Vystava Chruckaha ŭ Połacku, Vilni i Paryžy 2

4 vieraśnia ŭ Połacku adkryjecca vystava rabot kłasika biełaruskaha žyvapisu Ivana Chruckaha, pryśviečanaja 200-hodździu z dnia jaho naradžeńnia.

Jak paviedamiŭ 26 žniŭnia na pres-kanfierencyi ŭ Minsku dyrektar Nacyjanalnaha mastackaha muzieja (NMM) Biełarusi Uładzimir Prakapcoŭ, 17 vieraśnia ekspazicyja, u jakoj pradstaŭleny 23 raboty majstra z fondaŭ NMM, pačnie demanstravacca ŭ Vilniusie ŭ ramkach Dzion biełaruskaj kultury ŭ Litvie. U ekspazicyju taksama buduć uklučanyja dva tvory majstra sa zboraŭ Nacyjanalnaha mastackaha i Nacyjanalnaha histaryčnaha muziejaŭ Litvy.

Pavodle słoŭ Prakapcova, z 22 vieraśnia pa 1 kastryčnika ŭ štab-kvatery JUNIESKA ŭ Paryžy, u zale ispanskaha mastaka Chuana Miro, budzie vystaŭlena kala 10 tvoraŭ Chruckaha, 200-hadovy jubilej jakoha ŭklučany ŭ Śpis pamiatnych dat JUNIESKA na 2010 hod. Zatym hetaja kalekcyja na praciahu miesiaca budzie demanstravacca ŭ francuzskim Łuŭry.

Prakapcoŭ nahadaŭ, što damoŭlenaść ab demanstracyi rabot Chruckaha była dasiahnuta padčas jaho vizitu ŭ Paryž u kancy 2009 hoda i sustreč z prezidentam-dyrektaram Łuŭra Anry Łuaretam, a taksama pradstaŭnikami sakrataryjatu JUNIESKA.

***

Akademik žyvapisu Ivan Chrucki (1810–1885) skončyŭ fakultet svabodnych mastactvaŭ Połackaha kalehiuma i Pieciarburhskuju akademiju mastactvaŭ. Žyŭ pad Vilniaj, zatym — u majontku Zacharničy (ciapier vioska ŭ Połackim rajonie Viciebskaj vobłaści). Pracavaŭ u žanry naciurmorta, partreta, piejzaža i interjera ŭ tradycyjach akademičnaj škoły. Raśpisvaŭ ikanastasy ŭ cerkvach i saborach Vilni i Koŭna. Jaho efiektnyja dekaratyŭnyja naciurmorty vyznačajucca raŭnavahaj kampazicyi, vyklučnym majsterstvam u pieradačy formy, koleru, abjomu i faktury pradmietaŭ. Partretnaje majsterstva mastaka raźvivałasia ad dekaratyŭnaści da vyŭjałnieńnia indyvidualnych asablivaściaŭ asoby.

0

0

0

0

0

0

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH