Fota ilustracyjnaje
Infarmacyja pra dachody namieśnikaŭ dyrektaraŭ dziaržpradpryjemstvaŭ brałasia z drukavanych numaroŭ haziet «Hrodzienskaja praŭda», «Vieśnik Mahilova», «Briestskij viestnik», «Vitiebskije novosti», «Homielskaja pravda». Heta źviestki za 2022 hod, bo padatkovyja dekłaracyi za minuły hod buduć padavacca tolki ŭ sakaviku. Paznačanyja sumy da vypłaty padatkaŭ.
Chto ź ideołahaŭ zarablaje bolš za ŭsio?
Najbolš vysokija dachody — u ideołahaŭ bujnych dziaržpradpryjemstvaŭ. Ź ich samy «bahaty» — namieśnik dyrektara pa ideałahičnaj rabocie i sacyjalnych pytańniach «Homsielmaša» Alaksandr Kanapacki. Jon zarabiŭ za 2022 hod 70 176 rubloŭ, ci 5848 rubloŭ u miesiac. Ciapier jaho pryznačyli deputatam Pałaty pradstaŭnikoŭ ad Homiela.
Namieśnik hienieralnaha dyrektara pa ideałahičnaj rabocie i sacyjalnych pytańniach «Homsielmaš» Alaksandr Kanapacki. Fota: «Homielskaja pravda»
Kolki atrymlivajuć takija rabotniki ŭ BMZ i hazavaj halinie?
Ad Žłobina ŭ Pałatu pradstaŭnikoŭ pryznačyli Alaksandra Małabickaha — kiraŭnika ideałahičnaha adździeła na Biełaruskim mietałurhičnym zavodzie. Za 2022 hod jon zarabiŭ 52 040 rubloŭ, heta pa 4337 u miesiac.
Małabicki ŭznačalvaŭ na BMZ jačejku praŭładnaj partyi «Biełaja Ruś». Jon ža arhanizoŭvaŭ udzieł zavadčan u «prajektach patryjatyčnaj tematyki». Naprykład, u aŭtaprabiehu, pryśviečanym vyzvaleńniu Žłobina ŭ Druhoj suśvietnaj vajnie.
Načalnik adździeła infarmacyi, ideałohii i raźvićcia piersanału BMZ Alaksandr Małabicki. Fota: aficyjny sajt BMZ
Jašče adzin novapryznačany deputat Pałaty pradstaŭnikoŭ — Uładzimir Baravienka. Jon zajmaje pasadu namieśnika hienieralnaha dyrektara pa ideałahičnaj rabocie, sacyjalnych i ahulnych pytańniach «Brestabłhaza». Taksama Baravienka ŭznačalvaje rajonnaje adździaleńnie partyi «Biełaja Ruś» u Breście.
Jahony hadavy dachod — 65 434 rubli, ci 5453 rubli ŭ miesiac.
Namieśnik hienieralnaha dyrektara pa ideałahičnaj rabocie, sacyjalnych i ahulnych pytańniach «Brestabłhaza» Uładzimir Baravienka. Fota: aficyjny sajt arhanizacyi
A što nakont inšych pradpryjemstvaŭ i arhanizacyj?
Udzielničali ideołahi dziaržpradpryjemstvaŭ i ŭ vybarach u miascovyja saviety. Naprykład, u Homielski abłasny saviet bałatavaŭsia Vital Panasiuk — namieśnik dyrektara pa ideałahičnaj rabocie, kadrach i sacyjalnych pytańniach Homielskaha vahonabudaŭničaha zavoda. Za hod jon zarabiŭ 61 412 rubloŭ, ci 5118 rubloŭ u miesiac.
U Hrodzienski haradski saviet abiraŭsia Hienadź Pałchovič — namieśnik hienieralnaha dyrektara pa ideałahičnaj rabocie i sacyjalnych pytańniach «Hrodnažyłbuda». Hadavy dachod — 48 882 rubli, ci 4074 rubli ŭ miesiac.
