Tolki prodaž «Biełtranshazu» ŭtrymaŭ zołatavalutnyja reziervy ŭ lutym

Mižnarodnyja reziervovyja aktyvy (zołatavalutnyja reziervy) Biełarusi, raźličanyja pa mietodycy MVF, skaracilisia za studzień-luty 2010 hoda na 75,4 młn. dołaraŭ ZŠA, abo na 1,3%, da 5 młrd. 577,1 młn. dołaraŭ. Pry hetym za luty jany pavialičylisia na 303,9 młn. dołaraŭ (5,8%).

Jak patłumačyli ŭ Nacyjanalnym banku,

rost zołatavalutnych reziervaŭ u lutym staŭ mahčymy dziakujučy pastupleńniu 625 młn. dołaraŭ za prodaž čarhovaha pakieta 12,5% akcyj AAT «Biełtranshaz».

Takim čynam, biez uliku apošniaha płaciažu ad «Hazproma», u vyniku jakoha jon staŭ uładalnikam 50% akcyj «Biełtranshazu», abjom reziervaŭ byŭ by mienšym na 321 młn. dołaraŭ.

Vata adznačyć, što za studzień hetaha hoda zołatavalutnyja reziervy Biełarusi skaracilisia amal na 380 młn. dołaraŭ,

abo na 6,7%, da 5 młrd. 273 młn. dołaraŭ ZŠA.

U 2010 hodzie zołatavalutnyja reziervy pavinny pavialičycca na 0,5–1,83 młrd. dołaraŭ. Heta praduhledžana Asnoŭnymi kirunkami hrašova-kredytnaj palityki Biełarusi na hety hod.

Adnak staršynia praŭleńnia Nacbanka Piotr Prakapovič zajaŭlaje ab nieabchodnaści paskareńnia tempaŭ rostu zołatavalutnych reziervaŭ Biełarusi. Na jaho dumku, da kanca 2010 hoda zołatavalutnyja reziervy nieabchodna pavialičyć praktyčna ŭdvaja ŭ paraŭnańni ź ich ciapierašnim abjomam. «Nieabchodna imknucca da taho, kab da kanca hetaha hoda jany dasiahnuli nie mienš čym 10 młrd. dołaraŭ ZŠA», — zajaviŭ Prakapovič u svaim dakładzie.

Jak paviedamlaŭ BiełaPAN, dziakujučy źniešnim pazykam i kredytam letaś Biełarusi ŭdałosia naraścić zołatavalutnyja reziervy bolš čym na 2,5 młrd. dołaraŭ — da 5 młrd. 652,5 młn. dołaraŭ na 1 studzienia 2010 hoda. Pry hetym varta ŭličvać, što za ŭvieś 2009 hod zapazyčańni ŭrada i Nacbanka Biełarusi na źniešnich rynkach, a taksama inšyja pastupleńni, zaličanyja ŭ skład zołatavalutnych reziervaŭ, skłali ŭdvaja bolš — zvyš 5,5 młrd. dołaraŭ.

Zhodna ź mietodykaj MVF, mižnarodnyja reziervy Respubliki Biełaruś vyznačajucca jak vysokalikvidnyja zamiežnyja aktyvy, jakija składajucca z manietarnaha zołata, śpiecyjalnych pravoŭ zapazyčańnia Biełarusi ŭ MVF, reziervovaj pazicyi krainy ŭ MVF i valutnych reziervaŭ. Jany mohuć być apieratyŭna vykarystany dla interviencyj na valutnych rynkach dla stabilizacyi kursu nacyjanalnaj valuty, finansavańnia ŭradam impartu tavaraŭ i pasłuh, raźlikaŭ pa pahašeńni i absłuhoŭvańni dziaržaŭnaha źniešniaha doŭhu, a taksama na inšyja mety.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH