Načalnik upraŭleńnia ŭ spravie supraćdziejańnia kibierzłačynnaści Bieraściejskaha UUS Andrej Hlinski. Fota SK
Žurnalisty-rasśledavalniki vyjavili, što na Bieraściejščynie paśla 2020 hoda pry roznych abstavinach pamierli nie mienš za piać vysokapastaŭlenych aficeraŭ. Choć aficyjna nie paviedamlałasia pra hetyja śmierci, infarmacyja pra dźvie ź piaci ŭsio ž prasačyłasia ŭ ŚMI.
Pieršym pajšoŭ z žyćcia pałkoŭnik u zapasie Hienadź Vajtovič: 19 traŭnia 2021 hoda ŭ lesapałasie pry darozie ŭ Bieraściejskim rajonie jaho znajšli paviešanym. Vajtovič vyjšaŭ na piensiju ŭ kancy 2020-ha z pasady načalnika ŭpraŭleńnia achovy pravaparadku UUS Bieraściejskaha abłvykankama. Na piensii žyŭ u pradmieści Bieraścia z žonkaj i synam, jaki taksama byŭ supracoŭnikam MUS. Śpirtnymi napojami Vajtovič nie złoŭžyvaŭ, namieraŭ skončyć žyćcio samahubstvam nie vykazvaŭ.
Upraŭleńnie, jakim kamandavaŭ Vajtovič pierad vychadam na piensiju, u 2020 hodzie kaardynavała pracu ŭsioj bieraściejskaj milicyi ŭ zdušeńni pratestaŭ i naŭprost spravazdačyłasia pierad MUS.
Druhaja śmierć zdaryłasia ŭ Baranavičach. Uletku 2022 hoda pry kupańni skoknuŭ u vadu, złamaŭ šyju i paźniej pamior u špitali načalnik adździeła achovy pravaparadku Baranavickaha HAUS, padpałkoŭnik milicyi Alaksiej Hiećman. Jon viadomy tym, što łžyva śviedčyŭ u sudach, fabrykavaŭ administracyjnyja i kryminalnyja spravy suprać haradžan.
Nastupny pamierły — padpałkoŭnik upraŭleńnia HUUB MUS pa Bieraściejskaj vobłaści, jakoje śpiecyjalizujecca na pošuku biełarusaŭ, što pakidajuć u siecivie kamientary pra siłavikoŭ.
19 śniežnia 2020-ha ŭ svajoj kvatery pamior 43-hadovy staršy opierupaŭnavažany ŭ asoba važnych spravach upraŭleńnia HUUB MUS padpałkoŭnik R. Levaniuk.
Unačy 15 traŭnia 2021 hoda ŭ Bieraściejskuju bolnicu chutkaj miedyčnaj dapamohi ŭ stanie komy, vyklikanaj ałkaholnaj intaksikacyjaj, čerapna-mazhavoju traŭmaj, strasieńniem hałaŭnoha mozhu dastavili byłoha načalnika ABEZ, jaki atrymaŭ pavyšeńnie ŭ słužbie na pasadu staršaha opierupaŭnavažanaha ŭ asoba važnych spravach UBEZ UUS Bieraściejskaha abłvykankama, padpałkoŭnika milicyi U. Pytlakova. Z dapamohaju miedyčnaj inicyjatyvy «Biełyja chałaty» ŭdałosia daviedacca, što vysokapastaŭleny ŭbepaviec pamior.
Apošniaj u šerahu śmierciaŭ supracoŭnikaŭ u pałkoŭnickich zvańniach stałasia niadaŭniaja viestka pra raptoŭnuju śmierć zhadanaha ŭ pačatku artykuła 44-hadovaha načalnika ŭpraŭleńnia ŭ spravie supraćdziejańnia kibierzłačynnaści, pałkoŭnika Hlinskaha. Na pasadu jaho pryznačyli ŭletku 2022-ha. Uličvajučy viek i zvańnie, jon zrabiŭ hałavakružnuju karjeru.
Čytajcie taksama:
Prasłuchoŭka i «chabar» ad KDB. Stała viadoma, jak sudzili eks-kiraŭnika achovy Łukašenki
Stała viadoma pra śmierć jašče adnaho vysokapastaŭlenaha siłavika
