Damjen Hiero. Skryn ź videa: YouTube
Jak paviedamlałasia, 13 krasavika nieviadomy mužčyna napaŭ z nažom na naviedvalnikaŭ handlovaha centra, raźmieščanaha niepadalok ad plaža Bondzi ŭ aŭstralijskim Sidnei. Paźniej źjavilisia kadry, jak nieviadomy mužčyna ź mietaličnaj płastykavaju stojkaju ŭ rukach pieraharadziŭ šlach złačyncu na eskałatary handlovaha centra.
Niekatoryja ŚMI paśpieli, nie biez prapahandysckich metaŭ, nazvać jaho ruskim ci ŭkraincam. Paźniej vyśvietliłasia, što hety śmieły čałaviek — francuz Damjen Hiero (Damien Guerot). Jak mužčyna raskazaŭ žurnalistam, u momant padziej jon razam z kaleham pa pracy i siabram Silas Despro (Silas Despreaux) kiravaŭsia ŭ spartzału, raźmieščanuju ŭ handlovym centry Westfield.
U niejki momant jany ŭbačyli złačyncu Džoeła Kaŭčy (Joel Cauchi), jaki bieh da ich, i vyrašyli pasprabavać jaho spynić. Hiero schapiŭ stojku aharodžy i zaharadziŭ Kaŭčy darohu. Toj sumieŭsia i zdaŭ nazad.
«U jaho byli pustyja vočy, adsutny pohlad», — skazaŭ francuz pra złačyncu. Damjen i Silas pasprabavali kinuć u zabojcu mietaličnuju tumbu, ale nie papali. Tady francuz schapiŭ kresła kinuŭsia za Kaŭčy na nižni pavierch. Tam złačyncu i zastreliła supracoŭnica palicyi.
Jak paviedamlałasia, u vyniku napadu zahinuła 6 čałaviek i 12 było paraniena. Paźniej stała viadoma, što napadnik byŭ psichična chvory.
Damjenu Hiero 31 hod. U Aŭstralii jon znachodziŭsia pa pracoŭnaj vizie, termin dziejańnia jakoj skančajecca ŭ lipieni.
Hieraičny ŭčynak mužčyny byŭ acenieny ŭładami Aŭstralii. U piatnicu, 19 krasavika, francuz paviedamiŭ, što ŭ vyklučnym paradku atrymaŭ hramadzianstva krainy.
«U mianie skančałasia viza, ja vielmi rady atrymać aŭstralijskaje hramadzianstva. Ale heta krychu dziŭnaje pačućcio, tamu što, niahledziačy ni na što, u mnohich ludziej hora. Tamu ščaścia nie adčuvaješ»,
— skazaŭ francuz padčas šou C l'hebdo na kanale France 5.
Čytajcie taksama:
Napad na handlovy centr u Sidnei. Šeść čałaviek zahinuli, sotni evakujavali
Zabojca, jaki zarezaŭ šeść čałaviek u handlovym centry Sidneja, śpiecyjalna abiraŭ žančyn
