Apošniaja bajavaja bryhada ŭzbrojenych siłaŭ ZŠA pakinuła Irak. 50 tysiač amierykanskich vajskoŭcaŭ zastajucca ŭ jakaści daradcaŭ irakskich nacyjanalnych sił biaśpieki.
4 tysiačy vajskoŭcaŭ 4-j bryhady «Strajkier» 2-j piachotnaj dyvizii ZŠA pačali pierachod irakska-kuviejckaj miažy ŭ rajonie KPP Chabary na śvitańni.
Maršrut vyvadu apošniaha padraździaleńnia byŭ raspracavany za miesiac, a padraździaleńni bajavych braniravanych mašyn «Strajkier» pačali padciahvacca da miažy jašče tydzień tamu. Apošniaja kałona bajavych mašyn pakinuła bazu adrazu paśla poŭnačy i pačała pavolnaje prasoŭvańnie na poŭdzień, staranna ahladajučy šašy na pradmiet prydarožnych bombaŭ.
Pa słovach aficyjnaha pradstaŭnika złučeńnia Krystafiera Ofrada, u Iraku krychu zatrymajucca niekalki sotniaŭ vajskoŭcaŭ 4-j bryhady, jakim treba vyrašyć usie administracyjnyja pytańni. Jany vyleciać z Bahdada ŭ El-Kuviejt uviečary ŭ čaćvier.
Apieracyja «Irakskaja svaboda» farmalna zavieršycca 31 žniŭnia, tamu Pientahon nie staŭ rabić aficyjnych zajavaŭ z nahody spynieńnia amierykanskimi vojskami bajavych apieracyj. Aficyjny pradstaŭnik dziarždepartamienta Filip Kroŭli abmiežavaŭsia zaŭvahaj, što praca amierykancaŭ u Iraku z hetaha času budzie ŭ bolšaj stupieni fakusavacca na vyrašeńni hramadzianskich zadač.
«My zaviaršajem vajnu, - zajaviŭ dypłamat u intervju telekanału MSNBC. - Ale my nie zakančvajem našu pracu ŭ Iraku. Pierad Irakam ŭ nas doŭhaterminovyja abaviazalnictvy».
Sałdaty, što pakidali Irak, byli zadavolenyja, śviedčać reparciory The Associated Press. «Apieracyja «Irakskaja svaboda »zakančvajecca na vašych vačach!» - kryčaŭ na placy kamandzir bryhady, pałkoŭnik Džon Norys. Pa jaho słovach, sałdaty viartajucca «jak hieroi», piša The New York Post: «Ja chaču, kab dadomu jany viartalisia z honaram u sercach».
Nie mienš zadavoleny i prezident Barak Abama, jaki vykanaŭ svajo pieradvybarčaje abiacańnie skončyć vajnu ŭ Iraku.
«U pavarotny momant vajny, kali našy vojski praciahvajuć sychodzić ź Iraku, ja spadziajusia, my ŭsie razam padziakujem im, usim vajskoŭcam i ich siemjam, za ich słužbu", -havorycca ŭ zajavie Abamy, raspaŭsiudžanaj pres-słužbaj Biełaha doma.
Jak tolki zavieršycca apieracyja «Irakskaja svaboda», Pientahon prystupić da ažyćciaŭleńnia apieracyi «Novy śvitanak».
U Iraku da kanca 2011 zastanucca 50 tysiač amierykanskich vajskoŭcaŭ. Jany atrymajuć status vajennych daradcaŭ i zojmucca padrychtoŭkaj i navučańniem irakskich nacyjanalnych sił biaśpieki.
U składzie hetych siłaŭ zastanucca dźvie bajavyja bryhady, što atrymali nazvu «bryhadaŭ dapamohi i padtrymki». U Iraku jany mohuć zastacca i daŭžej, kali hetaha paprosić irakski ŭrad.
