Kamientar Ministerstva abarony pra źmieščanaje ŭ Siecivie videa pralotu nad Minskam čaćviorki Su-24 nie sucišyŭ žarści na avijaforumach. NN źviarnułasia pa tłumačeńni da lotčyka I kłasa, pałkoŭnika vajennaj avijacyi ŭ zapasie Juryja Panamarenki. Juryj Michajłavič praanalizavaŭ čatyry videaroliki, zroblenyja z roznych kropak:
«Ja jašče ŭ žyćci za 25 hod kalandarnych lotnaj praktyki takoha strašnaha vypadku nie bačyŭ», — reziumavaŭ prahlad pałkoŭnik zapasu. Jon vyznačyŭ
niekalki klučavych momantaŭ na videa: samaloty lacieli zanadta nizka, uličvajučy, što ich maršrut pralahaŭ nad žyłym masivam i natoŭpam hledačoŭ, heta była praźmierna ryzykoŭna i nieabhruntavana.Niebiaśpiečnym na dumku pałkoŭnika było i toje, što kurs čaćviorki Su-24 pierasieksia z kursam hrupy Ł-39.
«Heta była supieravaryjnaja situacyja. Mahli zahinuć tysiačy čałaviek».Pa nazirańniach Juryja Panamarenki, dziejańni piłota Su-24, jaki na videa adkałoŭsia ad hrupy, vyhladali niaŭpeŭnienymi. Pałkoŭnik zapasu vykazaŭ dumku, što źjaŭleńnie na maršrucie «sušak» hrupy Ł-39 mahčyma było niečakanaściu dla piłotaŭ bambavikoŭ, tamu ich šycht i rassypaŭsia. Na pytańnie, što adčuvaje piłot u takija momanty, jon adkazaŭ, što piłot vostra adčuvaje niebiaśpieku, ale nie viedaje, što rabić, bo luboje dziejańnie moža tolki ŭskładnić spravu. «Mnie padajecca, što tut jany nie sutyknulisia na avoś, cudam nie sutyknulisia».
Pałkoŭnik zapasu raskazaŭ pra hrupavyja paloty. Hrupavaja źlotanaść — nadzvyčaj składany elemient, pry vykanańni jakoha vielmi važna trymać tak zvanuju karobačku.
«Samalot nie pryznaje ni čynoŭ, ni ranhaŭ, ni łampasaŭ. Hetamu vučać u lotnych vučelniach»,— kaža lotčyk. Jon pryhadaŭ apošnija avijakatastrofy ŭ Rasii, u jakich hinuli piłoty najvyšejšaha kłasa, a taksama trahiedyju na avijašou ŭ Lvovie ŭ 2002 hodzie. Juryj Michajłavič miarkuje, što ŭdzieł u paradzie vajennaj avijacyi z uzroŭniem padrychtoŭki, prademanstravanym 9 maja 2010 hodu, rana ci pozna moža pryvieści da trahiedyi.
***
Jury Michajłavič Panamarenka, 72 hady. Naradziŭsia ŭ Baškiryi. Skončyŭ lotnuju vučelniu ŭ Čarnihavie, Vajenna-pavietranuju akademiju imia Haharyna ŭ Maskoŭskaj vobłaści. Byŭ načalnikam štabu pałka supraćpavietranaj abarony ŭ Mačuliščach, pieršym namieśnikam kamandzira častki, staršym inśpiektaram SPA Abjadnanych uzbrojenych siłaŭ Varšaŭskaj damovy. Lotčyk I kłasa, pałkoŭnik zapasu. Lotnaja praktyka — 25 kalandarnych hod. Lataŭ na Su-9, MiH-25.
Frantavy bambavalnik Su-24.
Su-24 — frantavy bambavalnik, pryznačany dla naniasieńnia rakietna-bombavych udaraŭ u prostych i składanych mieteaŭmovach, udzień i ŭnačy, u tym liku na małych vyšyniach z prycelnym paražeńniem naziemnych i nadvodnych celaŭ. Pieršy palot — 1970 h., pastupiŭ na ŭzbrajeńnie — 1975 h.
Su-24 ličycca dastatkova składanaj dla piłatavańnia mašynaj i maje vysoki ŭzrovień avaryjnaści. Tolki ŭ časie lotnych vyprabavańniaŭ było stračana 14 Su-24 i Su-24M. Paśla pryniaćcia samalota na ŭzbrajeńnie štohod adbyvałasia 5-6 avaryj i katastrof. U 1998 h. byŭ pryznany najbolš avaryjnym latalnym aparatam rasijskaj vajennaj avijacyi.
