Tolki dźvie viadomyja asoby admovilisia pastavić podpisy za pierajmienavańnie vulicy Uljanaŭskaj u Minsku ŭ vulicu Vasila Bykava. Heta Mikałaj Čarhiniec i Aleh Trusaŭ. Pra heta na pres‑kanfierencyi ŭ Minsku paviedamili aktyvisty kampanii «Havary praŭdu».
Pa ich słovach, kiraŭnik aficyjnaha Sajuzu piśmieńnikaŭ Čarhiniec patłumačyŭ svaju pazicyju tym, što peŭny čas tamu ŭžo źviarnuŭsia z padobnaj inicyjatyvaj da ŭładaŭ i čakaje adkazu. Što tyčycca Trusava, to jon, maŭlaŭ, svaju admovu nie abhruntavaŭ.
U intervju staršynia TBM zajaviŭ, što jahonym podpisam inicyjatary nie cikavilisia:
«Da mianie źviarnuŭsia pradstaŭnik hetaj hrupy, kab TBM dapamahała im podpisy źbirać za hetuju vulicu. Mnie piersanalna padpisvacca nichto nie prapanoŭvaŭ, a chacieli, kab TBM pracavała na hetuju nieviadomuju mnie kampaniju.
Na što ja adkazaŭ, što ja na ruskamoŭnyja ci rasijskija kampanii nie pracavaŭ i pracavać nie budu. Tamu što paštoŭki ŭsie zroblenyja pa‑rasijsku, nadrukavanyja ŭ Smalensku… I naohuł, za hetymi kampanijami stajać niezrazumiełyja mnie ludzi».
Trusaŭ zajaviŭ, što jon nie suprać źjaŭleńnia vulicy Bykava ŭ Minsku, ale heta musić być nie Ŭljanaŭskaja, jakuju prapanujuć inicyjatary. Na dumku kiraŭnika TBM, najlepš było b źviarnucca da ŭładaŭ z prapanovaj nadać imia Bykava novaj vulicy.
«Ja nie razumieju, čamu mienavita Ŭljanaŭskaja! Što, tam Bykaŭ žyŭ? Nie, jon tam nie žyŭ — jon žyŭ na vulicy Tankavaj. Nu tady davajcie vulicu Tankavuju, jakuju potym zrabili imia Maksima Tanka, padzielim papałam. Pałova budzie Maksima Tanka, a tam, dzie žyŭ Bykaŭ (a ja byŭ nie raz u jaho doma), nazvać vulicaj Bykava. Ja nie razumieju, čamu Ŭljanaŭskaja…»
