Uručeńnie ŭznaharody Siarhieju Dziaviatych.Fota: kcna.kp
Zhodna z paviedamleńniem, vučonaja stupień doktara hramadska-palityčnych navuk KNDR nadadzienaja zahadčyku kafiedry Viciebskaj dziaržaŭnaj vieterynarnaj akademii Biełarusi.
«Jon rastłumačyŭ i dakazaŭ słušnaść i vydatnaść samabytnych idej i palityki našaj krainy, zasnavanych na tradycyjach revalucyjnaj adukacyi, jakija stvaryŭ vialiki pravadyr tavaryš Kim Ir Sen», — havorycca ŭ aficyjnym paviedamleńni.
Cyrymonija nadańnia zvańnia adbyłasia 15 krasavika ŭ Mansudeskim pałacy źjezdaŭ. U joj uziali ŭdzieł namieśnik premjer-ministra KNDR Čon Syn Huk, namieśnik staršyni Karejskaha tavarystva dziejačaŭ hramadskich navuk Pak Čchol Čžun, kiraŭničyja rabotniki Dziaržaŭnaj atestacyjnaj kamisii i Karejskaha tavarystva dziejačaŭ hramadskich navuk, čalcy delehacyi arhanizacyj vyvučeńnia idej čučche (miascovaj ideałohii) z roznych krain.
Siarhiej Dziaviatych razam sa studentam schilajecca pierad partretami Kim Ir Sena i Kim Čen Ira ŭ ambasadzie KNDR u Miensku. 7 vieraśnia 2023 h. Fota: vsavm.by
Imia navukoŭca ŭ paviedamleńnie nie nazyvajecca, ale na sajcie Viciebskaj dziaržaŭnaj vieterynarnaj akademii pad hetaje apisańnie padychodzić Siarhiej Dziaviatych, zahadčyk kafiedry sacyjalna-humanitarnych dyscyplinaŭ i ahrabiznesu. Naprykład, u 2017 hodzie jon ładziŭ u akademii vystavu «Paŭnočnaja Kareja: dalokaja i blizkaja», a letaś razam sa studentam fakulteta vieterynarnaj miedycyny naviedvaŭ dypłamatyčny pryjom u ambasadzie KNDR u Minsku.
Zhodna z aficyjnaj bijahrafijaj, Dziaviatych u 1989 hodzie skončyŭ zaainžynierny fakultet Viciebskaha vieterynarnaha instytuta (ciapier akademija), u 2000 hodzie — fiłałahičny fakultet Viciebskaha dziaržaŭnaha ŭniviersiteta pavodle śpiecyjalnaści «nastaŭnik rasiejskaj movy i litaratury», u 2018 hodzie — Mižnarodny ŭniviersitet MIPSA pavodle śpiecyjalnaści «pravavoje rehulavańnie zamiežnaekanamičnaj dziejnaści»; mahistr pravaznaŭstva.
Siarhiej Dziaviatych na vystavie «Paŭnočnaja Kareja: dalokaja i blizkaja». 27 kastryčnika 2017 hoda. Fota: vsavm.by
Jon čalec Rasijskaha psichałahičnaha tavarystva i Rasijskaha hieahrafičnaha tavarystva, z 2017 hoda — hanarovy čalec Sajuza žurnalistaŭ KNDR.
16 krasavika ŭ Pchieńjan prybyŭ namieśnik ministra zamiežnych spraŭ Biełarusi Jaŭhien Šastakoŭ. Biełaruskija dziaržaŭnyja miedyi nie paviedamlali pra heta, ale pra vizit raskazała CTAK.
Čytajcie taksama:
Kim Čen Yn zaklikaŭ «jak nikoli» rychtavacca da vajny i vyvučyŭ makiet Sieuła
Kim Čen Yn asabista prateściravaŭ tank na vučeńniach armii KNDR
