Rasijcy skuplajuć u Biełarusi tannyja inšamarki 1

Na rasijska-biełaruskaj miažy vyjaviŭsia prałaz, praź jaki ŭ RF iduć tannyja aŭto.

Roźnica ŭ košcie vyražajecca ŭ šaści-, a dla darahich aŭtamabilaŭ — u siamiznačnych ličbach.

Pierad zapuskam Mytnaha sajuza rasijskija čynoŭniki nie raz zajaŭlali, što nie dapuściać ŭvozu ŭ Rasiju tannych inšamarak ź Biełarusi. Sprava ŭ tym, što myty na impart aŭtamabilaŭ u Biełarusi byli nižejšyja, čym u Rasii. Z 1 studzienia 2010 dla jurydyčnych asobaŭ jany byli padvyšanyja da ŭzroŭniu rasijskich, a dla fizičnych zastalisia na raniejšym uzroŭni.

Rasijskija dylery aścierahalisia, što fizasoby ŭviazuć u Biełaruś vialikuju kolkaść aŭtamabilaŭ dla pieraprodažu. Jany tak i zrabili:

pa dadzienych Biełstata, za pieršaje paŭhodździe 2010 hramadzianie impartavali ŭ Biełaruś 113 800 inšamarak — na 60% bolš, čym u toj ža pieryjad 2009 Ale heta było ŭličana: rasijski bok zrabiŭ ahavorku, što kali aŭtamabil budzie ŭviezieny ŭ Biełaruś fizasobaj pa nizkich mytach, pry ŭvozie ŭ Rasiju daviadziecca dapłacić roźnicu.

Adnak, pavodle lista Fiederalnaj mytnaj słužby RF ad 19 lipienia 2010 № 01–11/35237 «Ab ažyćciaŭleńni mytnych apieracyj i mytnym kantroli aŭtamabilaŭ dla asabistaha karystańnia, jakija pieramiaščajucca praz rasijska-biełaruski ci rasijska-kazachstanski ŭčastki dziaržaŭnaj miažy Rasijskaj Fiederacyi», u Rasiju možna biazmytna ŭvozić patrymanyja aŭtamabili, kali ŭ Biełaruś jany byli ŭviezienyja da 1 studzienia 2010 (i adpaviadajuć normam «Jeŭra-4»).

Novyja aŭtamabili, rastamožanyja ŭ Biełarusi jurasobaj (naprykład, aficyjnym dyleram), možna ŭvozić u Rasiju ŭvohule biez abmiežavańniaŭ — i, jak akazałasia, heta vielmi vyhadna. Sprava ŭ tym, što ŭ Biełarusi pa ŭkazie Alaksandra Łukašenki ad 24 listapada 2005 № 546 PDV u 20% naličvajecca tolki na roźnicu pamiž zakupačnaj i adpusknoj canoj aŭtamabila. A ŭ Rasii PDV u 18% naličvajecca na poŭny roźničny košt aŭtamabila.

Sami dylery ŭ vyniku płaciać dziaržavie prykładna adnolkavuju sumu (z ulikam taho, što rasijskija atrymlivajuć potym vylik), ale pakupniki addajuć biełaruskaj dziaržavie istotna mienš, čym rasijskaj,

tłumačyć kiroŭny partnior minskaha ofisa jurfirmy Magisters Dzianis Turaviec. Tak, mašyna adpusknym koštam u 10 000 dalaraŭ pry mycie ŭ 30%, dylerskaj maržy ŭ 2000 dalaraŭ i supastaŭnych padatkovych płaciažach u Rasii budzie kaštavać 17 700 dalaraŭ, a ŭ Biełarusi — 15 400, padličyŭ partnior Goltsblat BLP Uładzimir Čykin.

Roźnica ŭ PDV atrymlivajecca istotnaj, paćviardžajuć top-mieniedžary troch biełaruskich aficyjnych dyleraŭ. Čym daražejšy novy aŭtamabil, tym, naturalna, vyhadniej kuplać jaho ŭ Biełarusi.

Viedomosti

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH