Pradstaŭniki Biełarusi na «Eŭravizii‑2010» hurt «3+2» zapisali biełaruskamoŭnuju pieśniu «Anioły» i pradstaŭlajuć jaje ŭ novym tury na «Tuzinie Hitoŭ». Z nahody prezentacyi ŭdzielniki hurta raspaviali našamu partału, čamu jany niaśmieła śpiavajuć pa‑biełarusku, jak aceńvajuć svaje šancy ŭ budučym konkursie i ci źbirajucca praciahvać svoj udzieł u prajekcie ŭ vypadku parazy.
Prajekt paŭstaŭ sioleta i byŭ stvorany dla ŭdziełu ŭ telešoŭ «Muzykalnyj sud». Hurt składajecca ź laŭreataŭ konkursu «Novyja hałasy Biełarusi», jakija ciapier źjaŭlajucca salistami prezydenckaha arkiestru Biełarusi. Pieršapačatkovaj ich vizytoŭkaj była pieśnia «Far Away». Mierkavałasia, što ź joj hurt i voźmie ŭdzieł u «Eŭravizii‑2010», što projdzie 25—29 traŭnia 2010 hodu ŭ Osła. Ale vyjšła inakš. «Hetaja pieśnia niakiepskaja, ale nia nadta ŭłaścivaja dla našych vykanaŭcaŭ, bo jany majuć klasyčnuju adukacyju. Tamu «Far Away« nia nadta pasavała dla ich», — tłumačyć dyrektar «3+2» Kaciaryna Vaščanka. Tym nia mienš, było vyrašana zapisać biełaruskamoŭnuju versiju «Far Away», što atrymała nazvu «Anioły».
Udzielniki hurtu raspaviadajuć, što na bližejšym svaim vystupie ŭ Safii źbirajucca vykanać mienavita «Aniołaŭ», pieśniu pa‑biełarusku paprasiŭ zaśpiavać prymajučy bok. Što da ich staŭleńnia da biełaruskamoŭnaści, to ŭ hetym pytańni adčuvajucca ŭ muzykaŭ razhublenaść. Jany navat nie razhladali takoha varyjantu — pradstaŭlać Biełaruś na «Eŭravizii‑2010» ź pieśniaj pa‑biełarusku. Pieśniu dla konkursu, što zaviecca «Butterflies» dla ich napisaŭ rasiejski pradusar Maks Fadziejeŭ.
«Z Maksam u nas dobryja adnosiny i prapanavanaja im kampazycyja nam całkam padyjšła, — kaža Kaciaryna Vaščanka. — A voś pra toje, kab na «Eŭravizii» śpiavać pa‑biełarusku nia dumali. Peŭna nie chapaje ŭ nas śmiełaści ŭ hetym pytańni, zrešty jak i ŭ šmat kaho z ajčynnych vykanaŭcaŭ. Usie viedajuć, što ź biełaruskaj movaj treba siabravać, a vychodzić tak, što nie siabrujem. Upeŭnienaści niama». Pry hetym «3+2» kažuć, što nieadnarazova sutykalisia z tym, što ichniuju movu nazyvajuć Belarusian English, ale heta ich nia kryŭdzić.
Alena i Ninel Karpovič, Julija Šyško, Arciom Michalenka i Jehijazar Farašan uśviedamlajuć, što šancaŭ na pieramohu ŭ konkursie ŭ ich niašmat, zatoje bačać tut stanoŭčyja momanty: «Na nas nia ciśnie imia, my novyja ludzi i my zrobim usio zaležnaje ad nas, kab hodna pradstavić krainu. Adzinaje čaho by chaciełasia, kab nas nie hanili zahadzia, a padtrymali ŭsie nieabyjakavyja biełarusy. I vypravili nas u Osła ź luboŭju». Jany ćvierdziać, što prajekt «3+2» — nieadnarazovy i jany źbirajucca isnavać i dalej, u niezaležnaści ad vyniku ŭ Osła. Śviedčańniem tamu — šerah zaprašeńniaŭ z kancertami, jakija adbuducca paśla eŭrapiejskaha konkursu.
3+2 — Anioły (muzyka — Leanid Šyryn, Jury Vaščuk, anhielski tekst — Hiera, pierakład na biełaruskuju — Viktar Šnip).
