zvarotaŭ praktyčna z usich rehijonaŭ Biełarusi ad hramadzian, jakija znachodziać u svaich paštovych skryniach drukavanuju pradukcyju pra Niaklajeva, vyrablenuju za miažoj», — skazaŭ Łazavik.
Jon nahadaŭ, što ahitacyja ŭ pieryjad zboru podpisaŭ zabaroniena. «Parušeńnie zakanadaŭstva inicyjatyŭnaj hrupaj Niaklajeva vidavočnaje. Našy dastatkova jasnyja namioki, što raspaŭsiudžvać ahitacyjnuju pradukcyju nielha, pačuty nie byli», — skazaŭ jon.
Pavodle słoŭ sakratara CVK,
za dačasnuju ahitacyju inicyjatyŭnaja hrupa moža być papiaredžana, a ŭ vypadku paŭtornaha parušeńnia zakanadaŭstva — admieniena jaje rehistracyja.
Łazavik zapeŭniŭ, što ŭ Centrvybarkamie «vielmi ceniać kožnaha patencyjalnaha kandydata». «Na hetych vybarach stvorany samyja šyrokija mahčymaści dla zboru podpisaŭ. Inicyjatyŭnyja hrupy nie vykazvajuć pretenzij ni ŭ dačynieńni da dziejańniaŭ supracoŭnikaŭ orhanaŭ unutranych spraŭ, ni miascovych uładaŭ. Inicyjatyŭnym hrupam treba prosta pracavać u miežach zakona», — padkreśliŭ jon.
Pavodle słoŭ Łazavika, skarhi na dziejnaść inšych inicyjatyŭnych hrup u Centrvybarkam nie pastupali.
Jak paviedamlałasia raniej, 6 kastryčnika padčas sustrečy z kiraŭnikom misii naziralnikaŭ ad SND na prezidenckich vybarach u Biełarusi Siarhiejem Lebiedzievym staršynia CVK Lidzija Jarmošyna paprasiła maskoŭskaje adździaleńnie Vykankama SND ustanavić, chto raźmiaściŭ zakaz na vyrab rekłamnych ulotak Niaklajeva na pradpryjemstvie
Sam Niaklajeŭ zajaviŭ, što materyjały z łahatypam kampanii «Havary praŭdu!» z samaha pačatku vykarystoŭvalisia dla pravakacyj.
«Ja nie mahu adkazvać za niejkija pravakacyjnyja dziejańni. Siońnia kožny navat doma moža nadrukavać ulotku z našym łahatypam, kinuć jaje ŭ paštovuju skryniu susiedu, a potym skazać: voś, hladzi, zaŭčasnaja ahitacyja. Ale ja jasna kažu — maja inicyjatyŭnaja hrupa hetym nie zajmajecca», — skazaŭ palityk.
