U čaćvier 17 červienia ŭ Mižnarodnym adukacyjnym centry projdzie pieršaje pasiadžeńnie arhkamiteta «Alternatyŭnaha ŭrada dla adzinaha kandydata». Z takoj inicyjatyvaj vystupiŭ arhkamitet partyi «Biełaruskaja Chryścijanskaja demakratyja».
Admysłoŭcy buduć raspracoŭvać prahramu dla «adzinaha», prajekty reformaŭ i dzialić «partfieli» budučaha novaha ŭrada Biełarusi. Pra heta raskazaŭ adzin ź lideraŭ BCHD Vital Rymašeŭski.
«Sens hetaj sustrečy zaklučajecca ŭ tym, kab sabrać usich tych admysłoŭcaŭ, jakija jość siońnia ŭ demakratyčnym ruchu, ludziej, abaznanych u roznych śfieram palityčnaha, hramadskaha žyćcia, śfiery ekanomiki, z tym, kab jany padrychtavali prahramu dla adzinaha kandydata. Raspracavali prajekty reformaŭ. I kab hetyja ludzi damovilisia, chto ź ich budzie ŭznačalvać ministerstvy, viedamstvy ŭ vypadku, kali ŭłada ŭ Biełarusi budzie źmieniena, kali demakratyčny kandydat pieramoža».
Inicyjataraŭ stvareńnia Alternatyŭnaha ŭrada nie biantežyć toje, što pisać prahramu i dzialić partfieli pačynajuć ŭ situacyi, kali samoha adzinaha kandydata ad apazicyi na prezidenckija vybary nie isnuje.
«Stvareńnie takoha ŭradu staniecca adnym z čyńnikaŭ kansalidacyi demakratyčnych sił. I, mahčyma, padšturchnie palityčnyja partyi, ruchi i kandydataŭ, jakija jość, da supolnych dziejańniaŭ pa vyłučeńni adzinaha kandydata».
Pa słovach Rymašeŭskaha, na prapanovu ŭziać udzieł u pasiedžańni arhkamiteta Alternatyŭnaha ŭrada adhuknułasia šyrokaje koła ekanamistaŭ, palitołahaŭ, hramadskich dziejačoŭ, pradstaŭnikoŭ partyj. Atrymali zaprašeńnie i ŭsie tyja palityki, jakija zajavili pra svajo žadańnie bałatavacca na pasadu prezidenta.
