Siarhiej Ivanoŭ abviaściŭ pra namier bałatavacca praź Internet. Pieršaje intervju ŭ svaim žyćci patencyjny pretendent u kandydaty daŭ «Našaj Nivie».
NN: Čamu vy pryniali rašeńnie iści na hetyja vybary?
S.I: Ja zajaviŭ svaju pazicyju jak hramadzianin. Darečy, ja zajaviŭ pra svoj namier u błohu jašče 1 lipienia. Čym bolej takich hramadzianaŭ buduć vykazvać svaju pazicyju, naprykład, pa ekanamičnych pytańniach, tym bolej demakratyčnaje u nas budzie hramadstva. Ciapierašniaja ŭłada pierśpiektyvaŭ nie maje.
NN: U bijahrafii napisana, što vy pracavali ŭ siłavych strukturach
S.I: Paśla vučylišča ja pracavaŭ u Lidzie, u avijacyi — na inžyniernaj pasadzie. Potym mianie pieraviali va Unutranyja vojski RB. Potym pracavaŭ u departamiencie achovy.
NN: Čamu syšli?
S.I: Pavodle ŭłasnaha žadańnia. Zachacieŭ pamianiać žyćcio. Sistema jana i jość sistema. Jaki sens prasiadzieć tam da piensii, kab potym pajści achoŭnikam u kramu?
NN: Skažycie, kolki čałaviek u vašaj kamandzie siońnia?
S.I: Pakul nikoha niama. Ludzi čytajuć prahramu, cikaviacca, ale dałučacca nie śpiašajucca. U ich šok, kažuć: prahrama cikavaja, ale dzie hrošy ŭziać na ŭsio heta?
NN: Jak atrymlivajecca pryciahnuć na svoj bok ludziej?
S.I: Za lipień moj błoh u internecie pračytała 360 čałaviek. Ale voś za 20 vieraśnia [infarmacyja pra Ivanova źjaviłasia ŭ pryvatnych sacyjalnych sietkach] mianie pračytali ŭžo bolej za 500 čałaviek. Heta ŭžo pakaźnik, što narod pačynaje čytać maju prahramu.
NN: Vy razmaŭlajecie na rasijskaj movie, a ŭ prahramie jość punkty
S.I: Siabra pierakładaŭ. Jon maje vyšejšuju adukacyju, viaskovy nastaŭnik. Asoba. Jon mnie i dapamoh ź pierakładam prahramy na biełaruskuju. Ja liču, što biełaruskuju movu pavinien viedać kožny.
Toje, što mypa-rusku razmaŭlajem — heta anamalija.
Heta ja pakul tak razmaŭlaju, a kali dalej pajdu palityčnaj dziejnaściu zajmacca, to budu pastupova raźvivać svaju biełaruskuju.
NN: Jak vy aceńvajecie svaje šansy na hetych vybarach?
S.I: Łukašenka pieramoža na hetych vybarach, heta 99%.
NN: Jość niešta jašče na čym vy chacieli akcentavać uvahu ŭ svajoj prahramie?
S.I: Ja źbirajusia vykazvać pazicyi hramadzianaŭ. Maja budučaja rola jak prezidenta ŭ tym, kab pradstaŭlać intaresy hramadzianaŭ. Parłamienckaja respublika — heta prosta pryhožy łozunh. Narod pavinien pryjści da idei parłamienckaj respubliki praz stanaŭleńnie hramadzianskaj supolnaści.
Nastaśsia Šamrej.
* * *
Siarhiej Ivanoŭ naradziŭsia ŭ 1971 u Minsku. Skončyŭ SŠ № 3 (1989). Pastupiŭ u Tamboŭskaje vyšejšaje vajskovaje avijacyjnaje inžyniernaje vučylišča. U 1994 skončyŭ navučańnie pa śpiecyjalnaści radyjotechnika (radyjoinžynier), viarnuŭsia ŭ Biełaruś dla dalejšaha prachodžańnia słužby. Z 1994 pa 2004 prachodziŭ słužbu ŭ siłavych strukturach. Zvolniŭsia pa ŭłasnym žadańni. Z 2004 pracavaŭ namieśnikam dyrektara ŭ kamiercyjnaj arhanizacyi. Ličyć taki vopyt dastatkovym, kab uznačalić dziaržavu.
