Arciom Rusaŭ straciŭ VNŽ u Turcyi. Fota: @rusau.qalife
«Dali 10 dzion na toje, kab źjechać»
Arciom amal dva hady pražyŭ u tureckim horadzie Kušadasy, pracavaŭ na siabie i na fizičnych asob, nie ŭ najmie.
Kaža, što vielmi pryzvyčaiŭsia da krainy. Da krasavika 2024 hoda ŭ jaho nie było prablem z dakumientami: tak zvany turystyčny VNŽ pa daručalnictvie (z rekamiendacyjaj miascovaha turka) jamu praciahvali try razy zapar — adzin raz na hod i dva — na paŭhoda.
«U hety raz my padali zajavu na padaŭžeńnie jak zvyčajna, za tydzień da skančeńnia VNŽ. Dakumienty ŭziali, my apłacili pošlinu (60 dalaraŭ za jaje + 30 dalaraŭ strachoŭka). Zvyčajna ŭ našym horadzie hety byŭ znak, što ŭsio pavinna być dobra. Adnak praz tydzień nas paprasili pryjści ŭ miascovuju mihracyjnuju słužbu, aznajomili z admovaj, viarnuli hrošy i dali 10 dzion na toje, kab vyjechać».
Pa słovach surazmoŭcy, u mihracyjnaj słužbie im skazali, što admaŭlajuć usim pa turystyčnym VNŽ, chto pieršy raz afarmlaŭ dakumient paźniej za luty-sakavik 2022-ha.
«U samich papierach napisana, što my nie adpaviadajem patrabavańniam zakona 6458 (Zakon ab zamiežnikach i mižnarodnaj abaronie — NN), ale jakim kankretna — u dakumiencie nie zhadvajecca. Treba razumieć, što ŭ krainie isnuje takoje paniaćcie jak «turecki random». Šmat jakija momanty zakanadaŭstva traktujucca orhanami kiravańnia haradoŭ i pravincyj pa-roznamu».
U mihracyjnaj słužby Arciomu paviedamili, što paśla admovy jon maje prava padavacca na VNŽ znoŭ praz try miesiacy.
«Možna sprabavać atrymlivać studencki ci pracoŭny VNŽ, ale jany patrabujuć abaviazkovaj vizy pierad hetym, jakuju treba atrymać u inšaj krainie», — kamientuje Arciom.
Surazmoŭca kaža, što ŭ jaho horadzie — «sucelnyja admovy» pa padobnych pryčynach. Prablema zakranuła biełarusaŭ i ŭ inšych haradach.
«Naša Niva» źviazałasia ź jašče dvuma biełarusami, jakija apynulisia ŭ padobnaj situacyi ŭ Turcyi. Farmuloŭka admovy ŭ praciahu VNŽ — takaja ž, jak u Arcioma.
«Ja viedaju, što niechta sprabuje pierapadacca ŭ inšych haradach. Niechta padaje apielacyju, čakaje sudoŭ, ale heta nie moj varyjant: treba ruchacca dalej».
Na dumku Arcioma, takija niespraviadlivyja rašeńni majuć palityčnaje adcieńnie:
«U Turcyi ciapier kryzis. I toj ža rost cenaŭ na arendu, naprykład, sprabujuć paviesić na zamiežnikaŭ, ale nie na varjackuju inflacyju».
My źviarnulisia pa kamientar u mihracyjnyja tureckija orhany i arhanizacyi, jakija dapamahajuć zamiežnikam ź lehalizacyjaj.
«Z sakavika 2022 hoda dla turystyčnaha VNŽ patrebna bolš dokazaŭ»
U Kansultacyjnym centry dla zamiežnych hramadzian (Foreign Citizens Advice Centre) nam raskazali, što z sakavika 2022 hoda tyja, chto padaje zajaŭku na atrymańnie dazvołu na žycharstva na padstavie turyzmu, pavinny padavać bolš dokazaŭ svajoj turystyčnaj dziejnaści — naprykład, kvitki na samalot i broń haścinic.
«Hetyja praviły raspaŭsiudžvajucca na ŭsich, i nijakija kankretnyja nacyjanalnaści tut nie vydzialajucca. U hetym vypadku admova na VNŽ aznačaje, što zajaŭnik nie adpaviadaje patrabavańniam da kankretnaha dazvołu na žycharstva», — raskazali ŭ arhanizacyi, nie adkazaŭšy, čamu raniej hety samy čałaviek z takim ža pakietam dakumientaŭ VNŽ atrymlivaŭ, a ciapier jamu admovili. «Zamiežnik moža padać apielacyju na rašeńnie pa admovie, ale nie moža zastavacca ŭ Turcyi, pakul apielacyja razhladajecca».
U Kansultacyjnym centry taksama adznačyli, što ŭ Turcyi isnujuć i inšyja šlachi atrymańnia VNŽ: «Čałaviek moža kupić nieruchomaść, abo atrymlivać dziaržaŭnuju piensiju, abo inviestavać u Turcyju, a taksama skarystacca niekatorymi inšymi mahčymaściami, uklučajučy padaču zajavy na atrymańnie dazvołu na pracu».
Z hetaha śpisu apošniaja opcyja tearetyčna mahła pasavać Arciomu, ale jon znoŭ padkreślivaje: «Prablema ŭ tym, što toj ža pracoŭny VNŽ robicca praz pracoŭnuju vizu ŭ inšaj krainie, a ŭ Biełaruś viartacca ja nie płanuju dla hetaha pa zrazumiełych pryčynach. A pracy dla ajcišnikaŭ u samoj Turcyi niama, asabliva dla zamiežnych».
Taksama niadaŭna stała viadoma, što Turcyja zapuściła svaju prahramu viz dla «ličbavych kačeŭnikaŭ». Z abaviazkovych patrabavańniaŭ: paćvierdžańnie addalenaj pracy i štomiesiačny zarobak ad troch tysiač dalaraŭ ZŠA.
«Dumaju, ruchacca ŭ bok ES ci ZŠA»
Arcioma zasmučaje stanovišča biełarusaŭ u siońniašnim śviecie: «My i nie ruskija, i nie ŭkraincy. Šmat jakija prahramy padtrymki dla nas niedastupnyja (u krainach Azii — tym bolš), a niechta ličyć nas pamahatymi teroru. U Turcyi, naprykład, šmat chto nas nie ŭsprymaje jak asobnuju krainu, a pa zmoŭčańni ličyć Rasijaj.
U sakaviku 2022-ha mianie nie puścili ŭ Polšču z Ukrainy, skazaŭšy, što ja mahu viartacca ŭ Biełaruś, tam vajny niama. Paźniej ja chacieŭ atrymać vizu pa prahramie PBH, ale jak tolki pačaŭ prapracoŭvać pytańnie, jaje začynili.
Ciapier ja pajechaŭ u Hruziju. Ale razumieju, što heta nie kraina dla PMŽ, a časovaje schovišča. Dumaju ruchacca ŭ bok ES ci ZŠA ŭ budučyni».
Čytajcie taksama:
EPAM raptoŭna vyjšaŭ z prahramy padrychtoŭki ajcišnikaŭ u EHU
«Ledź nie pamior sa strachu». Ajcišnik raskazaŭ, jak jeździŭ u Biełaruś pradavać kvateru
Teściroŭščyca padzialiłasia łajfchakam, jak adkładać 80% zarobku
