Intensiŭny rost uzroŭniu źniešniaha doŭhu va ŭmovach vysokaha deficytu źniešniaha handlu pavialičvaje ŭraźlivaść ekanomiki i ŭjaŭlaje značnuju ryzyku z punktu hledžańnia źniešniaj stabilnaści i płaciežazdolnaści z pryčyny značnaha rostu raschodaŭ na jaho absłuhoŭvańnie ŭ dalejšym.
Pra heta havorycca ŭ padrychtavanym Nacyjanalnym bankam analityčnym ahladzie «Finansavaja stabilnaść u Respublicy Biełaruś u 2009 hodzie».
U dakumiencie, u pryvatnaści, adznačajecca, što va ŭmovach abmiežavanych mahčymaściaŭ pryciahnieńnia kapitału pryvatnym siektaram finansavańnie ŭzrosłaha deficytu rachunku biahučych apieracyj było zabiaśpiečana pieravažna šlacham zapazyčańniaŭ orhanami dziaržkiravańnia i hrašova‑kredytnaha rehulavańnia, što pryviało da značnaha rostu sukupnaha źniešniaha doŭhu.
Deficyt rachunku biahučych apieracyj byŭ prafinansavany za košt prytoku kapitału i finansavych resursaŭ u abjomie 8,3 młrd. dalaraŭ ZŠA, što ŭ 1,9 razu vyšej, čym u 2008 hodzie.
Pry hetym 51,9% čystaha prytoku kapitału skłała pryciahnieńnie vyklučnaha finansavańnia. Pad im majecca na ŭvazie finansavańnie, što pryciahvajecca orhanami dziaržkiravańnia i hrašova‑kredytnaha rehulavańnia dla zabieśpiačeńnia pakryćcia razryvu finansavańnia, što skłałasia ŭ vyniku paharšeńnia płaciežnaha bałansu i skaračeńnia mižnarodnych reziervovych aktyvaŭ.
Pavodle źviestak Nacbanka, rost abjomaŭ pryciahnieńnia vyklučnaha finansavańnia spryjaŭ značnamu rostu źniešniaha doŭhu Respubliki Biełaruś. Na 1 studzienia 2010 hoda abjom pazykovych abaviazacielstvaŭ ekanomiki ŭ paraŭnańni z pačatkam 2009 hoda pavialičyŭsia na 45,4% i skłaŭ 22 młrd. dalaraŭ ZŠA, abo 45% hadavoha VUP.
Pry hetym udzielnaja vaha źniešniaha doŭhu orhanaŭ dziaržaŭnaha kiravańnia i hrašova‑kredytnaha rehulavańnia ŭ ahulnym abjomie źniešniaha doŭhu vyrasła na 13,3 pracentnaha punkta da 39,9%. Rost doŭhaterminovych zapazyčańniaŭ orhanami dziaržaŭnaha kiravańnia i hrašova‑kredytnaha rehulavańnia spryjaŭ rostu doli doŭhaterminovych abaviazacielstvaŭ u struktury vałavoha źniešniaha doŭhu da 55,1% suprać 45,4 pracenta na 1 studzienia 2009 hoda.
Jak paviedamlałasia raniej, aficyjnyja asoby śćviardžajuć, što surjoznych prablem z absłuhoŭvańniem dziaržaŭnaha doŭhu niama. U 2010 hodzie kraina budzie vypłačvać hałoŭnym čynam pracentnyja płaciažy. Ich Ministerstva finansaŭ taksama rasceńvaje jak kamfortnyja.
Ekśpierty Mižnarodnaha valutnaha fondu adznačajuć, što źniešni doŭh Biełarusi pa mižnarodnych standartach zastajecca nizkim, što źjaŭlajecca «vialikaj pieravahaj respubliki ŭ ciapierašnim mižnarodnym ekanamičnym asiarodździ».
