Žanočuju zbornuju Biełarusi pa baskietbole sustreli ŭ aeraporcie z kvietkami i arkiestram.
Natallu Marčanku (na piarednim płanie) z kvietkami sustrakajuć nie ŭpieršyniu, a voś dla Alaksandry Tarasavaj (druhaja) takoje ŭpieršyniu.
Sfotkacca z najlepšaj centravoj čempijanatu Alenaj Leŭčanka chacieli mnohija.
Natalla Marčanka: my ŭsio adno małajcy!
Było šmat kvietak i pacałunkaŭ.
Maryna Kres ź vierniem fanatam zbornaj.
Natallu Marčanku sustrakaŭ jaje muž, viadomy futbalist Alaksiej Baha.
Zbornaja viarnułasia ŭ Biełaruś 4 kastryčnika avijarejsam ź Vieny. U aeraporcie dziaŭčat i trenierski štab sustrakali dziasiatki ludziej z kvietkami. Kala vychadu z 5-6 siektaraŭ čakaŭ vajskovy arkiestr. Samalot pryziamliŭsia na 11 chvilin paźniej. Pieršyja pasažyry stali źjaŭlacca praz chvilin piatnaccać. Heta byli zvyčajnyja ludzi, jakija vidavočna biantežylisia ad mnostva fota i videakamier, bukietaŭ kvietak u rukach unušalnaha dla nievialikaha viestybiulu natoŭpu.
Nad vychadam ź siektaru visieła rekłama roŭminhu ŭ Rasii adnaho z mabilnych apierataraŭ. Kahości z zaŭziataraŭ heta pravakavała na ŭspaminy pra tryumfalnuju pieramohu našych baskietbalistak nad rasiejskami. «A kolki pantoŭ było! Dy my ich na adnoj nazie razmažam! A našy ŭziali dy parvali rasijskuju zbornuju», — dzialiŭsia niadaŭna pieražytymi emocyjami ź siabram maładzion u spartovaj kurtcy.
Brama ŭ čarhovy raz rasčyniłasia, pierad natoŭpam źjaviłasia hrupa zamiežnikaŭ.
Adzin źbiantežana spyniŭsia i ŭ razhublenaści pramoviŭ: «Spa-si-bo». «Vełkam!» — vybuchnuŭ śmiecham lud.Hałoŭny redaktar internet-haziety «Salidarnaść» Alaksandr Starykievič paspačuvaŭ zaŭsiodnym klijentam minskaha aeraportu: «Tut zvyčajna nastolki hłucha, što takoje vidovišča, jak siońnia, mnohim ciažka pieravaryć».
Pryziamliŭsia samalot, što prylacieŭ z Amsterdamu. Zaŭziatary zachvalavalisia. Pačulisia tryvožnyja zdahadki, što hieraiń čempijanatu mahli vyvieźci praź inšy siektar. «Dy nie, tut televizijščyki, jany ž nie durni, viedajuć, dzie sustrakać», — supakoiŭ tavaryšaŭ adzin z fanataŭ zbornaj. U natoŭpie hučali poŭnyja skruchi hałasy amataraŭ baskietbołu: «U mianie akumulatar u fociku sieŭ! A ja zabyŭ kalandar ź dziaŭčatami, kłasna było b aŭtohraf u kožnaj atrymać».
Siarod čakalnikaŭ rasło napružańnie. Pach kvietak rabiŭsia amal nievynosny. I tut pa natoŭpie praniesłasia chvala vopleskaŭ i krykaŭ zachapleńnia: z-za śpinaŭ ludziej da bramy pracisnułasia adna z baskietbalistak — Taćciana Lichtarovič. Jana koratka pavitałasia i źnikła ŭ tym nakirunku, adkul čakałasia zbornaja. Da žurnalistaŭ, što zaniali pieršyja šerahi, vyjšaŭ mužčyna z racyjaj i paabiacaŭ, što praz try chviliny spartsmienki pryjduć. Na hadzińniku było 17.22.
