Rada vykanaŭčych dyrektaraŭ Suśvietnaha banka ŭchvaliła dadatkovuju pazyku dla Biełarusi ŭ 30 młn. dołaraŭ na finansavańnie prajekta "Reabilitacyja rajonaŭ, paciarpiełych u vyniku katastrofy na Čarnobylskaj AES".
Pra heta paviedamili ŭ pradstaŭnictvie Suśvietnaha banka ŭ Biełarusi.
Realizacyja prajekta praduhledžvaje akazańnie jakasnych pasłuh pa aciapleńni i haračym vodazabieśpiačeńni žycharam rajonaŭ, paciarpiełych u vyniku avaryi na ČAES.
Termin pahašeńnia pazyki Suśvietnaha banka składaje 15 hadoŭ, uklučajučy adterminoŭku vypłaty na try hady. Prajekt, jaki finansujecca za košt srodkaŭ novaj pazyki, płanujecca realizavać u 2011—2013 hadach.
U miežach prajekta finansujucca mierapryjemstvy pa pavyšeńni enierhaefiektyŭnaści, uklučajučy zamienu voknaŭ i arhanizacyju enierhaefiektyŭnaha aśviatleńnia ŭ hramadskich budynkach, ramont kacielniaŭ, a taksama pieravod kacielniaŭ u mini-CEC z kambinavanaj vypracoŭkaj ciepłavoj i elektryčnaj enierhii. Za košt srodkaŭ prajekta taksama budzie ažyćciaŭlacca padklučeńnie indyvidualnych damoŭ da hazavych sietak.
U biełaruskim pradstaŭnictvie Suśvietnaha banka adznačyli, što dadatkovaja pazyka zabiaśpiečyć praviadzieńnie bolšaj kolkaści mier, anałahičnych tym, što realizavany ŭ ramkach pieršapačatkovaj pazyki ŭ 50 młn. dołaraŭ ZŠA, uchvalenaj u 2006 hodzie.
Za čas asvajeńnia srodkaŭ, atrymanych ad Suśvietnaha banka, było ŭdaskanalena aśviatleńnie, aciapleńnie, zamienieny vokny i dźviery ŭ 205 škołach; 2.920 žyłych damoŭ byli padklučany da sistemy hazazabieśpiačeńnia.
Kiraŭnik prajektnaj hrupy Suśvietnaha banka Pieka Sałminien niadaŭna naviedaŭ rajony Biełarusi, dzie realizoŭvaŭsia prajekt.
"My bačyli pieraabstalavanyja ŭ miežach prajekta škoły i žyłyja damy, my razmaŭlali ź niepasrednymi atrymalnikami pasłuh. Tempieratura ŭ zimovy čas u pieraabstalavanaj škole pavysiłasia z 14 hradusaŭ pavodle Celsiju ŭ 2005 hodzie da 20 hradusaŭ u 2009-m. Paśla zamieny śviacilniaŭ i aśviatlalnaj aparatury bolš nie treba chvalavacca ab zališniaj nahruzcy na vočy dziaciej padčas urokaŭ", — adznačaje Sałminien.
Biełaruś stała členam Suśvietnaha banka ŭ 1992 hodzie. Ahulnaja suma pazyk, vydzielenych Suśvietnym bankam dla finansavańnia 11 prajektaŭ na terytoryi Biełarusi, składaje 719 młn. dołaraŭ. Zaraz Biełaruś atrymlivaje ad Suśvietnaha banka finansavańnie pa šaści infrastrukturnych prajektach.