Asoba adzinaha kandydata ad apazicyi na vybarach prezidenta pavinna być pryvabnaj dla bolšaści. Pra heta zajaviŭ uviečary 2 krasavika ŭ Minsku na sustrečy z pradstaŭnikami hramadzianskaj inicyjatyvy «Rada biełaruskaj intelihiencyi» paet i hramadski dziejač, inicyjatar hramadzianskaj kampanii «Kažy praŭdu!» Uładzimir Niaklajeŭ.
Pavodle jaho słoŭ, kampanija «Kažy praŭdu!» skiravana na abudžeńnie naroda da aktyŭnaha žyćcia. «I nam nieabchodna rabić imiony, za jakimi pojduć ludzi. Było imia Paźniak, i išli za im ludzi, pajechaŭ Paźniak — i šmat z hetym imiem, a nie tolki sam palityk. I kali niama aŭtarytetu za čałaviekam, jaki štości žadaje zrabić, ličy spravu pravalnaj», — skazaŭ Niaklajeŭ.
Praviadzieńnie kampanii «Kažy praŭdu!» paet matyvavaŭ «niesupadzieńniem realnaha žyćcia z tym, što nam kažuć». I na hety padman, pavodle jaho słoŭ, ludzi vastrej za ŭsio reahujuć. Siarod najvažniejšych prablem žyćcia biełaruskaha hramadstva ludzi nazyvajuć ekanamičnyja i sacyjalnyja, u tym liku: małyja zarobki, vialikija ceny, niedastupnaść žylla i niaŭpeŭnienaść u zaŭtrašnim dni.
Fiłosaf i hramadski dziejač Taćciana Proćka miarkuje, što treba dumać ab tym, jak pieramahčy ŭ krainie, u jakoj niama spraviadlivych vybaraŭ. A rolu intelihiencyi jana bačyć u zachavańni ahulnačałaviečych ideałaŭ i norm, jakija nieabchodna pieradać novym pakaleńniam. Proćka pierakananaja, što intelihiencyja pavinna ŭpłyvać na palityčnyja rašeńni i dapamahać pretendentam na ŭładu farmulavać svajo palityčnaje kreda.
Fiłosaf i hramadski dziejač Hienadź Hrušavoj zajaviŭ, što ludzi pavinny pačuć i zrazumieć praŭdu, a zatym asensavać, ad kaho idzie niebiaśpieka i chto adkazvaje za toje, što adbyvajecca ŭ hramadstvie. I dla ludziej vielmi važna najaŭnaść centra, dzie havorać na movie naroda, dzie možna pačuć praŭdu i atrymać realnuju dapamohu pa lubym aktualnym pytańni. Pavodle jaho słoŭ, hramadstva pavinna ŭbačyć i pavieryć u siłu, jakaja abaraniaje intaresy ludziej. Hrušavoj padtrymaŭ ideju vyłučeńnia adzinaha kandydata ad demakratyčnych sił na prezidenckich vybarach.
Staršynia rady piedahoh i kinarežysior Uładzimir Kołas paviedamiŭ, što pradstaŭniki hramadzianskaj inicyjatyvy pačali kansultacyi ź liderami demakratyčnych sił dla vyznačeńnia pracedury vyłučeńnia adzinaha kandydata.