I voś narešcie dziaŭčaty! Hrymnuŭ arkiestr, jaki ź pieršych akordaŭ ustupiŭ ŭ nialohkaje spabornictva z natoŭpam.Niekalki chvilinaŭ ciahnulisia abdymki z rodnymi, dareńnie kvietak, a potym dziaŭčat raschapali žurnalisty i prychilniki. Adzin ź ich taki pryvioz u aeraport kalandar dla aŭtohrafaŭ. «My čytali vašy kamientary i vinšavańni, dziakuj usim!» — kazała Maryna Kres. Alena Leŭčanka sa stomlenaj uśmieškaj razdavała aŭtohrafy. Na vulicy pačałosia fotapalavańnie: «Mama! Tam Marčanka, dzie naš fotaaparat?!»
Na vychadzie ź siektaraŭ trenier zbornaj Anatol Bujalski daŭ impravizavanuju pres-kanfierencyju. «Ja zadavoleny vynikam», — padkreśliŭ jon.
Trenier raskazaŭ pra zaŭziataraŭ, jakija padtrymlivali zbornuju ŭ Čechii i internecie, pra hulniu z Rasijaj, «zornuju» chvarobu, padzialiŭsia płanami na budučyniu. Bujalski padkreśliŭ, što hałoŭnaje dla jaho kamandy — heta hledačy i zaŭziatary — i tyja, što pryjechali ŭ Čechiju (niešmatlikaja, ale vielmi aktyŭnaja hrupa, jakaja raście prafiesijna razam sa zbornaj), i tyja, što pieražyvali pierad televizarami i manitorami kamputaraŭ.
Našy prychilniki — tolki dziela ich my i pieramahajem,padkreśliŭ Anatol Bujalski. Jon vykazaŭ pažadańnie, kab za žyćciom zbornaj sačyli niezaležna ad jaje pośpiechaŭ, ci niaŭdač. Bo atrymlivajecca, što kvietki i arkiestr dziaŭčat čakaje vyklučna paśla pieramoh. U toj čas, jak u darohu pierad turnirami ich pravodziać biez pompy.
Jon raskazaŭ, što na hety turnir zbornaja vypraŭlałasia tak, što «na ešafot jeduć viesialej».Adjezdu papiaredničała bujnaja paraza ad zbornaj Rasii, adsiul, mahčyma, i taki nastroj u darohu, miarkuje trenier. Ale, całkam vierahodna, heta dała i svojeasablivy zarad na hulniu z toj ža Rasijaj, jakaja skončyłasia pieramohaj biełarusak. Bujalski raskazaŭ, što taja pieramoha sparadziła kałasalnuju ŭvahu da našaj zbornaj. «Časam chaciełasia schavacca ad hetaha ŭsiaho». Tym nie mienš, da papularnaści dziaŭčat jon pastaviŭsia spakojna, adznačyŭšy, što «zornaja» chvaroba ŭ takoj situacyi — reč naturalnaja, ale našy baskietbalistki ź joj spravilisia. Nastupny etap — padrychtoŭka da čarhovaha Čempijanatu Jeŭropy i alimpijady ŭ Łondanie.
***
Žanočaja zbornaja Biełarusi pa baskietbole siensacyjna debiutavała na Čempijanacie śvietu 2010 u Čechii, zaniaŭšy 4-je miesca. Miedali ŭziali amierykanki, češki dy ispanki, adpaviedna. Našy ž dziaŭčaty pakinuli zzadu aŭstralijek (čempijonak 2009 h.), francužanak i favarytak čempijanatu rasiejek. Pa vynikach turniru biełaruska Alena Leŭčanka była pryznanaja najlepšaj centravoj turnira — jana trapiła ŭ simvaličnuju piaciorku najlepšych baskietbalistak u svaich ampłua.
