Da 1 lipienia 2010 hoda ŭ Biełarusi ŭmovy ŭvozu lehkavych aŭtamabilaŭ fizičnymi asobami nie źmieniacca. Pra heta paviedamiŭ namieśnik staršyni Dziaržaŭnaha mytnaha kamiteta Biełarusi Siarhiej Barysiuk.
Ciapier idzie praces padrychtoŭki mižuradavaha pahadnieńnia pamiž Biełaruśsiu, Rasijaj i Kazachstanam ab uvozie aŭtamabilaŭ fizičnymi asobami na terytoryju Mytnaha sajuza. «Jość peŭnyja pazicyi, peŭny ŭzrovień ustupak, jakija na siońniašni dzień uzhodnieny na adpaviednym uzroŭni. I hetaha prytrymlivajucca ekśpierty Dziaržaŭnaha mytnaha kamiteta», — adznačyŭ namieśnik staršyni DMK.
Ale na siońniašni dzień pakul składana prahnazavać, čym skončycca hety pierahavorny praces.
Ekśpierty ž DMK aryjentavany na dalejšaje zachavańnie dziejučych u krainie stavak mytnych pošlin dla fizičnych asob, skazaŭ Siarhiej Barysiuk.
***
Nahadajem, što z 1 studzienia 2010 hoda ŭ Biełarusi pavyšany staŭki ŭvaznych mytnych pošlin na ŭvoz aŭtamabilaŭ jurydyčnymi asobami. Pošliny dla jurydyčnych asob pavyšany da rasijskaha ŭzroŭniu. Heta praduhledžana padpisanym u Minsku 27 listapada 2009 hoda Adzinym mytnym taryfam u ramkach stvoranaha Mytnaha sajuza Biełarusi, Rasii i Kazachstana. Dla fizičnych asob u Mytnym sajuzie pakul nie vyznačany novyja praviły ŭvozu tavaraŭ, jany buduć vypracoŭvacca da 1 lipienia 2010 hoda.
Akramia taho, 25 lutaha 2010 hoda ŭstupiła ŭ siłu padpisanaje Pahadnieńnie pamiž uradami Biełarusi i Rasijskaj Fiederacyi ab časovym uvozie i vyvazie transpartnych srodkaŭ. Takim čynam, aŭtamabili, zarehistravanyja ŭ Respublicy Biełaruś abo Rasijskaj Fiederacyi, svabodna pieramiaščajucca praź biełaruska‑rasijskuju hranicu biez najaŭnaści jakich‑niebudź mytnych dakumientaŭ.
U toj ža čas kantrol za časovym uvozam transpartnych srodkaŭ, zarehistravanych u zamiežnych dziaržavach, ažyćciaŭlajecca na źniešniaj hranicy Mytnaha sajuza.
