Fiestyval biełarusaŭ zamiežža płanujecca pravieści ŭ Biełarusi ŭ nastupnym hodzie.
Paviedamlaje BIEŁTA.
Upaŭnavažany pa spravach relihij i nacyjanalnaściaŭ Leanid Hulaka adznačyŭ, što pryniać udzieł u takim fiestyvali vykazali žadańnie biełaruskija abjadnańni z saraka krain.
U kancy červienia ŭ Minsku i Navahrudku projduć pasiadžeńni kansultatyŭnaj rady pa spravach biełarusaŭ zamiežža, jakoje ŭznačalvaje ministr kultury Pavieł Łatuška. Akramia pytańniaŭ ab arhanizacyi fiestyvalu
płanujecca abmierkavać prajekt zakona «Ab suajčyńnikach, jakija pražyvajuć za miažoj».
Staršynia Zhurtavańnia biełarusaŭ śvietu «Baćkaŭščyna» Alena Makoŭskaja paviedamiła, što jaje pakul nie zaprašali na pasiadžeńnie kansultatyŭnaj rady. Ale jana stanoŭča aceńvaje sproby arhanizavać fiestyval.
«Lubaja ŭvaha z boku dziaržavy da biełaruskaj dyjaspary aktualnaja».
Jana adznačaje, što prezientavać mastackija kalektyvy našych suajčyńnikaŭ z Kanady ci ZŠA ŭ Biełarusi ciažka, u adroźnieńni, naprykład, ad kalektyvaŭ z Rasii. A ŭ vypadku praviadzieńnia admysłovaha fiestyvalu takaja mahčymaść źjavicca va ŭsich.
Ideja praviadzieńnia fiestyvalu była padtrymana jašče letaś padčas V Źjezda biełarusaŭ śvietu ŭ Minsku ministram kultury Paŭłam Łatuškam. Tady ž «Baćkaŭščynaj» byŭ pryniaty zvarot ab pryniaćci zakona «Ab biełarusach zamiežža».
U kancy 2009 hoda ŭ Nacyjanalny centr zakanadaŭstva i pravavych daśledavańniach adnaviŭ pracu nad prajektam zakona (pieršaja sproba raspracavać taki dakumient rabiłasia ŭ 2001-2002 hadach).
Da kanca studzienia išoŭ praces zboru prykładaŭ padobnaha zakanadaŭstva ź inšych krain. Ciapier prymajucca zaŭvahi i prapanovy da prajekta. «Baćkaŭščyna» taksama vykazała svaje zaŭvahi. U pryvatnaści, prapanujecca źmianić nazvu prajekta zakona «Ab suajčyńnikach, jakija pražyvajuć za miažoj» na «Ab biełarusach zamiežža». Kali budzie skončana praca nad prajektam, Alena Makoŭskaja nie viedaje. Ale jana spadziajecca, što ŭžo ŭ nastupnym hodzie jon budzie razhladacca ŭ parłamiencie.
