U Iviancy (Vałožynski rajon) 16 kastryčnika ŭpieršyniu projdzie rehijanalny tvorčy kirmaš (Ivianiecki tvorčy kirmaš). Arhanizatarami mierapryjemstva vystupajuć SP «Ivkon AAT», Ivianiecki muziej tradycyjnaj kultury i adździeł kultury Vałožynskaha rajvykankama.
Jak paviedamiła viadučy śpiecyjalist pa etnahrafii pradpryjemstva «Ivkon» Antanina Chatenka, tvorčy forum pačniecca z aśviačeńnia kaplicy Božaj miłasernaści.
U ramkach śviata projduć kirmašy idej i racyjanalizatarskich vynachodnictvaŭ, kulinarnaha majsterstva — sučasnaha i staražytnaha, vystupleńni na muzyčnych instrumientach i pradmietach pobytu. Buduć pradstaŭleny raboty majstroŭ tradycyjnaha mastactva — vyraby z hliny, sałomki i łazy, žaleza i dreva.
Projdzie konkurs na stvareńnie fresak ab Iviancy i jaho navakolli, demanstracyja cyrulnickaha i stylistyčnaha majsterstva, prezientacyjakulinarna-daśledčaha prajekta «Naša strava» Alesia Biełaha, dehustacyja cukierak miascovaj vytvorčaści.
Inicyjataram praviadzieńnia tvorčaha kirmašu vystupaje kampanija «Ivkon». Jak zajaŭlajuć arhanizatary, meta mierapryjemstva — dać mahčymaść jaho ŭdzielnikam pakazać svaje zolnaści i talenty, a taksama prapanavać haściam kirmašu svaju pradukcyju.
Arhanizatary taksama staviać na mecie pryciahnuć pakupnika tradycyjnych i sučasnych pradmietaŭ prykładnoj tvorčaści — ad vyrabaŭ z hliny, łazy i dreva da mastackich vynachodnictvaŭ.
«Tradycyjny kirmaš na ziemlach staroj Litvy mieŭ svaje niepaŭtornyja rysy, asabliva vosieńniu, bližej da śviata Usich Śviatych, tamu na śviacie prahučać i malitvy, i pieśni, adbuducca konkursy i rozyhryšy. Jość umova — na kirmašy ŭsie zarablajuć svaimi zdolnaściami, a nie čakajuć čyjojści apłaty», — prakamientavała Chatenka.
Kampanija «Ivkon» była inicyjataram i arhanizataram praviadzieńnia ŭ Iviancy pieršaha ŭ Biełarusi cukieračnaha śviata (Cukieračny fest), prahrama jakoha była źviazana ź siarednieviakovymi biełaruskimi tradycyjami, a taksama sa staražytnymi padańniami ab zasnavańni miastečka Ivianiec.