Dvuchsieryjny dakumientalny film Andreja Łuhavoha «Kazachstanski nadryŭ» maluje dziaržavu — sajuźnicu Rasii pa JEAES jak krainu, padkantrolnuju Zachadu. U ciapierašniaj Rasii taki film nie moh źjavicca biez rašeńnia Kramla.
Kazachstan — adna z najbolšych pa terytoryi krain śvietu. Heta sapraŭdnaja skarbnica redkaziamielnych resursaŭ, a da taho ž uvachodzić u top-20 krain pa zapasach nafty i hazu. Pa vytvorčaści paliŭnaha ŭranu Kazachstan znachodzicca na pieršym miescy ŭ śviecie.
Film-pamflet Łuhavoha zbudavany jak vykryćcio Vialikabrytanii i jaje palityki ŭ postsavieckich krainach. Ale za atakami na brytancaŭ niedvuchsensoŭna hučać papiaredžańni samomu Kazachstanu.
«Dla Vialikabrytanii Kazachstan heta tolki karmavaja baza, syravinny prydatak, jaki ščylna siadzić na naftavaj ihołcy, nie majučy na svajoj terytoryi mahutnaściaŭ dla samastojnaj pierapracoŭki. Zatoje maje dvaccacipracentnuju inflacyju i najvyšejšy ŭzrovień karupcyi. Voś da čaho pryvodziać mary pra siabroŭstva z brytanskim spadarstvam», — śćviardžaje Łuhavy.
Rasijski deputat adznačaje, što mienavita ŭ hetaj krainie za apošni čas bolš za ŭsio źjaviłasia «niadobrazyčliŭcaŭ» Rasii i abvinavačvaje Kazachstan u derusifikacyi. Pad apošnim u adnosinach da postsavieckich krain u Rasii majuć na ŭvazie vykarystańnie nacyjanalnaj movy ŭ dziaržaparacie, ŚMI i adukacyi. Siarod inšaha, u filmie kazachaŭ abvinavačvajuć u źmienie nazvaŭ čyhunačnych stancyj na kazachskija i paralelna — u svabodzie dla ŁHBT.
Rasijski palityk śćviardžaje, što mienavita Vialikabrytanija pieratvaryła Kazachstan u samy pratesny rehijon Centralnaj Azii. Na dumku Łuhavoha, Łondan staić za arhanizacyjaj studzieńskich padziej 2022 hoda, jakija pačalisia z buntaŭ u hazazdabyŭnym horadzie Žanaazenie na zachadzie Kazachstana, a paśla pieraraśli ŭ masavyja pratesty. U vyniku «Kazachstan byŭ za krok ad poŭnaha krachu», zajaŭlaje aŭtar filma.
Jon zhadvaje pra biesparadki ŭ Žanaazenie ŭ 2011 hodzie i śćviardžaje, što «raz za razam na praciahu historyi brytancy ładziać u Žanaazenie bunty, jakija časta chutka pierakidvajucca na ŭsiu terytoryju Kazachstana».
Na dumku Łuhavoha, horad žyvie nie nadta bahata, niahledziačy na toje, što tam pracujuć try vialikija naftazdabyŭnyja kampanii. I vinoj usiamu «zachodnija kampanii, jakija dziesiacihodździami smokčuć z Kazachstana ŭsie soki, viartajučy nazad tolki mizer», miarkuje jon.
Na dumku Łuhavoha, «kalektyŭny Zachad» kiruje pratesnymi nastrojami praź sietku «prykormlenych» im NKA, ŚMI, błohieraŭ i palitołahaŭ. A kantrol, śćviardžaje jon, ažyćciaŭlajecca praz Fond praduchileńnia kanfliktaŭ i sadziejničańnia biaśpiecy, jaki dziejničaje pry pasolstvie Vialikabrytanii ŭ Astanie.
Frahmient filma. Skryn videa: ordaasia / YouTube
Łuhavy śćviardžaje, što za apošnija try hady ŭ Kazachstanie adbyŭsia 2901 mitynh, niekalki repietycyj kalarovych revalucyj, «praduchilenych u apošni momant miratvorčymi siłami ADKB pad kiraŭnictvam Rasii. Epochi źmianiajucca, a anhličanie ŭsio jašče dumajuć, što im usie vinnyja».
Praniknieńnie Vialikabrytanii ŭ krainu, śćviardžajecca ŭ filmie, idzie i praz palityčnyja elity, pryčym nastolki paśpiachova, što niekatoryja ekśpierty nazyvajuć kiraŭnictva Kazachstana «ŭzornaj kampradorskaj kałanijalnaj administracyjaj».
U filmie vykazvajecca niezadavolenaść, što «praz ukazańni z toj samaj vyspy Kazachstan zakryŭ miežy dla paralelnaha impartu Rasii», chacia pieršapačatkova abiacaŭ dapamahčy. U vyniku «ludzi, jakija ŭkłali srodki ŭ hetyja ździełki, nie mohuć zabrać ni tavar, ni pieraličanyja hrošy».
«Kali prabity ŭ suvierenitecie Kazachstana prałom praciahnie pašyracca, narod Kazachstana, adurmanieny sałodkimi pramovami brytancaŭ pa prykładzie ŭkrainskich «niebratoŭ» apyniecca pad čužyncam na svajoj ziamli, to bajusia, navat namahańniaŭ Rasii nie chopić, kab znoŭ utrymać našych uschodnich susiedziaŭ ad kroku ŭ biezdań», — prahnazuje Łuhavy i złaviesna papiaredžvaje: «Budźcie aściarožnyja, braty kazachi. Nie hublajcie pilnaści. Vialikabrytanija prosta pakarystajecca i vykinie. Rasija zaŭsiody pobač. Heta ŭžo pravierana stahodździami. Bieražycie dobrasusiedskija adnosiny i svaju krainu».
Sprobam Rasii zachapić i rasčlanić Ukrainu ŭ 2014 i 2022 hadach papiaredničali anałahičnyja abvinavačvańni.
Čytajcie taksama:
Rasija prosić bienzin u Kazachstana
Kazachstan piaty hod zapar nie budzie pravodzić parad Pieramohi
