Fota: BiełTA
Staŭki vyraśli pryblizna na 20%
Samyja vialikija čerhi na miažy ciapier — na litoŭskim kirunku. U abodvuch punktach propusku sabrałasia pa bolš za 1100 vialikahruzaŭ, jakija čakajuć ujezdu ŭ Litvu.
Prykładna stolki ž — na ŭjezd u Biełaruś. Pa źviestkach pradstaŭnikoŭ litoŭskaj słužby Dziaržaŭnaj pamiežnaj achovy, na ranicu paniadziełka da punkta «Miadzininkaj» (Kamienny Łoh) padyšli kala 1130 hruzavikoŭ, a da punkta propusku «Šalčyninkaj» (Bieniakoni) — kala 1175 fur.
Pa słovach biełaruskaha łahista, pieravozčyki ŭžo adreahavali na značny rost čerhaŭ.
«U paraŭnańni ź siaredzinaj minułaha miesiaca, kali jašče pracavali «Pryvałka» i «Katłoŭka», staŭki vyraśli pryblizna na 20%», — kaža śpiecyjalist.
Surazmoŭca nie vyklučaje, što heta jašče nie miaža, bo ceny na dastaŭku rastuć nie tolki tamu, što pieravozčyki chočuć kampiensavać prastoi na miažy, ale i praz toje, što sami zakazčyki hatovyja płacić bolš, kab tolki tavar pryjechaŭ chutčej.
Praz Polšču — chutčej
«Ciapier samy chutki pierachod heta «Kazłovičy», ale pacichu i tam čerhi vyraśli, bo častka pieravozčykaŭ pieraklučyłasia z zakrytych litoŭskich punktaŭ propusku na polski i łatvijski. Tam čerhi taksama vyraśli», — dzielicca łahist.
Imparcior tavaraŭ z Polščy, jaki rehularna adpraŭlaje fury ź Biełastoka, kaža, što prynamsi dla ich pieravozčyki canu nie padvyšali. Čas pierachodu praź miažu pavialičyŭsia, ale nie značna.
Ilustracyjny zdymak. Fota: «Naša Niva»
«My ŭžo davoli daŭno pieraklučylisia na «Kazłovičy», bo palaki afarmlajuć našmat chutčej, čym litoŭcy. Ź Biełastoka da TŁC u Biełarusi za troje sutak. Na kruh u jaho sychodzić 7-8 dzion. U lutym užo byli dva takija rejsy», — kaža imparcior.
Pa stanie na viečar paniadziełka, vyjezdu ź Biełarusi ŭ Polšču čakała 300 fur. Heta ŭ dva razy mienš, čym na łatvijskim kirunku, i ŭ try — čym na litoŭskim.
Plus 100 jeŭra za miesca na aŭtavozie
Bujny pieravozčyk, jaki śpiecyjalizujecca na pieravozcy aŭto ź litoŭskaj Kłajpiedy, kaža, što z tydzień tamu byli vymušanyja padniać staŭki.
«Za aŭto ciapier biarom 750 jeŭra zamiest 650, a za matacykł pa 320 zamiest 280 raniejšych. Mahčyma, ceny jašče krychu padrastuć, bo na prachodžańnie miažy ciapier sychodzić našmat bolš času. Niekali na piku ŭ nas užo byli staŭki pa 850 jeŭra za aŭto i 350 za matacykły», — kaža surazmoŭca.
Ilustracyjny zdymak. Fota: «Naša Niva»
Pry hetym pieravozčyk adznačaje, što litaralna za niekalki dzion da źjaŭleńnia navin pra namier zakryć jašče dva punkty propusku staŭki za pieravozku aŭto byli źnižanyja z 700 da 650 jeŭra.
U dastaŭcy busami svaja śpiecyfika
Jašče adzin pieravozčyk, jaki śpiecyjalizujecca na dastaŭcy hruzaŭ busami, adznačaje, što paśla zakryćcia miežaŭ padniaŭ staŭki na 20%.
«Na busach jość svaja śpiecyfika, bo časta davodzicca jeździć ź pierahruzkami. Ź imi prajechać možna tolki praź Litvu abo Łatviju, bo ŭ palakaŭ z hetym stroha. Kali jość pierahruz, to biez štrafu nie prajedzieš», — pryznajecca pieravozčyk.
Ź jaho słoŭ, rost stavak — heta nie žadańnie zarabić bolš na składanaj situacyi, a sproba kampiensavać uzrosłyja časovyja vydatki.
U vyniku ŭzrosłyja vydatki na transparciroŭku buduć kłaścisia na kančatkovych spažyŭcoŭ tavaraŭ. Anansavanyja biełaruskim bokam kontrsankcyi ŭ dačynieńni da Litvy ŭ adkaz na zakryćcio jašče dvuch punktaŭ propusku taksama mohuć paŭpłyvać na rost cen na dastaŭku tavaraŭ, jakija išli da nas praź Litvu. Abmiežavańni pačnuć dziejničać z 1 krasavika. Padrabiaźniej možna pračytać pa spasyłcy.
Čytajcie taksama:
«Mnohija spadziajucca na chutkaje adkryćcio «Bruzhoŭ». Što kažuć hrodziency pra žyćcio ŭ «abłozie»Prezident Biała-Padlaski nie dazvoliŭ fiermieram zabłakavać darohu ad miažy ź Biełaruśsiu
