U Biełarusi ŭ najbližejšyja miesiacy budzie stvorana Nacyjanalnaje ahienctva inviestycyj i pryvatyzacyi. Pra heta havorycca ŭ liście ab namierach, jaki prem'jer-ministr Siarhiej Sidorski i kiraŭnik Nacyjanalnaha banka Piotr Prakapovič nakiravali 15 sakavika kiraŭnictvu Mižnarodnaha valutnaha fondu.
«Z metaj skaračeńnia ŭmiašańnia dziaržavy ŭ ekanomiku i pryciahnieńnia pramych zamiežnych inviestycyj my aktyvizujem praces pryvatyzacyi. Urad zrobić zachady, kab zabiaśpiečyć pryniaćcie prajekta zakona ab pryvatyzacyi da 1 lipienia 2010 hoda paśla ŭklučeńnia kančatkovych kamientaryjaŭ Suśvietnaha banka», — havorycca ŭ liście.
Sidorski i Prakapovič paviedamlajuć kiraŭnictvu MVF ab praviadzieńni pracy nad prajektam ukaza prezidenta ab stvareńni Nacyjanalnaha ahienctva inviestycyj i pryvatyzacyi (NAIP). Prajekt praduhledžvaje, što NAIP budzie składacca z dvuch samastojnych strukturnych padraździaleńniaŭ, jakija buduć adkazvać za sadziejańnie inviestycyjam i za pryvatyzacyju.
«My zabiaśpiečym adpaviednaść hetaha novaha ahienctva najlepšaj suśvietnaj praktycy za košt uklučeńnia ŭ prajekt ukaza kamientaryjaŭ Suśvietnaha banka da zaviaršeńnia pracy nad im. Urad prymie ŭsie nieabchodnyja miery, kab zabiaśpiečyć zaćviardžeńnie ŭkaza ab stvareńni NAIP da kanca krasavika 2010 hoda. Dziaržaŭnaja rehistracyja ahienctva budzie praviedziena da 1 červienia 2010 hoda», — adznačajecca ŭ liście.
Kiraŭniki ŭrada i Nacbanka paviedamlajuć pra sfarmiravany pieralik pradpryjemstvaŭ sa składu pradpryjemstvaŭ, zaćvierdžanych płanam pryvatyzacyi na 2008–2010 hady (strukturny kantrolny pakazčyk).
«Pavodle ŭzhadnieńnia z Suśvietnym bankam my dapracujem śpis ź piaci pradpryjemstvaŭ, vybranych dla pryvatyzacyi, da siaredziny sakavika pamieścim abjavu dla zaprašeńnia kvalifikavanych i spraktykavanych kansultantaŭ z dobraj reputacyjaj, jakija dapamohuć nam u pryvatyzacyi kantrolnych pakietaŭ akcyj hetych pradpryjemstvaŭ, i da kanca krasavika 2010 hoda padrychtujem pieralik z 20 pradpryjemstvaŭ sa składu pradpryjemstvaŭ, zaćvierdžanych płanam pryvatyzacyi na 2008–2010 hady, i prymiem usie nieabchodnyja miery, kab zabiaśpiečyć atrymańnie da kanca červienia 2010 hoda zhody prezidenta na pryvatyzacyju ich kantrolnych pakietaŭ akcyj», — padkreślivajecca ŭ liście ab namierach.
