Skrynšot sa śpisu ekstremisckich materyjałaŭ
Siońnia stała viadoma, što čat, pryviazany da kanału «Bieły trusik», jaki viaduć radykalnyja prychilniki Łukašenki, pryznali ekstremisckim.
«Bieły trusik» — kanał prychilnikaŭ błohieraŭ Bondaravaj, Sidarovič i Uvarava. Administracyja kanała šukaje «zmaharoŭ» siarod dziaržaŭnych funkcyjanieraŭ Biełarusi. Ich jany nazyvajuć «sutułymi» i «supołkaj». U rozny čas jany zapisvali ŭ «kryptazmaharoŭ» supracoŭnikaŭ administracyi Łukašenki, prapahandystaŭ, čynoŭnikaŭ i inšych dziejačaŭ. U tym liku navat Mukavozčyka.
Skrynšot z kanała «Bieły trusik»
Ahułam ichnija pohlady zvodziacca da taho, što mudry i mocny lidar — Łukašenka — atočany źniešnimi i ŭnutranymi vorahami, jakija ŭcichuju marać pra prychod Cichanoŭskaj da ŭłady. Praz heta «vorahi» staviać svaich ludziej paŭsiul, navat u kramy cacak, dzie pradajuć «niapravilnyja cacki ź viasiołkaj, jakaj prapahanduje ŁHBT».
Siarod «pośpiechaŭ» supołki — stvareńnie prablemaŭ tyktok-błohieru Dzim Dzimyču, jakoha advolna vinavacili ŭ ŁHBT-prapahandzie i admiena vystupu Sakurava ŭ Minsku.
Nahodaj zapisać čałavieka ŭ «zmahary» moža stać, naprykład, dazvoł na «niapravilnuju» mastackuju vystavu (pohlady na mastactva ŭ ich uvohule vielmi śpiecyfičnyja) abo kancert. Ci prosta krytyka kanała abo niekaha z kumiraŭ administracyi, naprykład, Bondaravaj — za heta prapahandysta Kanstancina Prydybajłu i zapisali ŭ hiei.
Skrynšot z kanału «Bieły trusik»
Zvyčajna pryznańnie čata kanała ekstremisckim vykarystoŭvajecca jak «papieradžalny streł». Taksama heta moža značyć, što niekaha z udzielnikaŭ čata asudzili za «ekstremizm».
Tak było z błohieram Alaksiejem Holikavym — pakul jon tolki chvaliŭ Łukašenku i ckavaŭ jaho apanientaŭ, usio ŭ jaho było dobra. Jamu navat davieryli vieści pieradaču na STB.
Ale kali jon razam sa svaim siabram Michaiłam Sidarenkam, jaki pracavaŭ u bresckim aŭtaparku, pačaŭ krytykavać čynoŭnikaŭ, to čat jahonaha kanała pryznali ekstremisckim, a Sidarenku asudzili na sutki. Pra Holikava niekatoryja prapahandysty pačali kazać, što jon «idzie šlacham Cichanoŭskaha». U vyniku adnaho z kamientataraŭ čata asudzili za «abrazu Łukašenki» — jon nazvaŭ taho «bałabołam».
Samoha Holikava zmusili prycichnuć.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
«Miehatop» źniaŭ rekłamu, dzie mužčyna ŭ ružovym paradziruje Kery Bredšou. I narvaŭsia na HUBAZiK
