Zapłanavany vyhlad šmatmiljardnaha budaŭničaha prajekta žyłoha kompleksu «Paŭnočny bierah» u Minsku. Fota: Realt.by
«Hałoŭny inviestar šmatmiljardnaha prajekta North Waterfront («Paŭnočny bierah») u Minsku i kiraŭnik emirackaj kampanii Emaar Properties Machamied Ali Ałabar dasiahnuŭ papiaredniaj damovy ab prodažy ŭsich svaich aktyvaŭ u Biełarusi z-za sankcyj Zachadu», — piša Reuters sa spasyłkaj na dźvie blizkija da situacyi krynicy.
Akramia taho, dadatkovaj nahodaj dla sychodu Ałabara ź Biełarusi krynicy nazyvajuć jaho novy budaŭničy prajekt u Sierbii, jaki ładzicca ŭ supracoŭnictvie z amierykanskim biznesmienam Džaredam Kušnieram, ziaciem byłoha prezidenta ZŠA Donalda Trampa.
Sierbski prajekt Ałabara praduhledžvaje pierabudovu byłoj štab-kvatery juhasłaŭskaj armii ŭ Biełhradzie ŭ sučasny i vysokatechnałahičny žyły kompleks, pieradajuć krynicy Reuters.
Sam Ałabar admoviŭsia kamientavać Reuters pryčyny svajho sychodu ź Biełarusi i asobu patencyjnaha pakupnika jaho biełaruskich aktyvaŭ. U toj ža čas pres-słužba Łukašenki zajaviła, što dla taho rašeńnie Ałabara «stała navinoj», adznačaje ahienctva.
Dyrektar kampanii Emaar Properties Machamied Ali Ałabar. Fota: BiełTA
Nahadajem, što pad prajekt «Paŭnočnaha bieraha» Alaksandr Łukašenka ŭ 2021 hodzie vypuściŭ śpiecukaz №186 «Ab realizacyi inviestycyjnaha prajekta». U im inviestaru dajucca šmatlikija prefierencyi, hałoŭnaja ź jakich u tym, što ščylnaść zabudovy dazvolena pavialičyć amal udvaja vyšej za limitnuju normu, zaćvierdžanuju raniej roznymi ministerstvami.
Ekołahi aścierahalisia, što kali prajekt «Paŭnočny bierah» realizujecca ŭ tym vyhladzie, jaki abiacajuć inviestary, to centr stalicy Biełarusi, imavierna, budzie zadychacca ad pastajannaha smohu. Bo ščylnaść zabudovy budzie zalimitnaj (značna vyšejšaj za «Minsk-Śviet» abo «Majaka Minska»), a vyšynia budynkaŭ — bolšaj za 50 mietraŭ.
Sam «Paŭnočny bierah» jašče tolki-tolki pačaŭ budavacca na poŭnačy Minska. Dla jaho była vydzielena amal tysiača hiektaraŭ ziamli, a košt prajekta aceńvajecca minimum u 4 miljardy jeŭra (kala 15 miljardaŭ biełaruskich rubloŭ).
Całkam dabudavać ŭvieś kompleks płanavali da 2040 hoda. Na jaho terytoryi patencyjna zmohuć pražyvać bolš za 30 tysiač čałaviek.
Mapa zapłanavanaj zabudoŭli «Paŭnočnaha bieraha» ŭ Minsku. Fota: Onliner
Čytajcie taksama:
U jakich haradach Biełarusi kolkaść nasielnictva vyrasła z 2000 hoda REJTYNH
Rasijskaja kampanija sprabuje spahnać ź Biełarusi hrošy za zryŭ madernizacyi zavoda
