Ilustracyjny zdymak. Fota: «Naša Niva»
Mašyny padaražejuć, ale nie ŭsie
Pavialičeńnie stavak ŭtylizacyjnaha zboru zakranie tyja aŭto, jakija jurydyčnyja asoby impartujuć u Biełaruś z trecich krain.
Z ulikam taho, što apošnija hady biełaruski rynak novych aŭto mocna kitaizavaŭsia, u bolšaści vypadkaŭ novyja staŭki zakranuć aŭtamabili kitajskaj vytvorčaści. Razam z «kitajcami», padaražeje nievialikaja dola mašyn, jakija biełaruskija dylery pastaŭlajuć z krain Jeŭropy i Karei.
U vyniku novaŭviadzieńni zakranuć tolki kala 20-25% rynku novych aŭto, jakija pastaŭlajuć u Biełaruś jurydyčnyja asoby.
Što tyčycca biełaruska-kitajskich Geely, to tut nijakaha padaražeńnia ad abnoŭlenych stavak nie čakajecca. Mašyny biełaruskaj vytvorčaści ŭtylizacyjnym zboram nie abkładajucca. Taksama nie padaražejuć praz rost stavak utylizacyjnaha zboru aŭtamabili, jakija vyrablajuć u krainach JEAES.
Nakolki mohuć vyraści ceny?
Novyja kitajskija i inšyja aŭto z trecich krain z abjomam ruchavika ad 1 da 2 litraŭ nieŭzabavie mohuć prybavić u canie pa 5 530 rub. (kala $1700). Staraja staŭka ŭ 6115 rub. dziejničaje da 31 sakavika, paśla imparcioram daviadziecca płacić 11 645 rub.
Bolš adčuvalna prybaviać u canie aŭtamabili z abjomam ruchavika ad 2 litraŭ. Dla ich utylzbor vyraście z 9 652 rubloŭ da 32 727 rub. Heta plus 23 075 rub., abo kala $7100. Z ulikam nastolki istotnych źmien, častka aŭto, jakija traplajuć u dadzienuju katehoryju, moža prosta źniknuć z aficyjnaha prodažu.
Niepadjomynia staŭki dla hruzavikoŭ
Aproč lehkavych aŭto, z nastupnaha miesiaca mocna padaražeje hruzavy transpart u tym liku małatanažny.
Raniej utylizacyjny zbor za hruzavik ahulnaj vahoj da 2,5 tony (katehoryja M1) składaŭ 4083 rubloŭ za TS va ŭzroście da 3 hadoŭ i 7187 za starejšyja za try hady. Ciapier budzie 17 316 i 25 161 rubloŭ adpaviedna. Heta plus 13 233 rub. (kala $4000) dla hruzavika, z momantu vypusku jakoha prajšło mienš za 3 hady, i plus 17 974 rub. (kala $5500), kali aŭto ŭžo spoŭniłasia try hady.
Ilustracyjny zdymak. Hruzavik ahulnaj vahoj da 3,5 tony. Fota: «Naša Niva»
Krychu mienš padrastuć staŭki na hruzavyja aŭto ahulnaj vahoj ad 2,5 da 3,5 tony. Novyja staŭki vyhladajuć tak:
18 653 rub. za hruzavik da 3 hadoŭ (było 6534 rub.),
27 137 rub. za hruzavik ŭzrostam ad 3 hadoŭ (było 10 209 rub.).
Takim čynam hruzavyja mikraŭtobusy, jakija padapadajuć pad vadzicielskuju katehoryju «V», pry imparcie ź Jeŭropy padaražejuć na 12 120—16 930 rub. (kala 3700—5200 dalaraŭ). Staŭki ŭtylizacyjnaha zboru za hruzavyja aŭto adnolkavyja jak dla fizičnych, tak i dla jurydyčnych asob.
Uvozić uzrostavyja lehkaviki stanie tańniej
Dla fizičnych asob staŭki nie pavysiacca. Bolš za toje, u niekatorych vypadkach navat źmienšacca.
U storoj redakcyi isnavali try ŭzrostavyja hradacyi dla lehkavych aŭto, jakija impartujuć fizičnyja asoby: da 3 hadoŭ (staŭka 544,5 rub.), ad 3 da 7 (staŭka 816,7 rub.) i starejšyja za 7 hadoŭ (staŭka 1225,1 rub.).
U novaj redakcyi zastalisia tolki da 3 hadoŭ i starejšyja za try hady. Adpaviedna, paśla taho, jak zakon nabudzie moc, impartavać u Biełaruś aŭto z momantu vypusku jakoha prajšło bolš za 7 hadoŭ stanie krychu vyhadniej. Dla hetaj katehoryi aŭto ŭtylzbor pamienšaje na 408 rub.
Aznajomicca z poŭnym śpisam źmien i novymi staŭkami na inšyja katehoryi transpartnych srodkaŭ možna pahladzieć pa spasyłcy.
Čytajcie taksama:
U Rasii pad inšym brendam adnavili vypusk papularnych u nas biudžetnikaŭ Hyundai i KIA. Novaja nazva i ceny
«Bieź ilhot!» U Biełarusi pačali pradavać mašyny, razmytnienyja admysłova dla pierahonu ŭ Rasiju
