Fota: minzdrav.gov.by, telehram-kanał Savieta Respubliki
Vyłučeńnie Abielskaj na novuju pasadu palityčny analityk infarmahienctva «Pozirk» Alaksandr Kłaskoŭski nazyvaje, chutčej, siniekuraj, čym namiokam na toje, što jaje palityčnaja karjera pojdzie ŭharu.
«Jaje vyłučeńnie — chutčej žest udziačnaści z boku Alaksandra Łukašenki. Naŭrad ci tut prahladajecca pierśpiektyva karjernaha rostu, što, naprykład, jana stanie śpikierkaj zamiest Kačanavaj. Heta bolš padobna da hanarovaj piensii.
Abielskaja ŭžo dasiahnuła piensijnaha ŭzrostu, mahčyma, jana prosta stamiłasia ad pasady hałoŭnaj lekarki Respublikanskaha miedycynskaha centra, i całkam imavierna, što joj prosta zachaciełasia žyć bolš spakojnym žyćciom», — razvažaje Kłaskoŭski.
Darečy, paŭnavartasny zarobak u Saviecie Respubliki atrymlivajuć tolki śpikier i piać staršyniaŭ kamisij. Astatnija členy Savieta Respubliki zastajucca na raniejšych miescach pracy i pryjazdžajuć tolki na pasiedžańni.
Siarod dovadaŭ, čamu Abielskaja naŭrad ci stanie zamienaj Kačanavaj, Kłaskoŭski nazyvaje nie samy ŭdały dośvied z kolišnim pryznačeńniem jaje maci na pasadu ministra achovy zdaroŭja:
«Ludmiła Pastajałka pratrymałasia na hetaj pasadzie niadoŭha, i vidavočna, što jana stała ministarkaj dziakujučy stasunkam svajoj dački. Ale naŭrad ci Łukašenka paličyŭ toj ekśpierymient udałym».
Pastajałka była ministarkaj ź lipienia 2002 da śniežnia 2005. U jaje dyjahnastavali ankałohiju, i praz 14 miesiacaŭ jana pamierła.
Aproč hetaha, na dumku Kłaskoŭskaha, u Kačanavaj jość takaja pieravaha jak vialiki čynoŭnicki i arhanizacyjny dośvied, čaho niama ŭ Abielskaj. Tamu, na dumku analityka, varyjant zamieny ciapierašniaj śpikierki na Irynu Abielskuju nie razhladajecca.
«Kačanava — daśviedčanaja i addanaja Łukašenku čynoŭnica, jakaja jaho całkam zadavalniaje. Jana pa-za kankurencyjaj što da kamplimientaŭ na adras Łukašenki.
Dy i naohuł, naŭrad ci sama Iryna Abielskaja budzie ŭdziačna Łukašenku, kali jon uskładzie na jaje ŭsie abaviazki, jakija maje Kačanava», — razvažaje analityk.
Čytajcie taksama:
Čaho čakać ad vybaraŭ u Rasii i jak jany adabjucca na Biełarusi? Razvažajuć analityki
Dzied Koli Łukašenki byŭ palitviaźniem — atrymaŭ 25 hadoŭ HUŁAHa za dapamohu «banderaŭcam»
Kolkaść kamplimientaŭ vyšejšych caradvorcaŭ da staroha dyktatara va ŭmovach kulta asoby vielmi słaba kareluje ź ichnaj addanaściu. Rytoryka i ŭčynki Takajeva da studzienia 2022 ŭ datyčeńni da jełbasy vyhladali zvonku našmat bolš siervilnymi i lizabludckimi. Nahadaju, što mienavita Takajeŭ był inicyjataram pieraimienavańnia kazachskaj stalicy ŭ Nursułtan.
Taksama varta ŭzhadać, što mienavita Kačanava z treskam pravaliła kampaniju-2020, nastupstvy čaho dla ŭzurpatara niaspynna ŭzmacniajucca, i jon heta vidavočna adčuvaje. A ščylnyja kantakty Kačanavaj s Kramlem u sukupnaści ź piermanientnaj paranaidalnaściu, žadańniem znajści, adpomścić i vyčyścić ŭsich niełajalnych dajuć padstavy dyktataru pieryjadyčna padazravać, što z boku Kačanavaj heta mahło być nia prosta niejkaje hłupstva. I čym dalej - tym čaściejšymi i macniejšymi buduć hetyja prystupy.
Abielskaja - našmat bolš kantralujemaja asoba za Kačanavu, jakaja paśpieła prasunuć zanadta šmat svaich ludziej na vysokija pasady ŭ łukašenkaŭskaj viertykali. U t.ł. i siłavikoŭ kštałtu Kubrakova.