U Mahiloŭski abłsaviet bałatavałasia Volha Kavalova — namieśnica dyrektara pa ideałahičnaj rabocie Mahiloŭskaha vodakanała. Za hod jana atrymała dachod u pamiery 35 644 rubloŭ, abo 2970 rubloŭ u miesiac.
Jakija dachody ŭ ideołahaŭ miascovych orhanaŭ ułady i jačejek BRSM?
Dachody ideołahaŭ u rajonnych orhanach ułady na paradak nižejšyja, čym na dziaržpradpryjemstvach. Pra ich možna mierkavać, naprykład, pa zarobku načalnika adździeła pa ideałahičnaj rabocie i spravach moładzi Karelickaha rajvykankama Hienadzia Karpalenki. Jon bałatavaŭsia ŭ Pałatu pradstaŭnikoŭ ad Hrodna, ale pryznačany nie byŭ. Jahony hadavy dachod — 18 767 rubloŭ, heta 1564 rubli ŭ miesiac.
Krychu vyšejšyja zarobki ŭ kalehi Karpalenki z Navahrudskaha rajvykankama Natalli Žyško. Jana abirałasia ŭ Hrodzienski abłsaviet. Hadavy dachod — 25 373 rubli, abo 2114 rubloŭ za miesiac.
Supastaŭnyja dachody i ŭ aktyvistaŭ BRSM. Tak, u kiraŭnika Hrodzienskaj jačejki BRSM Arcioma Makareviča, jaki bałatavaŭsia ŭ miascovy harsaviet, hadavy dachod skłaŭ 18 576 rubloŭ, što ŭ miesiac składała 1548 rubloŭ. A sakratarka Vaŭkavyskaha rajonnaha kamiteta BRSM Natalla Klimčuk atrymała za hod 16 602 rubli, abo 1384 rubli ŭ miesiac. Ale ŭ Pałatu pradstaŭnikoŭ nie trapiła.
Samy «biedny» ideołah — u partyi Hajdukieviča
U Mahiloŭski abłsaviet bałatavaŭsia kiraŭnik miascovaha adździaleńnia ŁDPB — Alaksandr Łabadyroŭ. Jon pracuje namieśnikam dyrektara pa ideałahičnaj rabocie ŭ «Mahiloŭenierhabudzie». Ideołah zadekłaravaŭ hadavy dachod u 3250 rubloŭ. U miesiac jon, takim čynam, atrymlivaŭ usiaho 270 rubloŭ, heta nižej za biudžet pražytkovaha minimumu.
Namieśnik pa ideałahičnaj rabocie TAA «Mahiloŭenierhabud» i staršynia Mahiloŭskaha adździaleńnia ŁDPB Alaksandr Łabadyroŭ. Fota: mogilev-region.gov.by
Łabadyroŭ — biznesoviec, vałodaje kramaj aŭtazapčastak «Śpiecaŭtatechnałohii» ŭ Mahilovie. Spravy ŭ kampanii iduć nie vielmi — z 2021 hoda jana znachodzicca ŭ pracesie likvidacyi. Siarod majomaści ideołaha z samymi nizkimi dachodami — dźvie kvatery (65 i 45 kv. m) u sumiesnaj ułasnaści z žonkaj (praŭda, u jakim horadzie znachodzicca nieruchomaść, nie ŭdakładniajecca). A taksama dva aŭtamabili: Chrysler Pacifica 2004 hoda i Volkswagen Golf 1986 hoda.
Čytajcie taksama:
Stała viadoma, jakija zarobki ŭ «pałatnika»-vieterana Ihara Marzaluka
Stała viadoma, kolki zarablaje kiraŭnik administracyi Łukašenki
Jak prapahandyst Ihar Tur staŭ lubimčykam Łukašenki i kolki zarabiŭ u 2020-m
nu j... BaMbiZa. na takim pachać i pachać. a jon čym zajmajecca? trucień