Zajava pamočnika prezidenta Rasii Siarhieja Prychodźki pra mahčymaje apublikavańnie stenahramy pasiedžańnia samitu ADKB, na jakim prezident Biełarusi Alaksandr Łukašenka abiacaŭ pryznać niezaležnaść Abchazii i Paŭdniovaj Asiecii, była zroblenaja pa ŭkazańni kiraŭnika rasijskaj dziaržavy Dźmitryja Miadźviedzieva. Pra heta zajaviŭ vysokapastaŭleny čynoŭnik u Kramli, kamientujučy paviedamleńni pa hetaj temie, apublikavanyja niekatorymi ŚMI.
Jon taksama padkreśliŭ, što nijakaj mižviedamasnaj kankurencyi pamiž pamočnikam prezidenta pa mižnarodnych pytańniach Siarhiejem Prychodźkam, kiraŭnikom MZS Siarhiejem Łaŭrovym i namieśnikam kiraŭnika aparata ŭrada Juryjem Ušakovym, jak pra heta pišuć tyja ž vydańni, niama.
«Jość kanstruktyŭnaja, paŭnavartasnaja praca pa zamiežnapalityčnym napramku, a zajavy ab baraćbie i kankurencyi — heta plon chvoraha ŭjaŭleńnia aŭtaraŭ hetych materyjałaŭ», — adznačyła krynica.
Raniej ŚMI, spasyłajučysia na nienazvanyja krynicy, paviedamili ab tym, što Dźmitryj Miadźviedzieŭ byŭ nibyta niezadavoleny zajavaj Prychodźki, jakuju toj, pa śćvierdžańni vydańnia, zrabiŭ z ułasnaj inicyjatyvy.
U minułuju piatnicu kiraŭnik Biełarusi zajaviŭ, što Dźmitryj Miadźviedzieŭ niedahavorvaje z nahody vykazvańniaŭ Łukašenki ab mahčymaści pryznańnia Minskam niezaležnaści Abchazii i Paŭdniovaj Asiecii.
«Ja nie chacieŭ by dyskutavać na hetuju temu, prosta rasijski kaleha niedobrasumlenna pierakručvaje peŭnyja rečy», — skazaŭ Łukašenka.
Kamientujučy hetuju zajavu biełaruskaha lidera, Siarhiej Prychodźka adznačyŭ, što «nie Alaksandru Ryhoraviču kazać tut pra niepaśladoŭnaść».
«Hetaja katehoryja dastasoŭnaja jakraz da jaho (Łukašenki)», — upeŭnieny Prychodźka.
«Što da pytańnia ab pryznańni Respublikaj Biełaruś Respubliki Paŭdniovaja Asiecija i Respubliki Abchazija, to kali budzie takoje žadańnie, my možam apublikavać tuju častku stenahramy pasiedžańnia ADKB, u jakoj jość słovy prezidenta Biełarusi na hetuju temu», — skazaŭ pamočnik prezidenta.
«Možam apublikavać i inšyja vykazvańni Alaksandra Łukašenki, jakija buduć davoli cikavyja jak biełaruskaj, tak i mižnarodnaj hramadskaści», — dadaŭ Prychodźka.
