15 lutaha ŭ minskim kinateatry «Pijanier» prajšoŭ prahlad filma Andreja Kudzinienki «Akupacyja. Misteryi». Stužka znachodziłasia pad zabaronaj u Biełarusi šeść hadoŭ.
Pakaz «Akupacyi» vyklikaŭ ažyjataž u «Pijaniery».
Andrej Kudzinienka vyhladaŭ na premjery pa-svojsku.
Pytańnie zadaje piśmieńnik Erniest Jałuhin.
Prahlad adbyŭsia dziakujučy padtrymcy zavoda BIEŁPI.
«Kali my atabarylisia ŭ hetym kinateatry, to pačali pakazvać kino novaje, kino, jakoje nidzie ŭ Minsku dy i va ŭsioj Biełarusi nielha ŭbačyć na vialikim ekranie», — skazaŭ pierad pačatkam sieansu kinakrytyk Anton Sidarenka.
Ale heta pakul nie aznačaje viartańnie filma ŭ šyroki prakat. Adzinkavy pakaz adbyŭsia ŭ miežach pracy kłuba «Formuła kino», jakim kiruje sp. Sidarenka. Dziakujučy jamu ŭ zale prysutničali režysior Andrej Kudzinienka, akciory Luboŭ Rumiancava, Alaksandr Kołbyšaŭ.
Vialikaj rekłamy staralisia nie rabić. Film prysutničaŭ daloka nie va ŭsich internet-afišach. Arhaniziatary prahladu, vidać, pierastachoŭvalisia. Ale zała «Pijaniera» była poŭnaj. Moładź i ludzi starejšaha pakaleńnia, studenty i kinošniki, prychilniki biełaruskaha kino i jaho krytyki. Usim adnolkava chaciełasia ŭbačyć stužku na vialikim ekranie, choć mnohija ŭžo i paśpieli jaje pahladzieć na kamputarach.
Pazbaŭleńnie filma licenzii na prakat nie pryviało da zabarony jaho prahladu ŭ Internecie ci na pirackich dyskach.
Śmiech i navat apładysmienty ŭ hledačoŭ vyklikali rasiejskija subcitry, kali chtości z hierojaŭ pramaŭlaŭ pa-biełarusku. Bo nazirałasia niesupadzieńnie pierakładu z tym, što kazaŭ piersanaž.
«My vyrašyli zrabić biełaruskuju brutalnaj takoj movaj, a rasiejskuju —litaraturnaj»,
— patłumačyŭ A. Kudzinienka.
Paśla sieansu adbyłosia abmierkavańnie «Akupacyi. Misteryi».
«My nie budziem spyniacca na pryčynach, pa jakich film nie byŭ pakazany ŭ Biełarusi ŭ 2004 hodzie. Ja prapanuju skancentravacca na tvorčych pytańniach», — sprabavaŭ paźbiehnuć niepryjemnaściej Anton Sidarenka. Ale hetaje pytańnie i pytańnie falšu ŭ dziaržaŭnaj kinaindustryi byli hałoŭnymi.
Na režysiora nichto nie najazdžaŭ. Vykazvalisia pryčepki bolš da toj situacyi, da tych ramak, u jakich znachodziacca stvaralniki stužki. Chtości sprabavaŭ zakranuć moŭnaje pytańnie. «Heta nie tolki razmaŭlać pa-biełarusku i zdymać kino pa biełaruskich aŭtarach. Alaksandr Kačan (aŭtar scenaru «Akupacyi. Misteryi» — K.M.) taksama biełaruski aŭtar. Pahladzicie što vakoł vas znachodzicca. Na jakoj movie razmaŭlajuć», — apraŭdvaŭsia režysior.
Andrej Kudzinienka nie vyklučyŭ mahčymaści pakazu filma ŭ inšych haradach krainy. «Na šyroki prakat film nie raźličany. U nas i kinateatraŭ mała. Ale i ich prakat zapoŭnieny amierykanskaj pradukcyjaj. Možna heta zrabić u jakaści kłubnych pakazaŭ, tvorčych sustreč. Treba padumać».
