U cełym situacyja, kali ŭ Łukašenki niama ni aficyjnaha hałoŭnaha pa kadrach — kiraŭnika Aministracyi, — ni načalnika pa finansach i ekanomicy — namieśnika kiraŭnika administracyi, — davoli redkaja.
Vunderkind Maksim Jermałovič, paklikany šukać leki suprać sankcyj i naładžvać ekanomiku ŭ difficult-režymie, akazaŭsia niepracazdolnym. Chutčej za ŭsio, jon akazaŭsia na pasadzie mima svajo voli, tamu i nie zmoh prajavicca.
Surazmoŭcy «Našaj Nivy» pryvodziać prykłady, što padčas svajoj ścipłaj, pałutarahadovaj kadencyi, Jermałovič pałovu času fizična nie źjaŭlaŭsia na pracy, bieručy balničnyja kožny raz, kali davodziłasia stavić svoj podpis pad rašeńniem ci zajmać čyjści bok. Jaho zvolnili.
Pošuki novaha — ale śmialejšaha, — finansavaha hienija pryviali da asoby Alaksandra Jahorava. 38-hadovaha bankira, matematyka i «chłopčyka, jaki ros pry Snapkovie», — jak apisvajuć jaho biełaruskija bankiry z pryvatnaha siektara.
Jahoraŭ (vučyŭsia ŭ BDU ŭ 2002-2007) prajšoŭ svaju darohu ad viadučaha ekśpierta Nacbanka da načalnika Banka raźvićcia — finansavaj instytucyi, praź jakuju ŭ Biełaruś da kanca 2020-ha ciakli jeŭrapiejskija hrošy. Na hetaj pasadzie jon zamianiŭ Andreja Žyškieviča.
Jak minimum u Jahorava jość redkaja dla biełaruskaha čynoŭnika zdolnaść — jon umieje havaryć pa anhlijsku. Jon skončyŭ mahistraturu ŭ amierykanskim kaledžy Uiljamsa.
«Ci daviedaŭsia ja niešta novaje — nie, ci asvoiŭ novyja techniki — nie, ci znajšoŭ cikavych ludziej — častkova. Samaje hałoŭnaje, ja padsiłkavaŭsia pačućciom, jakoje možna acharaktaryzavać jak žadańnie pieradać viedy», — adhukaŭsia sam Jahoraŭ na dośvied svajoj vučoby ŭ Štatach.
Heta i nie dziŭna. Jość navat taki žyćciovy aniekdot, što darahi amierykanski (brytanski) univiersitet adroźnivajecca ad tannaha tolki jakaściu studentaŭ.
Prosta reč ŭ tym, što Jahoraŭ trapiŭ u Štaty pa prahramie dla čynoŭnikaŭ z adstałych krain. Razam ź im vučylisia afrykancy, siarednieazijaty i inšyja pradstaŭniki adstałych ekanomik, jakim amierykancy sa spačuvańnia dajuć dostup da svaich padručnikaŭ.
Vučysia b Jahoraŭ na kankurentnaj prahramie z top-mieniedžarami kampanij, čyja kapitalizacyja bolšaja za pamier ekanomiki Biełarusi, naŭrad ci b jon raskidvaŭsia takimi acenkami.
Zrešty, heta spraviadliva i dla ŭsioj karjery Jahorava — jon padymaŭsia pa tych darohach, jakija dla inšych prafiesijanałaŭ byli niecikavyja.
Bankiry pryvatnaha siektaru nazyvajuć jaho «čałaviekam, jaki trapiŭ pad upłyŭ Snapkova».
Maŭlaŭ, Snapkoŭ nakiroŭvaŭ Jahorava pa žyćci, i tamu toj — nie tolki z padziaki, ale i z razumieńnia vyhodaŭ — zastavaŭsia na dziaržaŭnym šlachu, u toj čas kali inšyja, nie mienš talenavityja finansisty, plavali na rabotu na łukašenkaŭskuju dziaržavu i sychodzili zarablać hrošy ŭ pryvatny siektar.
«Pa prafiesijnych kampietencyjach jon narmalny chłopiec, nie dvoješnik. Pa čałaviečych jakaściach taksama nie padonak. Tamu, ułasna, mianie i ździŭlała, dla čaho jon pracuje na Łukašenku.
U pryvatnych razmovach jon nazyvaŭ siabie «čałaviekam Snapkova», što ŭ kampanii vyklikała niajomkija ŭśmieški, tamu što samaje mocnaje, što jość u Snapkovie — heta jahonaja pasada i blizkaść da Łukašenki. Akademična ci prafiesijna na jaho b raŭniacca nichto b nie staŭ.
Ale, ź inšaha boku, Snapkoŭ prabiŭ Jahoravu niejki karjerny ruch.
Saša pracavaŭ pry Snapkovie analitykam, davaŭ narmalnyja razbory tych prablem, jakija jość u ekanomicy, i jak ich treba vyrašać. Potym Snapkoŭ jaho adpraviŭ na rabotu jak pradstaŭnika Biełarusi ŭ MVF — tam jość taki śpiecyjalny departamient pa Biełarusi, dzie pracujuć našy kansultanty. Pracavali, dakładniej», — apisvaje karjernuju darohu Jahorava adzin ź biełaruskich bankiraŭ.
Našy surazmoŭcy nievysoka ceniać uziatyja Jahoravym vyšyni ŭ Banku Raźvićcia.
«Jahoraŭ pačynaŭ jak bankir, a skončyŭ u Banku raźvićcia, u jakim ad banka tolki nazva. Heta nie bank, a kantora pa raźmierkavańni biudžetnych i buržujskich srodkaŭ.
Bank raźvićcia źjaviŭsia pad ciskam zachodnikaŭ i pa inicyjatyvie Rumasa, tamu što davać hrošy Jeŭropy naŭprost biełaruskim dziaržaŭnym bankam, jakija dalej ich vydzialać pad niarynkavy pracent «kamu treba», prosta niazručna. Rumas jak staršynia Biełahraprambanka heta razumieŭ lepš za ŭsich, i tamu prasoŭvaŭ hetuju historyju.
A kiravać kantoraj, jakuju zalili hrašyma, i pry hetym raźmiarkoŭvać jaho na sprečnyja prajekty — takoje sabie prafiesijnaje dasiahnieńnie.
Dla mianie tut zasłuhi nijakaj niama, tamu što da zarableńnia hetych hrošaj kiraŭnictva Banka raźvićcia nie maje nijakaha dačynieńnia. U tvaim rasparadžeńni albo padatki biełarusaŭ, albo fandziravańnie zachodnikaŭ, jakoha ŭžo niama.
Prajavić tut kiraŭničy hienij niama dzie, heta dziaržaŭnaja pasada.
Saša — prafiesijny vykanaŭca, z łahičnym karjernym rostam. Čałaviek, upisany ŭ sistemu.
Znoŭ ža — niama z kaho vybirać. Kolkaść prafiesijanałaŭ, jakija nie adznačylisia ni ŭ podpisach, ni ŭ mitynhach, ni ŭ dopisach fejsbuka, minimalnaja. Jahoraŭ — nie samy adorany bankir na słužbie Łukašenki. Ale, moža być, adzin z samych adoranych, jakija ŭ Łukašenki jość.
Nu i ź jahonym pryznačeńniem źviazanaja nie vielmi pryhožaja historyja. Jaho pryvioŭ i paručyŭsia za jaho čałaviek, jaki potym byŭ zvolnieny za ŭdzieł u pratestach. A Saša chacia i moh skazać słova, ničoha nie skazaŭ, nijakim čynam nie zastupiŭsia, voś i ŭsia charaktarystyka», — skazaŭ inšy biełaruski bankir.
Biełaruski biznes, jaki sutykaŭsia ź Jahoravym, aceńvaje jaho pazityŭna.
«Jon narmalny. Nakolki mahčyma ŭ hetych umovach, byŭ rynačnikam. Nu, u Štatach vučyŭsia na mahistratury — lepš za Akademiju kiravańnia. Nu i jon nie maciory čynoŭnik, u im jašče čałaviečaje niešta jość.
Jahoraŭ kantaktavaŭ z žyvymi ludźmi, narmalnymi, a nie takimi ž, jak sam. Nie samaje kiepskaje pryznačeńnie. Čym bolš adekvatnych tam, čym lepš. Chacia pasada jaho, biezumoŭna, sapsuje», — vykazaŭ dumku adzin ź biźniesmienaŭ, jaki pierasiakaŭsia ź Jahoravym.
Jahoraŭ vystupaŭ na Kastryčnickim ekanamičnym forumie 2019 hoda. Jahonuju pramovu možna pahladzieć na dałučanym videa, pačynajučy z 45 chviliny.
Tam jon vykazaŭ dumki, ułaścivyja prahresiŭnym dziaržaŭnym ekanamistam, ale banalnyja dła ŭsioj astatniaj publiki.
Jon skazaŭ, što addača kapitału na pryvatnyja prajekty vyšejšaja za addaču kapitału na prajektach, naviazanych dziaržavaj.
A taksama pakrytykavaŭ vysmoktvańnie mazhoŭ IT-śfieraj: tamu što, maŭlaŭ, u inšych śfierach, mahčyma, hetyja mazhi mahli b prynieści bolšuju addaču, kali aceńvać jaje ŭ hrošach.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Što viadoma pra siamju novaha adkaznaha za ekanomiku ŭ administracyi Łukašenki
Łukašenka pryznačyŭ bankira namieśnikam kiraŭnika svajoj administracyi
