Maksim Kuźminaŭ. Fota: HUR Minabarony Ukrainy
Vydańnie The New York Times vypuściła artykuł pra lotčyka Maksima Kuźminava, jakomu ŭkrainski ŭrad vypłaciŭ 500 tysiač dalaraŭ i daŭ ukrainski pašpart na imia Ihara Šaŭčenki paśla taho, jak toj pierahnaŭ va Ukrainu rasijski viertalot Mi-8.
Kuźminaŭ pakinuŭ Ukrainu ŭ kastryčniku minułaha hoda i pajechaŭ u Viljachojas u pravincyi Alikante — nievialiki horad na ŭźbiarežžy Mižziemnaha mora, papularny siarod brytanskich i ŭschodniejeŭrapiejskich turystaŭ. Tam jon pasialiŭsia na dziaviatym paviersie ścipłaha žyłoha doma prykładna ŭ 10 chvilinach chady ad plažu.
Heta byŭ dziŭny vybar dla čałavieka, na likvidacyju jakoha vidavočna nacelilisia rasijskija ŭłady. Rehijon źjaŭlajecca dobra viadomaj apieratyŭnaj bazaj dziejačaŭ rasijskaj arhanizavanaj złačynnaści, niekatoryja ź jakich padtrymlivajuć suviazi sa śpiecsłužbami krainy, zajaŭlajuć ispanskija ŭłady.
Pa słovach adnaho z rasijskich vajennych pierabiežčykaŭ, jaki pasialiŭsia ŭ Ispanii i pažadaŭ ź mierkavańniaŭ biaśpieki zastacca ananimnym, rehijon, dzie pasialiŭsia Kuźminaŭ, — «čyrvonaja zona», zapoŭnienaja rasijskimi ahientami.
Pa słovach adnaho z vysokapastaŭlenych čynoŭnikaŭ Hramadzianskaj hvardyi, u Viljachojas Kuźminaŭ vioŭ «niaścipłaje žyćcio», chadziŭ u papularnyja siarod rasijskaj i ŭkrainskaj klijentury bary, prahulvajučy hrošy, atrymanyja ad ukrainskaj dziaržavy. Pa horadzie jon jeździŭ na čornym «Miersedesie» S-kłasa.
Jak mienavita zabojcy znajšli Kuźminava, nie vyznačyli. Viadoma, što mužčyna adnaviŭ kantakt z byłoj dziaŭčynaj, jakaja znachodzicca ŭ Rasii, i zaprasiŭ jaje pryjechać da jaho ŭ Ispaniju.
Za niekalki dzion da zabojstva kilery skrali ŭsiedarožnik u inšym horadzie. Na im jany sačyli za Kuźminavym i pryjechali da jaho doma, čakajučy na parkoŭcy. U lotčyka vypuścili šeść kul, što vielmi dziŭna dla Ispanii.
«Tut, u Ispanii, nie pryniata, kab u kahości stralali vialikaj kolkaściu patronaŭ», — skazaŭ načalnik departamienta palicyi Viljachojas Piepie Alvares. «Heta prykmiety, jakija pakazvajuć na arhanizavanuju złačynnaść, na złačynnuju arhanizacyju, na prafiesijanałaŭ».
Paśla ranieńnia Kuźminaŭ zmoh prabiehčy krychu, zatym upaŭ, a zabojcy niekalki razoŭ pierajechali jaho na aŭtamabili. Mašynu kileraŭ znajšli praź niekalki dzion — jana całkam vyharała. Śpiecyjalistam spatrebiŭsia tydzień, kab vyznačyć marku i madel aŭtamabila.
Važnaj začepkaj stali hilzy: Kuźminava rasstralali ź pistaleta Makarava. Pa słovach ispanskich śledčych, heta možna ličyć peŭnym pasłańniem: «Ja ciabie znajdu, zabju, prydušu i źniavažu».
Čytajcie jašče:
U Ispanii zabili piłota, jaki pierahnaŭ va Ukrainu rasijski viertalot
Rasijski piłot, jaki pierahnaŭ va Ukrainu viertalot Mi-8, atrymaje paŭmiljona dalaraŭ
