«Pryvitańnie, mianie zavuć Stynh i ja suprać śmiarotnaha pakarańnia va ŭsich vypadkach — tamu što ja vieru ŭ čałaviečuju hodnaść. Tolki adna kraina ŭ Jeŭropie prymianiaje śmiarotnaje pakarańnie — Biełaruś. Čas heta źmianić. Niachaj vaš hołas pačujuć, padpišycie pietycyju suprać śmiarotnaha pakarańnia ŭ Biełarusi, i davajcie spynim heta — raz i nazaŭsiody. Dziakuj."
Stynh, viadomy va ŭsim śviecie muzyka i aktyvist, padtrymaŭ namahańni pravaabaroncaŭ u baraćbie za admienu śmiarotnaha pakarańnia ŭ Biełarusi. Stynh, jaki vystupiŭ z kancertam u Minsku ŭ minułuju niadzielu ŭ chodzie suśvietnaha turne Symphonicity, sustreŭsia z pravaabaroncami, kab padpisać pietycyju za admienu śmiarotnaha pakarańnia ŭ ramkach apošniaha etapa kampanii, jakuju pravodzić Biełaruski Chielsinkski Kamitet, arhanizacyi «Viasna» i «Mižnarodnaja Amnistyja». «Čas heta źmianić», — skazaŭ Stynh u svaim videazvarocie.
Biełaruś — apošniaja ŭ Jeŭropie kraina, u jakoj dahetul prymianiajecca śmiarotnaje pakarańnie. Andrej Žuk i Vasil Juzepčuk byli pakaranyja śmierciu ŭ sakaviku hetaha hoda. Jašče dva biełaruskich hramadzianina byli prysudžanyja da śmiarotnaha pakarańnia ŭ traŭni, ich chadajnictvy pra abskardžańnie prysudu byli adchilenyja ŭ vieraśni.
Jašče adzin śmiarotny prysud byŭ vyniesieny ŭ vieraśni. Prysudžanyja da śmiarotnaha pakarańnia atrymlivajuć kulu ŭ patylicu. Cieła nie pieradajecca svajakam, jany tolki atrymlivajuć paviedamleńnie pra toje, što prysud byŭ pryviedzieny ŭ vykanańnie. Im taksama nie paviedamlajuć pra miesca pachavańnia pakaranaha, što tolki ŭzmacniaje ich pakuty.
Aproč Stynha hetuju pietycyju padpisali viadomyja biełarusy: piśmieńniki Śviatłana Aleksijevič i Ŭładzimir Arłoŭ, muzyki Lavon Volski (NRM) i Ŭładzimir Puhač (J:Mors). Hety krok dapamoža pryciahnuć uvahu ludziej va ŭsim śviecie da śmiarotnaha pakarańnia jak da prablemy, jakaja nie viedaje nacyjanalnych miežaŭ.
