Anarchisty ŭziali na siabie adkaznaść za napad na ambasadu RF 12

U internecie źjaviłasia zajava, u jakoj adkaznaść za zdareńnie la rasiejskaj ambasady ŭ Miensku biaruć na siabie anarchisty, jakija nazyvajuć siabie čalcami supołki «Siabry Svabody».

«Hetaj akcyjaj my vykazvajem hnieŭ i pratest suprać aryštaŭ i represij u dačynieńni da sacyjalnych aktyvistaŭ, jakija paŭstali na abaronu Chimkinskaha lesu ŭ Maskvie», — havorycca ŭ zajavie.

«Śmiešna čytać vodhuki i razvahi pra akcyju na internet-forumach. Nam adnolkava brydkija ŭsie mafijozny klany pad nazvami „kiraŭniki RB“ i „kiraŭniki RF“. Prostym pracoŭnym abiedźviuch krainaŭ nia śviecić ničoha dobraha ad hetaj palityčnaj vałtuźni za ŭładu, nia varta prypadabniacca da hetych chłuślivych palitykanaŭ», — havorycca ŭ zajavie anarchistaŭ.

Ułady Maskvy mielisia budavać trasu Maskva — Sankt-Pieciarburh praź les u rajonie padmaskoŭnaha horadu Chimki. Suprać hetaha vystupili žychary horadu, jakich padtrymali roznyja hramadzkija arhanizacyi Rasiei.

U žniŭni prezydent Rasiei Dźmitry Miadźviedzieŭ zahadaŭ prypynić budaŭnictva darohu, pakul nia projduć hramadzkija abmierkavańni hetaj temy.

Videazvarot supołki «Siabry Svabody».

1 vieraśnia Alaksandar Łukašenka zajaviŭ, što nie vyklučaje datyčnaści da zdareńnia rasiejskaha boku:

«Chutčej za usio, im, napeŭna, byŭ patrebny hety incydent.

Kab pakazać: bačycie, jaki tam Łukašenka, jaki ledź nia sam zładziŭ hety terakt, jak jany sami jaho nazyvajuć. Padonki i niahodniki. Bolš ja ničoha skazać nie mahu».

Pradstaŭniki abmasady Rasiei ŭ Miensku nijak nie prakamentavali słovy kiraŭnika Biełarusi.

svaboda.org

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH