29 maja ŭ «Siličach» prajšoŭ rok-fiestyval «Palana».
Heta byŭ samy masavy open air na terytoryi Biełarusi za apošni čas. Fiestyval sabraŭ niekalki tysiač čałaviek. Mahčymaść placoŭki dazvalali ŭmiaścić bolš ludziej. Ale i tak niakiepska, kali ŭličyć, što za ŭvachod treba było zapłacić 40-60 tysiač rubloŭ dy i transpart abyšoŭsia ŭ 5000. Letaś na biaspłatny «Rok za babroŭ» taksama ŭ «Siličach» ludziej pryjechała nie bolš. Chacia takuju
masavaść «Palany» možna rastłumačyć tym, što vystupaŭ «Lapis Trubiacki».
Minuŭ hod, jak hurt nie hraŭ solnych kancertaŭ u Minsku. Tamu jaho prychilniki źjechalisia z usioj krainy, niahledziačy navat na niadaŭni tur pa haradach Biełarusi.
Adkryvaŭ fest hurt Unia. Litaralna tydzień tamu kamanda vystupiła ŭ Minsku na «Dudarskim feście». Letaś na telekanale STB udzielničała ŭ muzyčnaj prahramie «Zorny rynh», dzie pa vynikach hałasavańnia hledačoŭ pieramahła «Vierasy». Udzieł u «Palanie» moža adkryć dla maładych ludziej novyja pierśpiektyvy.
«Paru rublej» hrali ruskamoŭny ska. Ich užo paśpieli achryścić biełaruskim «Leninhradam», ale biez maciukoŭ. Kali b za imi vychodziŭ Šnuraŭ sa svajoj byłoj kamandaj, to vialikaj roźnicy słuchačy nie adčuli b. U abodvuch muzykaŭ navat vakał padobny.
Biezumoŭna, cikavaść da festu vyklikaŭ i ŭdzieł u im «Rubla» Siarhieja Šnurava.
Nie ŭsie z prysutnych paprostu ŭjaŭlali, što ciapier ihraje Šnur. Ale byli i tyja, chto, paśpieŭšy paznajomicca ź jaho novym repiertuaram, navat padpiavali. Pierad festam aptymisty kazali, što muzyka źmianiŭsia. Maŭlaŭ, piša prystojnyja teksty. Kudy tam!
Nivodnaja jaho pieśnia nie abyšłasia biez maciukoŭ.
«Lapis Trubiacki» adyhraŭ dźvie hadziny. Pamiž pieśniami Siarhiej Michałok čytaŭ vieršy, u tym liku pa-biełarusku. Ale, vidać, vieršy pisać na rodnaj movie składaniej, čym pieśni. Tamu i było ich tolki dva. Pryčym adzin z tvoraŭ («Chto ty hetki?») jon pračytaŭ ź Janki Kupały. Novych piesień hurt nie vykonvaŭ. Ale praśpiavaŭ «Belarus Freedom», jakuju ŭ Biełarusi na kancertach «Lapisaŭ» pačuješ niačasta.
Praz tydzień, 5 červienia, u «Siličach» užo projdzie «Rok za babroŭ». «Bieź Bileta», «Hradusy, «Vopli Vidaplasava» i maładyja kamandy vystupiać na adnoj scenie.
