Rasijski kompleks, jaki Tehieran kuplaŭ śpiecyjalna dla abarony ad pavietranych napadaŭ, akazaŭsia nieefiektyŭny, skazali vysokapastaŭlenyja krynicy ź liku amierykanskich vajskoŭcaŭ žurnalistcy Fox News Dženifier Hryfin, piša «Ahienctva».
Izrail atakavaŭ Iran ranicaj u piatnicu. Spadarožnikavyja zdymki ź miesca ŭdaru pa avijabazie ŭ Isfachanie praanalizavali žurnalisty The New York Times. Na fota vidać, što Izrailu ŭdałosia paškodzić radyjołakacyjnuju stancyju, jakuju kompleks S-300 vykarystoŭvaje dla adsočvańnia celaŭ. Heta, jak adznačaje hazieta, najvažniejšaja častka sistemy SPA.
Dla napadu vykarystoŭvalisia rakiety i bieśpiłotniki, jakija byli nakiravanyja śpiecyjalna na sistemu SPA, raspaviali Hryfin krynicy. «Heta było pasłańnie irancam: «My možam daciahnucca da vas». Rasiejskija sistemy SPA akazalisia nieefiektyŭnymi», — piša jana sa spasyłkaj na surazmoŭcaŭ.
Tehieran kuplaŭ sistemy S-300, kab praduchilać udary Izraila, ZŠA ci krain Piersidskaha zaliva pa celach u Iranie, havorycca na sajcie prajektu «Rakietnaja pahroza» amierykanskaha Centra stratehičnych i mižnarodnych daśledavańniaŭ.
Sistemy S-300 byli razhornuty ŭ Iranie ŭ 2019 hodzie. Iran vykarystoŭvaje ich dla abarony ŭ tym liku jadziernych abjektaŭ. Takija abjekty jość i pobač z bazaj u Isfachanie, pa jakoj byŭ naniesieny ŭdar.
Paśla pastaŭki S-300 Tehieran prajaŭlaje cikavaść da pakupki bolš sučasnych sistem S-400. Niekatoryja madyfikacyi hetych sistem zdolnyja źbivać stełs-źniščalniki. U 2023 hodzie iranskaja delehacyja ŭ Rasii navat naviedała ekskursiju pa zavodzie, jaki vyrablaje S-400, pisała The Washington Post.
U apošnija hady, u tym liku i z-za vajny va Ukrainie, Rasija hublaje svaju dolu na suśvietnym rynku ŭzbrajeńniaŭ. Za 2019-2023 hady ekspart zbroi z krainy ŭpaŭ na 53% u paraŭnańni z 2014-2018 hadami, vynikaje z dakłada Stakholmskaha mižnarodnaha instytuta daśledavańnia prablem miru (SIPRI).
Da 2023 Rasija apuściłasia na treciaje miesca ŭ suśvietnym rejtynhu eksparcioraŭ, prapuściŭšy napierad Francyju.
Čytajcie taksama:
Izrail nanios udar u adkaz pa Iranie. Ścipły
Izrail rychtuje adkaz na iranskuju ataku. Piać mahčymych scenaryjaŭ dziejańniaŭ u adkaz
