Biełaruski abaronca Rusłan Salej vyviedzieny sa śpisu traŭmavanych «Kałarada». Nie vyklučana, što jon voźmie ŭdzieł u adnym z najbližejšych matčaŭ rehularnaha čempijanatu Nacyjanalnaj chakiejnaj lihi.
Svoj nastupny matč «Kałarada» doma praviadzie suprać «Atłanty» 10 lutaha. Da pierapynku, źviazanaha z Alimpijskimi hulniami ŭ Vankuviery, «Eviełanš» treba zhulać jašče dva matčy: 12 lutaha «Kałarada» doma budzie zmahacca z «Finiksam», a 13 lutaha na vyjeździe sustreniecca z «Łos‑Andželesam».
Nahadajem, Rusłan Salej ŭ pačatku śniežnia pieranios apieracyju — jaho niepakoili boli ŭ śpinie.
U hetym siezonie jon pravioŭ u składzie «Kałarada» ŭsiaho adzin matč — 8 kastryčnika suprać «Nešviła». Da treniroŭki na lodzie 35‑hadovy abaronca prystupiŭ 23 studzienia.
Zrešty, kazać pra viartańnie biełarusa ŭ kamandu pakul zaŭčasna.
Vyšturchnuć kahości z abaroncaŭ asnoŭnaha składu «Kałarada» paśla praciahłaha pierapynku Rusłanu budzie niaprosta: kłub vystupaje paśpiachova, i linija abarony «Eviełanš» vielmi tryvałaja. Tym bolš što, pavodle infarmacyi vydańnia Denver Post, razam z Rusłanam sa śpisu traŭmavanych vyviedzieny jašče adzin abaronca Džon‑Majkł Łajłz.
Adznačym taksama, što pavodle rašeńnia hałoŭnaha treniera zbornaj Biełarusi Michaiła Zacharava
Rusłan Salej stanie kapitanam našaj družyny na Alimpijadzie ŭ Vankuviery.
Pytańnie ŭdziełu abaroncy u Alimpijadzie nie vyrašanaje kančatkova, adnak, pa słovach treniera, vierahodnaść taho, što Rusłan vystupić u Vankuviery, składaje 99%.