Michaś Filipovič, Bitva na Niamizie, 1922
3 sakavika 1067 hodu pamiž vojskami Jarasłavičaŭ – Iziasłava Kijeŭskaha, Śviatasłava Čarnihaŭskaha i Usievałada Pierajasłaŭskaha, i vojskam Usiasłava Połackaha adbyłasia znakamitaja bitva na Niamizie.
Usiasłaŭ ad pačatku svajho ŭładarstva byŭ u sajuzie z Kijevam. U 1060-m hodzie ŭdzielničaŭ u pieramožnym ahulnaruskim pachodzie suprać torkaŭ. Ale zimoj 1065-1066 hadoŭ, ź nieviadomych pryčyn, napaŭ i trymaŭ u abłozie Pskoŭ, raźbiŭ naŭharodskaha kniazia Mścisłava Iziasłaviča, jaki išoŭ na dapamohu Pskovu i razrabavaŭ Noŭharad. Takija kroki połackaha kniazia nie mahli zadavolić kniazioŭ Jarasłavičaŭ. Iziasłaŭ Kijeŭski, Śviatasłaŭ Čarnihaŭski i Usievaład Pierajasłaŭski ŭ adkaz zimoj 1067 ha hodu pajšli suprać Usiasłava. Vynikam pachodu byŭ spaleny i razrabavany Miensk. Mienavita z hetaj nahody budučaja stalica Biełarusi ŭpieršyniu zhadvajecca ŭ letapisach.
Usiasłaŭ vyjšaŭ na dapamohu Miensku, ale nie paśpieŭ. Vojski syšlisia na bierahach raki Niamihi. Połacki kniaź pieršym pajšoŭ suprać Jarasłavičaŭ. Pavodle kijeŭskaha letapisca, Usiasłaŭ byŭ raźbity Jarasłavičami i źbieh da Połacka. Adnak vojski pieramožcaŭ taksama adstupili, što daje padstavu sumniavaca ŭ abjektyŭnaści kijeŭskaj krynicy.
Bitva na Niamizie jaskrava apisanaja ŭ Słovie pra pachod Iharavy i źjaŭlajecca adnoj z bujniejšych i najbolš kryvavych mižusobnych bitvaŭ epochi Kijeŭskaj Rusi.
HIstaryčnyja krynicy, što apisvajuć dalejšyja padziei, supiarečać adna adnoj. Pavodle kijeŭskaha letapisca, Usiasłaŭ byŭ raźbity i źbieh u Połacak. Bolš ab im ničoha nie paviedamlajecca. Pavodle rasijskaha historyka V.Taciščava, jaki, nibyta, karystaŭsia Połackim letapisam , Jarasłavičy nie pieraśledvali Usiasłava, a zaniali paŭdniovuju častku Połackaj ziamli, čym prymusili połackaha kniazia prasić miru. Pavodle kijeŭskaha letapisca, nie Usiasłaŭ prasiŭ miru, a Jarasłavičy praz 4 miesiacy paśla bitvy paklikali jaho na pieramovy i całavali kryž, kab zaśviedčyć jaho biaśpieku, ale parušyli svajo abiacańnie – schapili razam z dvuma synami, advieźli ŭ Kijeŭ i pasadzili ŭ viaźnicu. Praź niekatory čas žychary Kijeva padniali paŭstańnie, vyzvalili Ŭsiasłava i zrabili jaho Kijeŭskim kniaziem.
