Ihar «Janki» Jankoŭ. Skryn videa: Raminaeshakzai / YouTube
Bajec Biełaruskaha dobraachvotnickaha korpusa Ihar «Janki» Jankoŭ u pieršym paśla doŭhaha pierapynku intervju jutub-kanału Ramina svaju adsutnaść u miedyjnaj prastory patłumačyŭ tym, što «vykonvaŭ pastaŭlenyja ad kamandzira zadačy»: «my byli na peŭnym siektary raboty, dzie znachodzilisia biez mahčymaści niekudy pajechać».
Biełarus uvachodzić u skład śpiecatrada śpiecyjalnaha pryznačeńnia «Parahon» Hałoŭnaha ŭpraŭleńnia raźviedki Ministerstva abarony Ukrainy, jaki vykonvaje bajavyja zadačy jak na ziamli, tak i na vadzie i ŭ pavietry.
Siarod apošnich zadač — heta zabieśpiačeńnie «darohi žyćcia» pad Aŭdziejeŭkaj. «Nas źniali na zadaču pa karotkim paviedamleńni za paru hadzin, i my pajechali vykonvać». Ale padrabiaznaści apieracyi bajec admoviŭsia raskazać:
«U hetym i chavajecca adkaz na pytańnie, čamu ja pierastaŭ źjaŭlacca ŭ miedyjnaj prastory. Adzin z faktaraŭ heta toje, što my vykonvajem śpiecyjalnyja zadačy. I vorah nie pavinien viedać, dzie my ich vykonvajem i što my robim».
Jak źmianiŭsia za hady vajny
Pa słovach «Janki», za dva hady poŭnamaštabnaj vajny jon «staŭ bolš naziralnikam», staŭ mienš reahavać na niejkija kamientary, mienš źjaŭlacca ŭ sacyjalnych sietkach. Bajec śćviardžaje, što syšoŭ z telehrama i instahrama i jamu «ŭsio roŭna na kolkaść padpisčykaŭ i niejki pijar».
Paźniej u razmovie «Janki» dadaŭ, što na jaho pavodziny akazała ŭpłyŭ «ahulnaja vajennaja daroha»: «Kali ŭ pačatku zdavałasia, heta byŭ niejki varušniak «viesieła, zadorna», to, kali ty prachodziš dalej, upłyvaje stomlenaść, strata siabroŭ».
Čym ciapier zajmajecca «Janki»
Bajec raskazaŭ, što jon pa-raniejšamu zastajecca kulamiotčykam, ale byvajuć zadačy, kali jon biare zvyčajny aŭtamat.
«U mianie na adnoj z zadač była traŭma. Ja išoŭ z kulamiotam. Tam była niaprostaja miascovaść. Ja padviarnuŭ kalena. My ŭsio roŭna pajšli na hetu zadaču. Viarnulisia. I, skažam tak, užo pa zdaroŭi mnie ciažka chadzić z kulamiotam».
Pieryjadyčna paśla vykanańnia bajavych zadač «Janki», jak i inšyja bajcy jaho padraździaleńnia, na niepraciahły čas viartajucca na adpačynak.
«Ciapier, kali pryjazdžaješ u takija vialikija harady, jak Kijeŭ, to bačyš, jak cyvilnaje nasielnictva stavicca da vajennych. Idzieš pa tych ža vulicach. Heta nie toje staŭleńnie, što było paŭtara hoda nazad. <…>
Ja b chacieŭ, kab vajennyja z cyvilnymi byli jak niejkaje adzinaje cełaje. Kab razumieli adzin adnaho. Zrazumieła, što cyvilnyja žyvuć niejkaje zvyčajnaje žyćcio. Ale my razumiejem, čym dalej my idziom, my bolš bačym, što ŭsie, hruba havoračy, zabivajuć niejki chier».
Kab adčuć heta, Janki prapanuje prajścisia pa Kijevie, pahladzieć na atmaśfieru kala viadomaha bara «Pjanaja višnia» niedaloka ad majdana Niezaležnaści, praanalizavać, nakolki źmianiłasia ahulnaja statystyka dapamohi armii.
«Ludzi ciapier stali bolš razvažać, hladzieć u internet-resursach na palitykaŭ. Va ŭsich padymajecca mierkavańnie, što «voś pahladzicie tam palityki, a za što ja budu vajavać?» I voś hetyja ŭsie rečy ŭpłyvajuć na vajskoŭcaŭ. Jany hladziać na cyvilnych, jakija tak havorać, i adbyvajecca kanflikt», — tłumačyć Janki.
Pra kantakty «Janki» ź Biełaruśsiu
«Janki» śćviardžaje, što nie kamunikuje z rodnymi, jakija zastalisia ŭ Biełarusi. Niadaŭna jon daviedaŭsia, što pamierła prababula, jakaja zajmałasia jaho vychavańniem.
«Ja daviedaŭsia, što dziaržava Biełaruś vystaviła kvateru, u jakoj žyła babula, na aŭkcyjon z žyvoj babulaj na prodaž. Ja mahu tolki skazać, što kali-niebudź staniecca, i vy za ŭsio adkažacie».
Što ź jaho ŭłasnaj kvateraj, jakaja zastałasia ŭ Biełarusi, bajec ničoha nie viedaje.
«Janki» pra biełarusaŭ
Na pytańnie, pra toje, što ciapier ź biełaruskaj apazicyjaj, «Janki» adkazaŭ: «Jaje niama». Pa jaho słovach, kali z pačatku vajny apazicyja sprabavała «vychodzić na dobraachvotnyja padraździaleńni», to ciapier «jany prosta zamaŭčali».
Čamu «Janki» spyniŭ kantakty z «Bieśśmiarotnym»
«Janki» patłumačyŭ pryčynu razryvu kantaktaŭ ź biełarusam Andrejem Tracieŭskim («Bieśśmiarotnym») asabistymi pryčynami: «Heta asabistaje. My ŭsie darosłyja ludzi. Prosta pierastali kamunikavać. I nichto nie pavinien u heta ŭłazić».
Čytajcie taksama:
U hučnaj apieracyi na terytoryi Rasii, mahčyma, udzielničaŭ biełaruski dobraachvotnik «Janki»
> Dumać, heta nie pra Janki
https://d16gbq1owzocfa.cloudfront.net/34134