Rasijski pradziusier Maks Fadziejeŭ asabista ničoha nie vykazvaŭ telekanału ANT nakont vystupleńnia biełarusaŭ u finale «Jeŭrabačańnia‑2010».
Pra heta 31 maja na pres‑kanfierencyi ŭ Minsku paviedamiŭ pieršy namieśnik staršyni kiraŭnictva ZAT «Druhi nacyjanalny telekanał» Siarhiej Chomič.
Nahadajem, 31 maja rasijskija i biełaruskija ŚMI raspaŭsiudzili zajavu Maksa Fadziejeva, u jakoj pradziusier paśpiašaŭsia adchryścicca ad vystupleńnia biełaruskaha hurtu «3+2» na «Jeŭrabačańni» i abvinavaciŭ telekanał ANT u padmanie.
«Toje, što ja ŭbačyŭ u efiry, vyklikała ŭ mianie ŭ šok. Muzyku dapisali, kaściumy — nievierahodnyja», — adznačaje ŭ adkrytym liście da pradstaŭnikoŭ ŚMI Fadziejeŭ. Jon taksama śćviardžaje, što paśla paŭfinału ni razu nie telefanavaŭ biełarusam.
Adnak, pavodle słoŭ Siarhieja Chomiča, jon razmaŭlaŭ z Fadziejevym paśla pieršaha paŭfinału. «Padčas razmovy Fadziejeŭ pazityŭna nastroiŭ muzykantaŭ, numar jamu spadabaŭsia, u tym liku i ideja z kryłami», — skazaŭ pieršy namieśnik staršyni kiraŭnictva ZAT «Druhi nacyjanalny telekanał».
Chomič zajaviŭ, što jamu składana kamientavać apošnija vykazvańni Fadziejeva, pakolki «jany zrobleny ŭ absalutna roznym klučy».
«Moža być, u Rasii niekalki Fadziejevych z roznymi mierkavańniami», — adznačyŭ pradstaŭnik kiraŭnictva ANT.
Na dumku Chomiča, telekanał «ni ŭ čym nie pavinien apraŭdvacca, bo z Maksam Fadziejevym nie było dahavora ab tym, što jon całkam rychtuje numar biełarusaŭ da vystupleńnia». Jon nahadaŭ, što rasijski pradziusier napisaŭ muzyku da pieśni, na jaho studyi byŭ źniaty klip, a taksama pry jaho sadziejničańni byŭ raspracavany vobraz muzykantaŭ.
Razam z tym u ANT jość usie pravy na pieśniu, na fanahramu, heta značyć telekanał maje prava rasparadžacca imi pad svaju adkaznaść, padkreśliŭ Chomič.
Pradstaŭniki Biełarusi — hurt «3+2» i šviedski pijanist Robiert Uełs — z 18 bałami zaniali pieradapošniaje, 24‑ie, miesca ŭ finale mižnarodnaha konkursu pieśni «Jeŭrabačańnie‑2010». Finał prajšoŭ u noč z 29 na 30 maja ŭ Osła (Narviehija).
Biełaruś udzielničała ŭ konkursie ŭ siomy raz. Za hety čas jaje pradstaŭnikam tolki dvojčy ŭdałosia vyjści ŭ finał. Najlepšy vynik na «Jeŭrabačańni» pakazaŭ Dźmitryj Kałdun, jaki ŭ 2007 hodzie zaniaŭ šostaje miesca.
