Na «Biełaruśfilmie» raspačynajuć zdymki čatyrochsieryjnaj telestužki «Tałaš» pavodle apovieści Jakuba Kołasa «Dryhva». Zdymki pačnucca ŭžo hetym vieraśniem.
Hienadź Harbuk. Fota svaboda.org.
Pavał Charłančuk. Fota naviny.by.
— Pad Smalavičami ŭžo pabudavanyja dekaracyi, — kaža režysior filma Siarhiej Šulha. — Čakajem babinaha leta, kab źniać letniuju naturu. Akramia hetaha, zdymiem bal u Pružanskim pałacyku i tamsama — zimovyja bai.
Aktorski skład dla filma «Tałaš» užo vyznačany — heta zbolšaha aktory Kupałaŭskaha i Teatra imia Horkaha.
Nastaśsia Babrova zdymiecca ŭ roli Aŭhińni, a Andrej Kryviecki — u roli Makara. Akramia hetaha, zadziejničanyja takija vybitnyja aktory, jak Aŭhust Miłavanaŭ i Hienadź Aŭsiańnikaŭ.
Dzieda Tałaša budzie hrać narodny artyst Biełarusi Hienadź Harbuk. Pavodle scenaru supraćstajać jamu budzie Ściapan, jaho syhraje małady, ale ŭžo viadomy aktor Kupałaŭskaha Pavał Charłančuk.
U stužcy biełarusy buduć razmaŭlać pa-biełarusku, palaki — pa-polsku, a balšaviki, adpaviedna, — pa-rasijsku.
— Palašuckaj havorki, na jakoj razmaŭlali dzied Tałaš i jaho adnaviaskoŭcy, u stužcy, da žalu, nie budzie, — praciahvaje apovied Siarhiej Šulha. — My pryjšli da vysnovy, što stužka pavinna być zrazumiełaja bolšamu kołu hledačoŭ, tamu abrali kłasičny varyjant biełaruskaj movy, a nie jaje dyjalekt. U dadatak, ja byŭ suprać trasianki — biełaruskuju movu treba viartać.
Šulha, jaki sa zhody syna Jakuba Kołasa Michasia Kanstancinaviča napisaŭ taksama scenar, nie raskryvaje ŭsich suplotaŭ siužetu. Ale viadoma, što da scenaŭ Pieršaj suśvietnaj i Saviecka-polskaj vajny 1918—1920 h. dadaŭsia luboŭny trochkutnik, jakoha nie było ŭ kołasaŭskaj «Dryhvie». Buduć sceny z histaryčnymi postaciami, u pryvatnaści, z pravaj rukoj Piłsudskaha, kamisaram pa Biełarusi Ježy Asmałoŭskim.
Niahledziačy na zaprošanuju kaskadziorskuju hrupu i zdymki troch vialikich bajoŭ, režysior «Tałaša» ličyć, što heta budzie chutčej psichałahičnaje kino, dzie vajna prysutničaje adno jak fon, jak ciažkija abstaviny, jakija prymušajuć ludziej rabić svoj vybar.
— Asnoŭnaj temaj zrobicca biełaruskaja niezaležnaść, praha ludziej da samastojnaści, — kaža Šulha. — U stužcy Makar Bałuk, kamandzir partyzanskaha atradu, vykazvaje dumku: «Davajcie sami budziem vajavać za siabie, suprać i tych, i tych», — ale bolš razvažlivy dzied Tałaš adkazvaje: «Nie, nie zdužajem, siły ŭ nas zamała, treba vyznačacca — vybirać čyjści bok. Bo kali sami pojdziem, i tyja, i hetyja satruć nas na parašok».
Telestužku «Tałaš» pavinny skončyć u kancy maja 2011-ha. Potym jaje, chutčej za ŭsio, pakažuć pa biełaruskich kanałach. Režysior dadaje, što buduć padrychtavanyja ŭsie ŭmovy, kab u vypadku pośpiechu telefilma zrabić ź jaho paŭnakroŭny mastacki film.
