Ale ŭ sud padać «Warner Bros.» nie moža, bo kanał STV padkantrolny ŭradu.
Na sieryjał «Tearetyki», jaki zdymajecca biełarusami i vychodzić na kanale STV, źviarnuli ŭvahu nie tolki suajčyńniki, ale i amierykanskija pradusary. Historyja pačynaje raźvivacca ŭ mini‑skandał, ale jak zajaviŭ stvaralnik aryhinała «Tearetykaŭ» Čak Łore, abaranić aŭtarskija pravy ŭ Biełarusi niemahčyma, bo telekanał padkantrolnyja ŭradu.
Naprykancy minułaha hodu na biełaruskim telekanale STV startavaŭ kamiedyjny sieryjał «Tearetyki». Biełarusy, jakija ŭžo pahladzieli amierykanski sieryjał «Teoryja vialikaha vybuchu» («The Big Bang Theory») adrazu ž zaŭvažyli padabienstva pamiž sieryjałami. Miž tym, pradusary biełaruskaha prajektu ani słova nie skazali pra toje, što nabyvali pravy na sieryjał u amierykancaŭ. Mała taho, režysior sieryjała Siarhiej Tałybaŭ u intervju biełaruskim ŚMI zaznačaŭ, što sieryjał nie zdymaŭsia pavodle «Teoryi vialikaha vybuchu».
Amierykanski varyjant stužki raspaviadaje pra čatyroch supracoŭnikaŭ Kalifarnijskaha instytuta technałohii i ich siabroŭku‑aficyjantku, jakaja maryć stać aktorkaj. Chłopcy — fanaty «Zornych vojnaŭ», komiksaŭ pra Čałavieka‑pavuka i vintažnych videahulniaŭ — hienii ad navuki, ale biezdapamožnyja ŭ bytu. Na praciahu ŭsiaho sieryjału raźvivajecca linija ŭzajemaadnosinaŭ batanika Leanarda i viasiołaj aficyjantki Peńni. Biełaruski sieryjał utrymlivaje tych ža hierojaŭ (tolki z našymi imionami) i biełaruskija realii. Maładyja navukoŭcy žyvuć u internacie ŭ miastečku, dzie rychtujucca zapuścić čarhovy błok atamnaj elektrastancyi.
Učora The New York Times paviedamiła, što Čak Łore, pradusar amierykanskaha sieryjału,
u svaim błohu napisaŭ pra biełaruskich «Tearetykaŭ». Jon źviarnuŭ uvahu, što sieryjał całkam skapijavany ź jahonaha.
«Kali my paviedamili pra heta jurydyčnamu adździełu «Warner Brothers», nam adkazali, što padać u sud za parušeńnie aŭtarskich pravoŭ u Biełarusi amal niemahčyma, bo televizijnaja kampanija, jakaja vypuskaje hetuju kopiju, naležyć i kirujecca ŭradam Biełarusi», —napisaŭ Čak Łore.
Jon taksama pažartavaŭ, što pakolki inšaha vyjścia niama, biełarusy, jakija zdymajuć «Tearetykaŭ», moža być, pačytajuć jahonyja słovy, adčujuć vinu i dašluć jamu paru fietravych kapielušoŭ.
