Z 10 pa 13 krasavika ŭjezd na terytoryju zon radyjeaktyŭnaha zabrudžańnia dla naviedvańnia mohiłak budzie ažyćciaŭlacca biez propuskaŭ. Hetaja štohadovaja praktyka źviazana z dniom paminańnia spačyłych — Radaŭnicaj.
Jak paviedamiŭ hałoŭny śpiecyjalist Administracyi zon adsialeńnia i adčužeńnia Alaksandr Piarško, u zhadanyja dni mohiłki buduć adkrytyja dla naviedvańnia da 17 hadzin. Pry ŭjeździe na terytoryju zon na kantrolna‑prapusknych punktach naviedvalniki pavinny zarehistravacca, tamu nieabchodna mieć paśviedčańnie asoby. Techničnyja pašparty mašyn buduć zastavacca na KPP da viartańnia ŭładalnikaŭ aŭtamabilaŭ z zony.
U žurnale rehistracyi budzie fiksavacca kolkaść prybyŭšych i vybyŭšych hramadzian. Na KPP ludzi buduć instruktavacca pa praviłach pažarnaj i radyjacyjnaj biaśpieki. «Im zabaroniena budzie adchilacca ad zhadanaha maršrutu, raskładać vohnišča», — skazaŭ Piarško. U jakaści prykładu jon pryvioŭ letašni vypadak, kali paśla znachodžańnia na mohiłkach u Vietkaŭskim rajonie ludzi pajechali, pakinuŭšy tam vohnišča, jakoje stała pryčynaj vialikaha pažaru, było źniščana amal 100 ha raślinnaści.
Sioleta na ŭsich mohiłkach budzie arhanizavana dziažurstva supracoŭnikaŭ MNS, milicyi i administracyi zon, jakija buduć sačyć za vykanańniem paradku, pažarnaj i radyjacyjnaj biaśpieki.
Pavodle słoŭ Piarško, na terytoryi Homielskaj vobłaści ŭ adsielenych vioskach znachodziacca bolš jak 140 mohiłak. U vobłaści na hety čas dziejničajuć 4 KPP — try ŭ Čačerskim rajonie i adzin — u Dobrušskim. Na terytoryi Paleskaha zapaviednika dziejničajuć svaje KPP, jakija zakryvajuć dostup dla niesankcyjanavanaha praniknieńnia hramadzian. Raspracavany 26 maršrutaŭ aŭtapatrulavańnia.
U suviazi sa źmianieńniem pravavoha statusu niekatorych terytoryj u zonie, z častki zabrudžanych radyjenuklidami terytoryj źniaty kantrolna‑prapuskny režym u Vietkaŭskim i Chojnickim rajonach. Razhladajecca pytańnie ab źniaćci kantrolna‑prapusknoha režymu na častcy terytoryj Karmianskaha i Buda‑Kašaloŭskaha rajonaŭ. «Takim čynam, terytoryja, jakaja znachodzicca pad kantrolem administracyi zon, krychu zvužajecca», — zaznačyŭ Piarško.
