Bolš za pałovu deputataŭ miascovych savietaŭ abranyja paŭtorna, paviedamiŭ sakratar Centrvybarkama Mikałaj Łazavik.
Pavodle jaho słoŭ, usiaho było abrana 21.288 deputataŭ, ź ich 11.186 źjaŭlajucca deputatami minułaha sklikańnia, 9.695 — žančyny, 1.097 — hramadzianie va ŭzroście da 30 hadoŭ, 301 — pradstaŭniki palityčnych partyj.
Najbolšaje partyjnaje pradstaŭnictva ŭ miascovych savietach budzie mieć Kamunistyčnaja partyja Biełarusi — 262 deputaty. Deputatami abranyja 28 pradstaŭnikoŭ Biełaruskaj ahrarnaj partyi, šeść — Respublikanskaj partyi pracy i spraviadlivaści, dva — Biełaruskaj sacyjalna‑spartyŭnaj partyi, pa adnym — Libieralna‑demakratyčnaj party i Biełaruskaj partyi levych «Spraviadlivy śviet».
2.832 deputaty miascovych savietaŭ pracujuć u śfiery pramysłovaści, handlu, transpartu, 5.668 — u sielskaj haspadarcy, 3.594 — adukacyi,
1.993 — achovie zdaroŭja i śfiery sacyjalnaj abarony. 804 deputaty źjaŭlajucca vajennymi abo supracoŭnikami pravaachoŭnych orhanaŭ, 2.732 — dziaržaŭnymi słužačymi, 399 — biespracoŭnymi.
Łazavik padkreśliŭ, što hetyja źviestki, u tym liku adnosna partyjnaha pradstaŭnictva, nie kančatkovyja i buduć karektavacca.
Sakratar Centrvybarkama zaznačyŭ, što rezkich vahańniaŭ u sacyjalnym i palityčnym składzie miascovych savietaŭ nie adbyłosia. «Nasielnictva akazvała davier tym ludziam, jakich jany dobra viedajuć», — skazaŭ jon.
Łazavik paviedamiŭ, što «najbolš vostryja batalii» byli «na ŭzroŭni sielskich savietaŭ». «Navat u akruhach, dzie bałatavaŭsia adzin kandydat i vybary adbylisia, vybarščyki mahli hałasavać suprać jaho abrańnia. Takich akruhaŭ bolš jak dziesiać», — skazaŭ jon.
