«Biełsat» nie vyklučaje mahčymaści pakazu «Chrosnaha Baćki» 7

Rasijski telekanał NTV pakazaŭ treciuju častku skandalnaha dakumientalnaha filma «Chrosny baćka». U Biełarusi jon byŭ dastupny tolki ŭłaśnikam spadarožnikavych antenaŭ, bo, jak i ŭ papiarednich vypadkach, na «NTV-Biełaruś» u hety čas pakazvali inšyja pieradačy. Zhodna sacyjałahičnaha daśledavańnia, zładžanaha litoŭskim ahienctvam Baltic Surveys, pra film «Chrosny baćka» viedaje kala 35% biełarusaŭ. Jaho pabačyŭ kožny siomy haradski žychar Biełarusi. Bolšaść — kala 52% — na ŭłasnyja vočy «Chrosnaha baćku» nie bačyli, a daviedalisia pra jaho ad siabroŭ abo ź internetu.

My źviarnulisia ŭ pres-słužbu biełaruskaha niezaležnaha spadarožnikavaha telekanała «Biełsat» z pytańniem, ci nie płanuje toj pakazać skandalny sieryjał abo samastojna źniać niešta padobnaje.

Film «Chrosny baćka» ahulnadastupny, tamu niama asablivych pryčynaŭ nabyvać jaho i pakazvać na «Biełsacie», patłumačyŭ pres-sakratar telekanała Siarhiej Pielesa. Choć i vyklučać takuju mahčymaść taksama nielha.

«Ciapier my zdymajem niekalki filmaŭ pra padziei ŭ najnoŭšaj historyi Biełarusi, z asablivym akcentam na čas ad apošnich vybaraŭ», — kaža pres-sakratar «Biełsata». Naprykład, film «Dzień «Č» pra Hienadzia Karpienku. Jašče try filmy na padobnuju tematyku rychtujucca da vypusku.

Siarhiej Pielesa padkreśliŭ, što sieryja filmaŭ «Chrosny baćka» jość realizacyjaj siońniašniaj palityki Rasii. «Biełsat» ža praz svaich aŭtaraŭ prapanuje biełaruski pohlad na padziei i źjavy.

«Akramia taho, u vypadku z NTV jość taki aśpiekt, jak kankurencyja, bo jon maje toje samaje pole dziejnaści, što i «Biełsat», — Biełaruś.

Ale pry hetym miž kanałami isnuje vialikaja roźnica: NTV pakazvaje «Baćku», a «Biełsat» — film pra Łarysu Hienijuš. NTV hetaha filma nie pakaža i nie zdymie, u adroźnieńnie ad «Biełsata», jaki moža i źniać, i pakazać niešta nakštałt «Chrosnaha baćki».

Siamion Piečanko

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH