Upraŭleńnie apieratyŭnych mierapryjemstvaŭ inśpiekcyi Ministerstva pa padatkach i zborach raskazała pra toje, jak nienazvanaje IP padmanuła piensijanieraŭ u Minsku.
Sprava była takaja — niejkija ludzi pryjšli ŭ kvateru da pary piensijanieraŭ, pradstaviŭšysia supracoŭnikami kampanii, jakaja supracoŭničaje z ŽKH. Jany skazali, što, maŭlaŭ, im treba terminova zamianić rele ŭ elektraličylniku praz toje, što jany žyvuć u starym domie. I heta biaspłatna.
U vyniku jany pierakanali ich padpisać damovu. Tut i vyjaviłasia, što zapłacić treba za proćmu inšych dadatkovych pasłuhaŭ. Sumu spačatku nazvali ŭ 620 rubloŭ, ale paśla praz toje, što paciarpieły piensijanier — invalid II hrupy, sumu źnizili da 298 rubloŭ.
Piensijaniera ŭhavaryli zapłacić, adrazu ž vybiŭšy ček na niepatrebnuju pasłuhu. U pary zastałosia 120 rubloŭ na žyćcio.
Vyjaviłasia, što takich piensijanieraŭ vielmi šmat. Ale dapamahčy padatkovaja im ničym nie moža, bo firma robić usio całkam lehalna, nie zavyšaje rynkavy košt pasłuh i sapraŭdy maje licenziju na toje, kab akazvać takija pasłuhi, a taksama płacić padatki. Z usimi dakumientami ŭ ich paradak. Takim čynam, u padatkovaj pryznajuć, što heta faktyčna padman, ale jurydyčna pretenzijaŭ da firmy jany nie majuć.
Ministerstva pa padatkach i zborach dało čatyry parady, jak abaranicca ad takich machlaroŭ:
- Nie viadziciesia na abjavy ŭ psieŭdaaficyjoznym styli pra biaspłatnyja pasłuhi, jakija rasklejvajuć la padjezdaŭ. Zvyčajna heta «biaspłatnaja pravierka voknaŭ», «jakaści vady» i inšyja rečy takoha kštałtu.
- Nie puskajcie aby-kaho ŭ chatu, kali vizit nie byŭ zapłanavany zahadzia. Dziaržaŭnyja arhanizacyi zvyčajna nie chodziać pa kvaterach, kab adšukać sabie klijentaŭ.
- Kali takija ludzi da vas zajšli, to daskanała raspytvajcie pra toje, jakuju arhanizacyju jany pradstaŭlajuć i pierapytvać u samoj arhanizacyi, ci majuć jany da jaje dačynieńnie. Da hetaha nie dazvalać vykonvać anijakija pracy ŭ domie.
- Nie padpisvajcie z takimi ludźmi anijakich damovaŭ i nie pieravodźcie im hrošy, pakul vy nie ŭpeŭnilisia ŭ tym, što vam sapraŭdy patrebnaja pasłuha, jakuju vam prapanujuć. Paśla padpisańnia damovy i ŭniasieńnia apłaty davieści vašu pravatu budzie składana.
Padsumoŭvajučy, ministerstva raić być pilnymi i nie vieryć tym, chto prychodzić da vas dadomu, kab niešta pradać. Bo zvyčajna heta sproby padmanuć davierlivych žycharoŭ.
«Naša Niva» — krynica jakasnaj infarmacyi i bastyjon biełaruščyny
PADTRYMAĆ «NN»Čytajcie taksama:
Piensijanierka z Maładziečna ŭziała ŭ kredyt pralnuju mašynu i ciapier horka płača
