U sieradu pry kancy dnia zakončyŭsia dopyt Teresy Sobal — byłoj kiraŭnicy Domu polskaha ŭ Iviancy. U Vałožynskim RAUS śledčy Šulha paviedamiŭ joj, što kryminalnaja sprava suprać jaje pavodle artykułu 210 ab złoŭžyvańni słužbovym stanoviščam praciahvajecca. Adzinaje, što źmieniena kvalifikacyja — z častki druhoj (ździajśnieńnie hrupaj asobaŭ) na častku pieršuju.
Pra heta paviedamiŭ adzin z kiraŭnikoŭ niezarehistravanaha Sajuzu palakaŭ Andrej Pačobut. Źmiena artykułu aznačaje, što śledztva ličyć: złoŭžyvańnie zroblena Teresaj Sobal adnaasobna, skazaŭ jon. Nahadajem, što spadarynia Sobal aktyŭna padtrymlivała Sajuz palakaŭ na čale z Anžalikaj Borys, jaki nie pryznajecca ŭładami. Praz heta suprać jaje raspačali kryminalnuju spravu, paźniej milicyjanty zaniali ivianiecki Dom polski, Teresu Sobal dy inšych aktyvistaŭ prymusam vyvieli ź jaho, a budynak apiačatali. Zatym vałožynski sud pryniaŭ rašeńnie, sutnaść jakoha ŭ tym, što Teresa Sobal nia moža bolš znachodzicca ŭ Domie polskim.
Što datyčyć kryminalnaj spravy, jaje źmiest u tym, što Teresie Sobal kiraŭnictva SPB, jakoje znachodzicca ŭ Horadni, pry kancy 2004 hodu — razam ź inšymi kiraŭnikami damoŭ polskich — vydała pa vynikach pracy hrašovuju dapamohu. Heta śledztva ličyć złoŭžyvańniem słužbovym stanoviščam.
